詩篇 106章1節 到 106章48節   背景資料  上一筆  下一筆
Chit首詩篇mā kah第七十八篇、第一○五篇仝款,lóng是teh回溯(sok)過去ê歷史,因為án-ne,被稱做「史詩」。Tī第一○五篇ê詩篇是用「約」做主題,描述上帝án怎揀選亞伯拉罕、以撒、雅各成做伊ê奴僕(族長),然後帶領in進入埃及繁延下一代,茁壯kui個民族。然後koh帶領in離開埃及,經過曠野長到四十年漂流ê歲月,了後帶領in進入應允ê迦南地。chit-má chit首詩篇則以「犯罪」、「悔改」做主軸,描述上帝ê仁慈kah無變ê疼,疼惜祂所揀選ê以色列人民。Chit首詩篇kā以色列人民如何在曠野中犯罪ê事實記錄了落來,mā記落來了in懺悔所犯ê罪過。第一○五篇ê詩歌是kā重點放teh講述上帝用祂豐富ê慈愛帶領以色列人民,這慈愛顯明上帝tī立「約」上ê特性。Á這第一○六篇ê詩歌,則偏重tī人犯罪了後,上帝iáu是仝款施出憐憫ê疼,拯救祂揀選ê以色列子民,因為祂是一位記念「約」ê上帝,這是因為祂ê「慈愛」ê緣故。

第1到5節,這是chit首詩篇ê引言,以o-ló kah祈求開始。

Tī第1節開始ê chit句「tio̍h o-ló上主」,kah tī最後一節ê最後一句「tio̍h o-ló上主」仝款,其希伯來文是用「哈利路亞」,tī詩篇第一一一篇、第一一二篇、第一三五篇、第一四六到一五○篇等,起頭第一句lóng是用「tio̍h o-ló上主」(哈利路亞)。Tī chit段詩歌中,詩人koh一pái強調遵守上帝命令、伸張正義ê重要性。因為上帝ê拯救,就是teh顯明祂ê公義。

第2節詩人真清楚表達出上帝所做ê大事,m̄是用人ê語言ē-tàng講述、歌頌得清楚。Mā就是太偉大了,大大超過人ê語彙所ē-tàng表達。

第4到5節,是祈求ê詩歌,詩人祈求上帝ē-tàng hō͘伊「分享」、「會記得」、「拯救」伊,顯然地,詩人感受tio̍h上帝kah祂ê子民之間已經有距離。

第6到12節,tùi第6節,詩人用過紅海ê例來說明以色列人民tùi hit時開始就犯罪。原因是in一tú-tio̍h紅海就埋怨摩西帶領in離開埃及,竟然是beh hō͘ in死tī紅海(參考出埃及記十四:11—12)。M̄-koh上帝真有耐心,祂無受氣,卻是伸手分開紅海ê水,乾旱了河床,hō͘以色列人民安然地行過紅海,因為án-ne,以色列人民就歌頌上帝拯救ê大愛。

第13到18節,chit段詩歌ê背景kah民數記第十六章記載可拉、大坍、亞比蘭ê叛變記事有關。Chia並無提起可拉mā牽涉tī其中,可能是可拉ê眾kiáⁿ並無tī chit事件中往生(參考民數記廿六:11),而且後來伊ê kiáⁿ孫lóng tī聖殿參與服事工作。Chit段詩歌mā提起以色列人民ê祖先tī曠野就一再對上帝怨聲連連。上帝bat滿足in ê需要,m̄-koh mā降「破病tī in中間」。

第19到23節,chit段詩歌kah出埃及記第三十二章1到35節、申命記第九章8到21節等等有密切關係。會用「何烈山」,這顯然是根據申命記ê傳統(申命記第三十三章2節例外),chit-ê名稱tī出埃及記、民數記lóng是用西奈山。以色列人民鑄造金牛來代表拯救in脫離埃及奴役ê耶和華上帝,致使上帝大大不滿。表示in chiah tī曠野漂流ê時代,就已經bē記得拯救in ê真實上帝。第22節ê「含」是teh指埃及。原本上帝是非常受氣,想beh kā以色列人民hō͘ in毀滅,m̄-koh摩西為以色列人民向上帝哀求,懇求上帝kā伊ê名tùi名冊上刪除,用以換來上帝憐憫、赦免以色列人民。後來上帝只有kā hiah-ê參與拜偶像神明ê以色列人民用瘟疫除掉。

第24到27節,chit段詩歌kah民數記第十三到十四節有關,是摩西差派每一個支族ê代表,去窺探迦南地,結果去窺探tńg來ê探á,只有迦勒kah約書亞兩人同意beh繼續ǹg向上帝應允ê迦南地去,其餘十個支派ê代表lóng極力反對。原因是in認為迦南地ê人碩壯高大,根本就無力量thang進入,只有ē-tàng當in ê奴隸而已。第26到27節ê警語,thang參考利未記第廿六章33節,申命記第廿八章64節,chiah-ê警告後來lóng tī詩人ê時代應驗ā。

第28到31節,chit段詩歌thang參考民數記第廿五章,敘述有關摩押人誘惑以色列人民tī比珥棄sak上帝,去拜偶像神明ê事件,結果koh一pái引起上帝用瘟疫嚴厲懲罰in,佳哉有一位祭司亞倫ê孫á非尼哈,因為看見人民teh kā摩押cha-bó͘-gín-á行淫,犯無應該做ê事,伊kā做hit-ê事ê人刣死,chiah阻止了禍患嚴重蔓延落去。

第32到33節,chit兩節詩歌kah民數記第二十章1到14節ê記事有關。因為摩西被以色列人民為tio̍h缺水ê事煩到無法度忍受,因為án-ne mā對上帝出怨言,結果上帝決定連摩西mā無法度進入應允之地。

第34到39節,chit段詩歌是記載以色列人民進入迦南地了後,m̄-nā無kah迦南人隔離出來,反tńg是kah in通婚,而且跟tòe in ê風俗去拜偶像神明,koh khah慘ê,是國王iáu殺害無辜人民,並且kā家己ê kiáⁿ獻hō͘偶像神明(參考列王記下十六:3、十七:17、廿一:6)。In用chit種方式背叛了上帝,hō͘上帝非常痛心。

第40到46節,tùi第43節thang看出這是士師ê背景,in kúi-nā pái被外族人攻擊,然後就Tī痛苦中悔改,並請求上帝ê救助,就án-ne上帝一pái koh一pái地差派士師救助in。上帝會án-ne一而再、再而三伸手救助in,是因為上帝信守祂kah以色列人民所立ê約,mā用祂hit-ê無比ê疼,希望ē-tàng轉tńg來in悖逆ê心。第46節指波斯帝國興起,消滅了巴比倫帝國,塞魯士王決定釋放in tńg去故鄉重建家園。

第47節,詩人祈求上帝帶領被俘虜四散去做奴隸ê以色列人民tńg去故鄉。續落來呼籲所有以色列人民頌讚上帝ê恩典作結尾。

第48節,是詩篇第四集ê結束,kah第一到三段ê結尾lóng仝款,表示chit位慈悲ê上帝應該受tio̍h當有ê尊崇。

重新查詢 專卷研經 詩篇系列
錯誤回報,請聯繫comm[@]fhl.net