詩篇 40章1節 到 40章17節   背景資料  上一筆  下一筆
Chit首詩篇真可能是由兩篇無仝ê詩歌合併而成ê,就是第1到10節,這部分是teh感謝上帝ê拯救。第二部分則tùi第11到17節,這是teh祈求上帝拯救ê 詩。特別tio̍h注意ê是第13到17節kah詩篇第七十篇仝款。Ná親像頭前ê第十四篇kah第五十三篇ê詩歌內容,mā是差不多仝款仝款。
第1到5節,chit段詩歌真清楚講出上帝確實是垂聽詩人ê祈禱。伊感謝上帝kā伊tùi「泥沼kah深坑中」救出來。Chia詩人用「泥沼」來表示性命已經完全無希望。相對tī「泥沼」ê就是「石磐」,堅定可靠。上帝kā伊tùi泥沼中救出來了後,是kā伊安khǹg tī石磐頂。因為án-ne,詩人講beh唱新ê詩歌來回應上帝救助ê疼。

第4節ê「一心信靠上主」,ná親像申命記第六篇5節所講ê,tio̍h用「全心、全情、全力」疼上帝。無一心二意ê態度。Chit句「一心信靠上主」ê句話,通常lóng是用來比較khah hiah-ê有社會地位ê人,á是擁有大量財富ê人,chit種人通常會óa靠家己ê氣力,而bē記得上帝。

詩人tī第5節表示上帝有無窮ê疼,成就了真chē人間ê大事。無任何神明ē-tàng kah上帝相比並。

第6到10節,chit段詩歌中ê第6到8節被新約希伯來書ê作者引用tī該冊第十章5到7節。Á第6節是引用何西阿書第六章6節,先知何西阿講上帝並m̄是ài人獻祭hō͘祂,上帝喜愛ê,是人有憐憫ê心,這比獻祭iáu重要。

Chia詩人mā祈求上帝賞賜hō͘伊有「注意聽ê耳á」,án-ne,伊就ē-tàng不時聽見上帝ê聲音。聖經中一再出現「tio̍h注意聽」、「側耳注意聽」等用詞,lóng teh表示聽從上帝ê話,就是性命siōng好ê禮物。詩人tī chia表示:真心ê注意聽上帝ê話語,遵行祂ê旨意,chiah是上帝所歡喜ê事。因為án-ne,詩人表示伊真樂意遵照上帝ê旨意,伊beh kā上帝ê「教示謹記在心內」。

	詩人tī第9到10節表示,伊beh tī眾人聚會ê中間歌頌上帝,beh「不斷來傳揚」上帝拯救ê信息,beh hō͘眾人lóng知影,上帝永遠「信實無變ê疼」。原因是伊知影上帝永遠愛伊。

	第11到17節,頭前有提起過ê,chit段詩歌tùi第13節開始kah詩篇第七十篇完全仝款。

	第11節,chit節ē-sái講是第12到16節ê前言。詩人非常清楚上帝有永遠無變ê疼,支抱詩人行過艱辛ê性命旅程。

	第12節,詩人講tio̍h家己ê困境,一是hō͘災難連連纏tiâu,hō͘伊無法度動彈。二是伊感覺家己ê罪狀chē到無法度詳細算,因為比伊ê頭毛koh-khah-chē。

	第13到15節,伊向上帝傾訴,hō͘上帝知影伊ê仇敵正teh嘲(sau)笑tio̍h伊,hō͘伊感覺非常ê痛苦。伊知影,chit時chit時,只有上帝chiah ē-tàng救伊脫離chit種困境。

	第16到17節,chit兩節mā ē-sái講是chit首詩篇ê「副歌」,意思是teh指重複唱。表示上帝是拯救者,祂是偉大ê救主。

重新查詢 專卷研經 詩篇系列
錯誤回報,請聯繫comm[@]fhl.net