民數記 11章4節 到 11章23節   背景資料  上一筆  下一筆
以色列人民向摩西抱怨無好ê物件食,這並m̄是第一pái,tī in tú出埃及ê時chūn,因為tú-tio̍h缺水,就抱怨(參考出埃及記十五:22—25);然後tú-tio̍h缺乏糧食,mā是抱怨(參考出埃及記十六:1—5)。曠野,絕對m̄是一條易行ê道路,ná親像奔走天國之路仝款,耶穌講he是一條「窄門」之道,ē-tàng chhōe得tio̍h ê人無chē(參考馬太福音七:13—14)。因為曠野生存無容易,因為án-ne,thang了解上帝ài摩西kā以色列人民帶出埃及後,就進入來曠野之地,就是beh kā in tī埃及四百gōa年ê心思意念全部洗滌清氣。Beh hō͘ in知影,人生存m̄是óa靠食物,mā m̄是óa靠人ê氣力,á是beh óa靠上帝所講chiah行(參考申命記八:3)。

第4到6節,chia特別強調是由外族人事(tāi)先發怨言ê。Chiah-ê外族人是當以色列人出埃及ê時,緊跟tòe以色列人民離開埃及(參考出埃及記十二:38)。Chiah-ê人可能是奴隸,á是雇工,in看tio̍h以色列人逃出埃及,mā趁機逃走。M̄-koh chit-má in卻tī以色列人民中成做煽動者。講in想beh食肉。Á tùi第5節ē-tàng看出,埃及是一個物產豐富ê國家,m̄-koh,曠野則寸草不生之地,上百萬ê人tio̍h食、lim,這卻m̄是一件容易ê事。以色列人民為tio̍h想beh食肉,對摩西講in ta̍k工食嗎哪已經食到腳無力à。

第7到9節,chit三節紹介嗎哪。Tī出埃及記第十六章14節mā有說明嗎哪是露水結成「一層薄薄像霜一類ê物件」。可能是因為ta̍k工三餐lóng食chit種物件,chiah hō͘ in感覺無味。

第10到15節,摩西聽見以色列人民án-ne發tiâu騷,引起上帝忿怒,伊當然會艱苦心。因為以色列人民直接向伊發怒,伊mā有人ê軟弱kah限制,ta̍k工聽抱怨ê聲音,即使是真有耐心ê人mā會受不了,莫怪伊會對上帝講,人民chit種抱怨,等於是一種折磨(第15節)。伊真清楚向上帝表示無法度忍受以色列人民繼續án-ne抱怨落去,尤其是in想beh食肉,這koh khah是超過伊ê能力之外。因為án-ne,摩西向上帝祈求「死」。這mā是先知以利亞、耶利米、約拿等共有ê念頭。

第16到20節,chit段經文是上帝解決摩西tú-tio̍h ê困境。

上帝ài摩西去chhōe「七十個受人尊敬ê長老」,這kah出埃及記第十八章記載摩西ê丈人葉特羅提議是相近ê,伊ê丈人kā摩西講, mài家己一個人擔當所有ê重大事務,thang kā它委託人民中ê領袖。因為án-ne,摩西接受建議後,kā人民組織起來,並且選出「能幹ê人」來幫助料理人民ê事。Chiah-ê人就是chia所講ê長老。不過tī chia真無仝款ê所在,是這七十位長老lóng被帶到上帝面前,上帝ài kā賜hō͘摩西ê靈「分hō͘ in」,hō͘ in ē-tàng幫助摩西「分擔責任」。Chia mā是仝款,上帝不ài摩西家己「一個人挑這重擔」。

第18到20節,上帝決定beh提供肉食品hō͘以色列人民食到無法度消化,用chit種方式來表示上帝ê懲罰。上帝提供ê肉品,是鵪鶉。Chit種鳥tī春天大批飛過地中海,tī早秋向南折tńg來,tī途中不時被討海人á是農人捕獲。詩篇ê詩人描述chit件神跡ê時講:「祂tùi 天起東風,用祂ê 權能chhōa 南風來。祂降落肉tī in 中間,chē kah 親像土沙粉,koh 有飛鳥chē kah 親像海沙,落tī in ê 營中,tī in tòa ê 布棚ê 四箍圍。 In 就食到飽飽;祂照 in 所意愛 ê hō͘ in。(全民版)」(詩篇七十八:26—29)

第21到23節,chia mā說明摩西雖然手中bat行過kúi-nā-pái神跡奇事,甚至kā紅海分開過,tùi石磐中出泉水,mā親目看tio̍h嗎哪ê神跡,m̄-koh卻無法度明白上帝是無所不能ê神。因為án-ne,當伊聽tio̍h上帝beh賞賜hō͘以色列人民食一個月ê肉ê時,伊認為he是無可能ê事。因為單單離開埃及ê以色列cha-po͘人就有六十萬gōa人,若是koh加上婦女,以及未滿二十歲以上ê gín-á,kah外族人等lóng加做伙,ná數目koh khah是驚人。M̄-koh上帝beh施行ê chit-ê神跡,tú好說明一件非常重要ê信仰認知:tī上帝手中,無無法度成就ê事。祂回答摩西講:「我ê能力有限?你就beh看見我講kám bē實現!」基督教信仰看上帝,是一個無所不能ê上帝(參考創世記十八:14,約伯記四十二:2,馬可福音十:27)。

重新查詢 專卷研經 民數記系列
錯誤回報,請聯繫comm[@]fhl.net