詩篇 105章1節 到 105章45節   背景資料  上一筆  下一筆
Chit首詩歌kah第一○六篇有密切關係;只是chit首詩偏重tī kah上帝之間所立ê約ê關係,kah一○六篇注重tī懺悔犯罪ê焦點上無仝款。Ná親像第七十八篇仝款,這三篇詩篇lóng是屬tī「史詩」。Tī這篇詩篇中,作者採用了亞伯拉罕hō͘ 上帝揀選,直到出埃及記第十七章等篇幅ê背景,講述上帝揀選以色列人民、立約ê資料。

Chit篇詩歌ê第1到15節,mā thang參考歷代志上第十六章8到22節ê詩歌。

第1到6節,chit段詩歌一再呼籲「亞伯拉罕ê kiáⁿ孫」,kah「雅各ê kiáⁿ孫」beh向萬國宣揚上帝奇妙ê作為。Tio̍h注意ê是,當聖經講亞伯拉罕kiáⁿ孫ê時,表示iáu包括以實瑪利ê 眾kiáⁿ孫。Á講雅各ê kiáⁿ孫,是teh指十二支派。所謂「奇妙ê事」則kah上帝ê救恩有密切關係,而拯救是kah立約、揀選有關。Mā thang án-ne講,kui個以色列民族ê歷史經歷,就是tī kah上帝之間ê「約」中經過ê。Á這「約」是上帝kah in ê祖先亞伯拉罕所立ê,上帝一直遵守tio̍h「約」teh帶領以色列民族。

第7到11節,chit段經文開始提起上帝kah亞伯拉罕、以撒、雅各等父kiáⁿ孫等立「約」,並強調chit-ê約會延續到後代kiáⁿ孫「達到千代」lóng永遠常存,特別是tī第8節詩人koh一pái提醒以色列人民:上帝是信守約ê上帝,而且chit-ê約是永遠ê,會延續到千代kiáⁿ孫身上。Tio̍h注意ê是第11節,提起約ê內容包括上帝beh kā「迦南地賜hō͘」亞伯拉罕kah伊ê kiáⁿ孫作為khiā起ê土地(產業),chit件事thang看創世記第十三章15、17節。

第12到15節,chit段詩歌講出出埃及進入曠野ê背景,以色列民族確實是「人數有限」ê小國小族(參考申命記七:7—8)。特別注意是第15節提起「揀選ê奴僕」、「我ê先知」,這兩詞意義仝款,lóng是teh指君王ê意思。Á君王表示ê是「受膏者」、「領袖」,mā thang用來當做「族長」解釋。

第16到22節,chit段詩歌ê背景是創世記第三十七到四十五章(第三十八章除外),記載約瑟hō͘伊ê兄弟出賣去埃及做奴隸,m̄-koh上帝有奇妙ê手,祂kah約瑟同在,賞賜hō͘約瑟有智慧知影怎樣解開夢ê啟示,tùi án-ne得tio̍h埃及法老王ê賞賜,並賦予伊當首相掌管全埃及國政。人ê pháiⁿ念頭,上帝有美好ê旨意。

第23到36節,chit段詩歌ê背景是創世記第四十六章到出埃及記第十二章,談及雅各知影siōng疼ê kiáⁿ約瑟當上埃及宰相,並且要求伊帶全部家人進入埃及躲避嚴重ê饑荒,以及雅各一家人進入埃及後,tī埃及過富裕ê生活,並且繁延下代kiáⁿ孫眾chē,致使埃及人恐慌kah不安。就án-ne有新國王改變了國家政策,開始迫害雅各ê kiáⁿ孫以色列人民。

上帝差派摩西kah亞倫帶領以色列人民行出埃及,透過真chē神跡奇事,最後安然地tùi埃及離開。為tio̍h beh帶領以色列人出埃及,上帝行了真chē神跡,chiah-ê神跡奇事記載tī出埃及記第七到十一章,最後一個神跡,就是kā埃及境內所有ê大kiáⁿ lóng「刣死了」,mā同時刣滅了所有「頭胎」ê動物cheng-seⁿ。Án-ne,埃及國王chiah只好放以色列人民離開埃及。

第37到42節,chit段詩歌ê背景就是出埃及記第十三章以後,以色列人民離開埃及了後,進入曠野漂流ê經過。特別描述tī曠野漂流期間,因為無食物,上帝「tùi天頂降糧食(嗎哪)餵飽in」,mā差「鵪鶉」hō͘ in有肉食,並且tùi「石磐,hō͘泉水湧出」,解除了in tī漂流曠野ê時所tú-tio̍h ê飢渴。M̄-nā án-ne,上帝iáu用「雲彩」遮日時炎陽ê暴曝,「夜間用火照亮in」,hō͘ in tī日夜溫差極大ê曠野,也ē-tàng安然經過。Chiah-ê lóng是上帝奇異ê恩典。

第43到45節,chit段詩歌是Chit篇ê結尾,詩人用簡單ê進入迦南「異族ê土地賜hō͘」以色列人民作結尾,希望以色列人民會真正遵守上帝hō͘ in ê律法誡命。這thang tùi約書亞記第廿四章看出,以色列人民teh帶領in進入迦南應允之地ê約書亞面前chiù-chōa,表示in一定會遵守上帝hō͘ in ê律法誡命。

重新查詢 專卷研經 詩篇系列
錯誤回報,請聯繫comm[@]fhl.net