Chit段資料真可能是後來加入ê。摩西懇求伊êbó͘ 舅何巴作嚮導，幫助伊帶領以色列人民行chit段漫長ê曠野旅途。

第29節，何巴，tī chia講是米甸人，tī士師記第一章16節講是基尼人。這兩族ê人lóng khiā起tī曠野，遊牧民族，而且有bē少人相混雜khiā起做伙。In對tī煉銅ê技術真有心得，後來以色列人民因為得罪上帝，結果有真chē人因為án-ne被毒蛇咬死，上帝ài摩西鑄造銅蛇掛tī柱á頂，hō͘以色列人民看見銅蛇á得痊癒（參考民數記廿一：4—9）。Á這銅蛇真可能就是出tī基尼人ê手。

Tī頭前講有雲彩當做in拔營啟動á是停止紮營ê記號，m̄-koh，beh行向tó一個所在，是需要對曠野熟悉ê人帶路。摩西chhōe-tio̍h對這方面相當有經驗ê「小舅子」來幫忙，mā thang看出伊ê用心kah智慧。

第30到32節，何巴是tī曠野出世、長大ê人，對曠野環境甚熟，因為án-ne，有伊帶路會koh khah清楚tī tó一個所在紮營koh khah妥當。