民數記 16章1節 到 16章15節   背景資料  上一筆  下一筆
Chit章是由兩組事件編輯而成ê,lóng是記載有關以色列人民對摩西ê不滿。一則記載帶頭反抗摩西ê是利未人以斯哈ê kiáⁿ可拉,另外一組是大坍kah亞比蘭,比勒ê kiáⁿ安,以及另外兩百五十個有名望ê領袖,in公開叛變摩西kah亞倫ê帶領。結果引起上帝極大ê忿怒,連帶ê為以色列人民帶來瘟疫ê懲罰,結果死亡ê人數相當chē。

Chit段經文講述摩西帶領以色列人民tī曠野漂流ê過程中,tú-tio̍h真chē波折,除了來自以色列人民每tú-tio̍h困難就埋怨in外,就是來自家己厝內部ê不滿。前有家己ê阿姊美莉安kah兄哥亞倫對伊ê不滿,chit-má是利未支族哥轄家族ê人背叛。Chit種否定摩西帶領ê權威,mā bat發生tī第十四章4節。

第1到3節,chia提起帶頭背叛摩西ê帶領,就是哥轄家族ê 可拉,kah伊仝伴ê有呂便支派來便利押ê兩個kiáⁿ大坍kah亞比蘭,以及比勒ê kiáⁿ安,另外iáu有兩百五十位有淡薄á有名望ê領袖。In成群結隊地來到摩西kah亞倫面前,公開挑戰in ê權威。In背叛ê原因,根據第9到11節ê記載,是kah摩西制訂出來ê制度,就是亞倫家族做祭司,á利未人則幫助祭司者有關。Tùi án-ne認為摩西kah亞倫是「高抬家己,高過上主ê會眾」。其實,摩西所做ê lóng是照上帝所命令。因為án-ne,若是in對chit項制度不滿,mā m̄是摩西ê問題,卻是上帝ê旨意。Á想beh叛變者,lóng會用真堂皇ê理由,ná親像可拉tī chia所講ê「全體會眾lóng是屬tī上主ê」,而且強調上帝kah in同在。

第4到8節,可拉所代表ê,並m̄是個人,卻是有一陣利未人相挺。因為án-ne,摩西ài in隔工帶tio̍h香爐,內面裝tio̍h火炭kah香,直接到上帝ê祭壇前,摩西用chit種方式beh證明,到底上帝是揀選甚麼人?照利未記第十章1到2節ê記載,亞倫ê kiáⁿ拿答kah亞比戶,就是因為無按照規矩進入祭壇,the̍h-tio̍h香爐聖滿了火,燒了凡俗ê香獻hō͘上帝,結果就死tī祭壇邊。Chit-má摩西ài可拉mā帶chiah-ê物件,看家己是m̄是hō͘ 上帝揀選ê祭司。

第9到11節,tùi chit段經文thang明明確知影可拉認為in利未族人ê地位比亞倫ê家族當祭司khah低。In ê看法牽涉tio̍h對tī聖幕祭典各項禮儀,扮演ê角色輕重ê認知,認為利未人並無比亞倫ê kiáⁿ孫差,ē-sái講是tī以色列人民中ê地位卻比祭司階層ê人低。M̄-koh摩西認為chit種觀念是錯誤 ê,hō͘ 上帝揀選出來參與侍奉祭祀敬拜禮儀,無論是擔任toh種工作,lóng是一種榮譽,應該看做是siōng重要ê大事。因為án-ne,摩西kā in譴責chit種行為等於是背叛上帝,原因是摩西並m̄是制度ê規劃者,伊全部lóng是照上帝吩咐ê去做。

第12到15節,呂便家族來便利押ê kiáⁿ大坍kah亞比蘭chit兩個人tī chia對摩西所講,其實真清楚,就是拒絕接受摩西ê領導。摩西ài in mā到聖幕ê祭壇去,in就公開表示拒絕。並且認為摩西帶領in離開肥ê埃及,進入甚麼lóng無ê曠野。摩西聽了後大為受氣,伊向上帝祈求, mài接受chit家族獻祭ê祭品。同時表明家己並無tùi獻祭ê物件中領受過in奉獻ê祭品。

重新查詢 專卷研經 民數記系列
錯誤回報,請聯繫comm[@]fhl.net