詩篇 2章1節 到 2章12節   背景資料  上一筆  下一筆
因為chit首詩篇被馬可福音第一章11節,以及使徒行傳第四章25到26節、第十三章33節lóng有引用過其中ê詩句。加上chit首詩篇第6節講:「主講:Tī 錫安— 我ê 聖山,我已經設立我ê 王。(全民版)」因為án-ne,hō͘人認為chit首詩歌應該是kah君王有關係。若是kah君王有關係,聖經作者就真清楚表示一個概念:君王ê權力tùi上帝來賞賜,絕對無法度亂使用。因為上帝是揀選君王來照顧人民,卻m̄是用來欺壓ê。

第1到3節,chia一開始就提起「列國」,指ê是附庸國家,á是被統治者,in lóng利用新王tú登基ê時,圖謀反叛。M̄-koh in無注意tio̍h,chit位君王是上帝所選立ê。只要是上帝選立ê君王,反對chit位君王,等於是反對上帝仝款ê愚戇。因為án-ne,有反叛上帝選立ê君王之念頭,kan-taⁿ會為家己帶來koh khah大ê傷害。

第4到6節,詩人tī chia提供一個重要觀念:上帝tī天頂俯視tio̍h地上人類ê言行舉止。上帝非常清楚人ê心思意念。Chiah-ê心懷不軌ê圖謀者,認為無人知影。其實,上帝真清楚,因為án-ne,會用「大受氣告誡」chiah-ê列國。聖經一再提醒,只要上帝發出大受氣,人類就會「驚惶失措」,m̄知該怎樣辦chiah好。

第7節,chit節是chit首詩siōng重要ê一節經文,講chit位hō͘ 上帝所膏立ê君王,kah上帝之間ê關係有kah頂面仝款帝ê kiáⁿ一般ê親密。換句話講,上帝kah祂ê子民之間ê關係ná親像「父」kah「子」之間ê關係hit種地密切。聖經作者mā不時用「父」kah「子」ê關係,來形容上帝kah人之間無法度分離ê關係(參考以賽亞書六十三:16、六十四:8,耶利米書三:4、三十一:9,瑪拉基書三:17,路加福音十五:11—32)。

第8節,這是上帝ê應允,beh賞賜hō͘祂所揀選ê君王,ē-tàng治理世間列國。上帝會賞賜hō͘ chit種君王有智慧,知影用公義維護sàn-chhiah人,會保障孤苦無助ê人,會以正義治理、信實施政(參考以賽亞書十一:2—5)。

第9節,chit節被啟示錄引用了三pái(參考二:27、十二:5、十九:15)。詩人表達一個基本認知:一個公義ê君王,對hiah-ê作奸犯科ê人,絕對bē袖手旁觀,伊一定會打擊、嚴厲懲罰。

第10到12節,chit段詩歌是勸勉hiah-ê心有二意ê列國君王,tio̍h用敬畏ê心順服上帝ê旨意,mā就是順服上帝所膏立ê君王。

重新查詢 專卷研經 詩篇系列
錯誤回報,請聯繫comm[@]fhl.net