是有關以色列人民第一pái清點人口──戶口普查。時間是tī in出埃及後ê第十三個月。戶口普查有一個重要ê用意，就是開始tio̍h組成軍隊（第3、20節）。 Mā就是講，以色列人tī曠野經過chit段時間了後，beh開始有家己ê軍隊，準備用戰爭ê手段進入迦南地。為tio̍h beh組成軍隊，戶口普查以外，iáu有koh khah嚴密ê組織，因為án-ne，beh tùi各族中選出代表。Chia mā有koh khah明確ê人數，總人口是603,550人。

Chia真清楚講出上帝chit-pái對摩西發出命令ê時間，主要是teh執行一項需要記錄落來ê重大事件，就是普查人口數目。

Chit節講上帝對摩西下達命令ê地點，是tī西奈曠野ê聖幕裡。Koh講，時間是tī in離開埃及進入曠野後ê「第二年二月初一」。有chiah-ni̍h清楚ê時間kah地點，表示這是確實ê史實記錄。

第2到3節，為tio̍h beh hō͘調查ê工作非常徹底，因為án-ne是「一宗族一宗族、一家族一家族ê調查」，對象是「Kā二十歲以上ē-tàng作戰ê cha-po͘人名單列出來」，chit句話一再出現（參考第3、20、22、24節），除了表示重要外，mā teh表示以色列人民beh開始進行來預防備曠野民族、部落來打擊ê訓練工作，另外一方面，未來進入迦南地ê時，必定會tú-tio̍h拗蠻強烈ê抵抗，chit時，受過訓練ê軍事武器是必要ê裝備。

第4節，chit項工作因為真繁重，因為án-ne，tio̍h tùi每一個支派中選人來幫忙chit件普查人口ê工作。