詩篇 16章1節 到 16章11節   背景資料  上一筆  下一筆
這是o-ló ê詩歌,表明只要有上帝同在,就是性命siōng大ê喜樂,無其它koh-khah好ê方法。詩人以敬拜上帝ê子民,kah敬拜偶像神明ê人相對比,認為敬拜上帝ê人,性命像似一股泉源,kah chit種人做伙,ná親像飲甘泉一般ê甜美。

第1到2節,因為上帝是性命ê源頭,mā是保護者。因為án-ne,詩人表示tī困境á是苦難中,siōng好ê方法就是「投靠」chit位創造萬物kah賞賜性命ê上帝。Tī chia詩人真清楚表白:上帝就是伊ê「主」,意思是上帝為伊性命ê中心,是伊ê性命ê主人。

第3節,chit節ê「高貴」一詞,意思是teh指「分別出來」。上帝ê子民,就是hō͘揀選出來ê,因為án-ne,就顯得無仝款。身為上帝ê子民,就beh有chit種認bat。使徒保羅寫hō͘腓立比教會ê書信中,就勉勵hit-ê教會信徒應該有「天頂公民」ê觀念(參考腓立比書三:20),因為án-ne應該tī言行舉止上kah一般人有無仝款ê所在。

第4節,chit節tú好kah第3節顛倒;chit節講tio̍h拜偶像ê人,kan-taⁿ會為家己「招惹無窮ê禍患」,原因是棄sak了源頭殼頂帝。Chit位詩人講伊絕對bē跟tòe chit種人。

第5到6節,chit兩節teh回應第2節所講ê,上帝是「一切幸福ê源頭」,chia講上帝是一切「福份ê源頭」。Chit種幸福kah福份,lóng kah上帝帶領以色列人民進入應允之地有關係。換句話講,上帝所賞賜hō͘忠心tī祂ê人,lóng是siōng上等、siōng好ê禮物。

第7到8節,詩人講上帝ná親像一個好牧者,帶領伊行正確ê道路。就算tī「夜間」,魔鬼、撒旦siōng活躍、猖獗ê時刻,因為有上帝ê指引,就會聽tio̍h「良知」tī心中呼喚,免得陷入了魔鬼ê誘惑而離開上帝。

第9節,因為有上帝ê引chhōa,詩人講伊ê肉身kah心靈lóng thang安穩。

第10節是表明一個人如果確實以上帝ê旨意為生活ê準則,chit-ê人必定會得tio̍h永恆ê性命,bē因敗壞而「落陰府」去。

第11節,詩人koh一pái強調有上帝帶領,性命就會充滿「喜樂」,有上帝同在,就會享受「永遠ê幸福」。

重新查詢 專卷研經 詩篇系列
錯誤回報,請聯繫comm[@]fhl.net