民數記 13章25節 到 13章33節   背景資料  上一筆  下一筆
Chia記載chiah-ê探子tńg來後,in向摩西、亞倫,kah全體以色列人民報告迦南地勘查後ê實情,mā同時強烈主張mài入去迦南地。Tī所有chiah-ê探子中,除了迦勒kah約書亞兩人主張應該tio̍h進入迦南地外,其餘十個lóng表示反對。

第25到29節,in進入迦南地,共計tī內面勘查長到「四十工」,這表示勘查到非常詳細ê意思。In kā帶tńg來ê果子hō͘大家看,並且證實迦南地確實是一個「流奶kah蜜ê肥土地」。In同時強調當地居民「真強悍」,而且有巨人亞衲ê kiáⁿ孫。In mā提起六個族群名,包括有亞瑪力人、赫人、耶布斯人、亞摩利人,kah迦南人等。Á in ê城牆是「koh大koh堅固」。單單由城牆ê高大來看,就知影當地ê文化、國力lóng是真進步ê,因為城牆表示建築ê科技,kah文化ê記號。Án-ne,想beh進入佔有hi̍t 所在,是連想lóng m̄免想à。

第30節,猶大支派ê代表迦勒,除了安撫chiah-ê表示悲觀ê代表外,伊iáu是堅持主張,chit-má就應該上去佔領迦南地,並且強調以色列人民有夠額力量。

第31到33節,m̄-koh chit群代表iáu-koh有真悲觀ê想法,認為無可能進入而且佔有迦南地。為tio̍h beh阻止chit項進入迦南地ê計畫,這十個族群代表就到以色列人民中間去散佈而且誇大一kóa情景,he就是認為當地ê物產無夠飼當地人,其實,一截葡萄枝需要兩個人扛,就表示物產豐富,夠額有chhun。In甚至描寫以色列人民比起巨人亞衲ê kiáⁿ孫,有ná草蜢á仝款ê渺小。Chit種傳言確實是影響tio̍h民心ê安定。因為in就是為tio̍h beh進入迦南地á離開埃及,若是進入迦南地mā仝款成做當地人民ê奴隸,以色列人民一定感覺相當ê鬱卒。

重新查詢 專卷研經 民數記系列
錯誤回報,請聯繫comm[@]fhl.net