Chit首詩歌是teh歌頌上帝為祂ê子民戰勝仇敵，凱旋tńg來後所唱ê詩歌。詩歌內充滿愛國ê熱情，mā充分表明in tùi受困中得tio̍h釋放ê興奮。

第1到4節，「beh向上主唱新歌」，表示用siōng美好ê詩歌來感謝上帝。「新歌」ná親像新收成ê穀物、頭胎生ê家畜動物仝款，是iáu未唱過ê詩歌，tú創做出來ê。

Chit段詩歌mā teh表示上帝就是以色列人民ê君王。「phah鼓彈琴」這lóng是用來慶祝ê樂器，而「舞蹈」是以色列人民siōng熟悉ê慶祝方式。聖經中一再出現以色列人民就是用chit種方式teh感謝o-ló上帝ê救恩（參考出埃及記十五：20，士師記十一：34，撒母耳記下六：14，耶利米書三十一：4）。第4節清楚指出上帝hō͘以色列人民phah敗敵人。

第5到9節，tī慶祝歌舞聲中，有kóa人會扮演武士ê角色，因為án-ne，in「手執雙刃ê利劍」，表示in tī前線相戰ê時，勇武地刣敵「報仇雪恥」，並且俘虜了敵人ê君王kah首領。Chit種詩歌其實mā是in心中ê一種期待：有án-ne ê一工，in ê國家會koh一pái恢復像大衛王朝時代hit種，hō͘附近國家lóng來降服tī in ê統治之下。