詩篇 17章1節 到 17章15節   背景資料  上一筆  下一筆
這是一首懇求上帝伸冤ê詩歌。Kah頭前已經讀過ê第四篇、第七篇、第十篇、第十一篇,以及第十三篇等類似。詩人tī詩歌中一再表示家己是清白ê,不應該受tio̍h chit種折磨,hō͘伊ê性命陷入了困境。

第1到2節,chit兩節真清楚表達一個認bat:上帝就是公義ê審判官。原因是上帝絕對bē受tio̍h任何人情ê包圍影響,祂會注意聽受tio̍h冤屈者哭訴ê聲音。

第3到5節,詩人堅信上帝觀察人ê心內,知影人心中ê意念。Chia mā提起「暗夜」,表示he是siōng容易hō͘人失迷、犯罪ê時刻,詩人向上帝表示,就算tī siōng容易犯罪ê暗夜時刻,伊mā是真清楚上帝ê旨意,無違背。因為伊是跟tòe上帝ê旨意行,遵行上帝ê命令做tāi-chì,tòe-tiâu上帝ê腳步,無偏離。

第4節ê所謂「講邪惡ê話」,表示專門講毀謗、做假見證ê話,mā有挑撥是非ê意思,是陷害別人ê一種方式。

第6到9節,詩人祈求上帝垂聽伊ê祈禱,並且祈求上帝「顯示奇妙ê慈愛」。Tī聖經中只要提起上帝「奇妙ê慈愛」,就是teh表示上帝tùi埃及kā以色列人民帶領出來。因為這是無人ē-tàng料想得tio̍h ê事,上帝竟然ē-tàng真輕易tùi當時被看做siōng強猛ê埃及帝國手中,kā siōng脆弱ê以色列人民帶領出來,m̄-nā án-ne,iáu帶走了埃及人ê財富,並且透過紅海淹滅了埃及精銳部隊。

另外一方面,講上帝「奇妙ê慈愛」iáu有另外一個意思,就是上帝所行ê神跡奇事,chiah-ê lóng是人無法度預估、想像會tio̍h ê。像tùi天頂降落嗎哪,tùi石磐出泉水,hō͘紅海ê水分開等等,只要是神跡奇事lóng是teh說明上帝奇妙ê慈愛。詩人祈求上帝用祂行神跡奇事ê方式來保護,án-ne伊ê仇敵就無法度對伊有任何傷害。

第10到12節,這短短三節詩歌,詩人kā敵人描述ê非常徹底,包括1.心腸剛硬、2.隨時chhōe機會傷害人、3.殘害人ê手段ná親像凶猛ê獅一般。

第13到15節,詩人祈求上帝用祂ê「劍」來痛擊仇敵。所謂上帝ê「劍」,就是teh指上帝ê話語(參考希伯來書四:12)。

第14節,充分顯示早期以色列民族非常流行ê觀念:老父ê罪過,kā繼續懲罰到kiáⁿ孫身上。Chia所講ê「今世富足ê人」,是teh指hiah-ê用不正當手路奪取別人財富ê人。如果in kā chit種財富留落來hō͘ in ê kiáⁿ孫,mā ē-sái後代kiáⁿ孫連帶受tio̍h嚴厲懲罰。

第15節,詩人強調若是因為遵行上帝ê旨意而hō͘行為正直,chit種人,隨時lóng thang見tio̍h上帝ê榮耀,就會「滿心快樂」。

重新查詢 專卷研經 詩篇系列
錯誤回報,請聯繫comm[@]fhl.net