詩篇 11章1節 到 11章7節   背景資料  上一筆  下一筆
Chit首詩ê作者表明雖然身陷危險中,mā無放棄對上帝堅定ê信心。

第1到3節,詩歌ê開始,詩人就講伊「以上主為避難所」。這是以色列人民進入迦南地了後,設立六座城市作為避難城(參考民數記三十五:13—14),庇護hiah-ê性命受tio̍h威脅ê人。詩人kā chit種觀念引進chit首詩歌中,因為án-ne,強調只有上帝chiah是伊性命ê「避難所」。

M̄-nā án-ne,詩人真清楚向上帝表示:若是無上帝ê庇護,即使親像飛鳥飛入深山bih起來,mā是無用。因為真正安全m̄是bih起來,卻是有公義ê社會準則。公義chiah是建構一個社會穩定ê「根基」。

第4到7節,chit段詩歌講上帝ê「寶座設tī天頂」。天,是上帝ê殿宇,上帝tùi天頂俯視地上ê人類,並且會對每一個世人提出審判。M̄-koh上帝mā khiā起tī土腳ê聖殿中,祂m̄-nā tī天頂,mātī土腳。祂「徹底了解」世人所做ê一切,ná親像詩篇第廿六篇2節、詩篇第一三九篇1到2節等等詩人所講ê。聖經一再kā咱講,上帝清楚知影人心中ê意念(參考申命記三十一:21,箴言廿一:12)。上帝是公義ê上帝,因為án-ne,祂喜愛行為正直ê人。

第6節,chit節kah創世記第十九章23到29節經文描述所多瑪城kah蛾摩拉城之災難仝款。因為罪惡盈滿,上帝tùi天頂降落硫磺大火懲罰這兩城。

第7節,「正直ê人ē-tàng朝見伊」,chit句話thang參考馬太福音第五章8節:「心肝清氣ê 人實在有福氣,因為in 會見tio̍h 上帝!(全民版)」


重新查詢 專卷研經 詩篇系列
錯誤回報,請聯繫comm[@]fhl.net