第一一三篇開始到一一八篇，lóng是Pôaⁿ過節暗頓ê時必唱ê詩歌。這六篇詩hông稱做「頌讚詩集」。這幾首詩歌常出現ê詩句是「tio̍h o-ló上主」。其實chit段詩歌m̄-nā是tī Pôaⁿ過節唱，mā tī五旬節、Tòa棚節、奉獻節等等節期ê時chūn唱。通常是tī Pôaⁿ過節ê暗頓ê時唱第一一三到一一四篇，飯後唱一一五到一一八篇。馬可福音第十四章26節講：「in唱了一首詩，就出來，到橄欖山去。」就是唱詩篇第一一五到一一八篇中ê一篇。

這是一首頌讚上帝ê詩歌。主要teh o-ló上帝ê威嚴、榮耀，以及祂對卑微、窮苦ê人ê眷顧、疼惜，ná親像tī第一三八篇6節a句所講ê：「上主至尊無上，m̄-koh伊看顧卑微ê人。」上帝雖然非常ê尊貴、威嚴、至上無比ê榮耀，m̄-koh祂會垂憐hiah-ê tī卑微、困苦中ê子民。猶太人tī重要節期中lóng會吟唱chit首詩歌。

第1到4節，chia一開始就講tio̍h「上主ê奴僕」，tī以色列人民ê觀念中，in就是上帝揀選ê「奴僕」（參考以賽亞書四十一：8、四十三：10、四十四：1、21、四十九：3）。另外一方面，所有ê君王、領袖等，lóng是上帝ê奴僕，祭司、先知mā是。因為án-ne，當帶領全會眾聚會ê人講「上主ê奴僕ah，tio̍h頌讚」chit句ê時，等於所有ê會眾lóng tio̍h回應第2節，講上帝ê名「應受頌讚」，而且是beh頌讚到「永遠」。然後第3節啟者koh宣告講「tùi日出到日落之地」，續落來回應ê群眾tio̍h講「上主ê名應受頌讚」，第4節mā是仝款ê方式。

第5到9節，chit節講出chit位偉大ê上帝，是jōa-ni̍h-á關心卑微困苦ê子民。第6節ê「觀看諸天kah大地」，表明上帝關心祂所創造ê天地萬物。然續後落來第7到9節，詩人teh表達一個基本觀念：上帝m̄是離人間真遙遠，祂m̄是高高在上，不聞人間苦難ê聲音，m̄是，祂是關心至極。特別ê所在是上帝會tùi「糞土中救拔貧乏人」，chit句話表明ê是社會中貧乏人往往被當做無用ê對象，ná親像糞土般ê hō͘人輕視、隔離出來。M̄-koh上帝卻beh提拔chit種人，hō͘ in高昇而且尊貴ná親像王子一般。仝款ê，tī以色列人ê文化中，無法度生育ê cha-bó͘人是hō͘人看bē起、輕視ê對象，mā是cha-bó͘人性命中siōng大ê恥辱，m̄-koh上帝卻beh hō͘ chit種cha-bó͘人「tī厝受敬重」。注意chit句「賜伊kiáⁿ」，有兩種意義：一是看起來無可能有娠生kiáⁿ ê人，ē-tàng有娠生育。另外一種表示充滿tio̍h性命ê活力，thang幫助真chē困苦ê人得tio̍h安慰。