民數記 25章1節 到 25章5節   背景資料  上一筆  下一筆
若是kā chit章記述ê事件,對照第三十一章前段之敘述來看,就會發見以色列人民棄sak上帝ê事件,是kah巴蘭有密切關係。其實,chit章是由兩個傳承ê資料合編做伙;一是第1到5 節,二是第6到18節。前段是講以色列人民tī什亭谷紮營ê時chūn,參與摩押人敬拜in ê神明kah比珥ê所在神明巴力,因為án-ne帶來一個嚴重後果,就是真chē以色列人民ê領袖喪生。參與敬拜,表示承認in ê神明,這是相當嚴重ê背棄誡命。後段描述有以色列人民犯淫亂罪,致使引發瘟疫á害死真chē以色列人民,後來被祭司以利亞撒ê kiáⁿ非尼哈看見犯淫亂罪ê人,並刣死ná人才致使瘟疫病情停止。

Chit章mā teh說明以色列人民beh進入迦南地chìn前,一定tio̍h非常清楚家己是「聖潔ê子民」,不准有任何淫亂、不潔ê行為。作者khah強調ê是:以色列人民因為敬拜摩押神明,引起了上帝ê憤怒,致使瘟疫蔓延tī人民中間,chit時ê以色列人民m̄-nā無警醒,iáu kah外邦ê cha-bó͘-gín-á進行淫亂ê宗教行為,chiah有非尼哈刣死犯罪者ê行動。Á這行動teh表明一件事:除去罪惡,tńg來到聖潔ê人民身分。

Chit段是描述以色列人民犯了拜偶像神明ê淫亂罪,摩西tī上帝指示下處決了hiah-ê帶頭ê首領。

第1節,chit節講以色列人民紮營tī「什亭谷」,這是設tī耶利哥城對面ê所在,約書亞tùi chia差派兩個探子進入來迦南地去進行「祕密偵察」,看hit-ê城ê虛實(參考約書亞記二:1)。Tī chia有人kah「摩押cha-bó͘人行淫」,chiah-ê cha-bó͘人應該是屬tī廟宇ê妓女。

第2到3節,tùi chia就清楚第1節所提起ê kah摩押cha-bó͘-gín-á行淫ê原因,是tī「比珥」拜當地巴力神明祭典,tī祭祀慶典後,參與筵席並kah廟妓行淫,因為chit項事件引發上帝極大ê忿怒。

第1到5節,上帝指示摩西一定tio̍h嚴懲處死chiah-ê以色列人民ê領袖,因為若無án-ne,真可能無法度約束以色列人民對上帝心存忠實,成做聖潔子民以進入迦南應允之地。Chit種情形就ná親像在出埃及記第三十二章,以色列人民背叛上帝,鑄造並拜金牛,引發上帝忿怒á由利未族人出手懲罰hiah-ê帶頭拜金牛ê人民仝款。

重新查詢 專卷研經 民數記系列
錯誤回報,請聯繫comm[@]fhl.net