Tùi chit首詩ê標題thang清楚看出是「Pôaⁿ過節之歌」，是tī節期ê第八工中吟唱。內容mā真清楚teh歌頌上帝帶領以色列人民行出埃及ê偉大神能。Chit首詩mā hông稱做「埃及ê o-ló詩」 （Egyptian Hallel）。

第1到2節，chia用「猶大」kah「以色列」，lóng是表示「雅各ê kiáⁿ孫」ê意思。第2節用「國」一字，表示這是先知撒母耳時代膏立掃羅做王了後ê事，以色列民族正式開始有君王制度出現，成做一個國家ê形式。

第3到6節，這第3節所講ê「紅海一看見就奔逃；約旦河mā倒流」，thang參考出埃及記第十四章19到24節，以及約書亞第三章14到16 節等等，表明ê是tùi出埃及到進入迦南地。第4節提起「群山像公羊跳躍；丘陵mā像綿羊蹦跳」，這是因為上帝出現chiah會有ê景象。聖經講每排出帝出現ê時，kui個山嶺lóng會因為聽tio̍h祂出現ê聲音而震撼、搖動（參考出埃及記十九：16—18，詩篇廿九：6、六十八：8）。M̄-nā án-ne，連石磐lóng會「湧出泉水」，這tī以色列人民漂流tī曠野時代就bat出現（參考出埃及記十七：5—6，民數記二十：8—11，申命記八：15），表明上帝創造ê萬物，lóng會聽從上帝ê命令而行動。