禁食，這原本是真嚴肅ê一項信仰行為，是人teh表示謙卑、懺悔、悲傷ê態度。Tī舊約摩西時代規定每年贖罪節ê時chūn，全國人民lóng tio̍h禁食（參考利未記十六：29—34）。主前586年以色列人民亡國tī巴比倫帝國後，in增加禁食ê次數到四次（參考撒迦利亞八：19）。到耶穌ê時代，有敬虔派ê猶太人每一個禮拜禁食兩pái（參考路加十八：12）。禁食，應該是人內心ê一種省思，m̄是用來比較個人信仰ê層次高低á是好bái ê方式（參考馬太六：16—18）。

耶穌tī第15節用婚姻ê關係譬喻。猶太人ê婚宴長到七工，he是件大事，甚至tú結婚ê cha-po͘人，一年內lóng thang免除公務kah兵役（參考申命記廿四：5）。耶穌tī-chia隱喻家己就是新郎，伊當teh辦婚宴，當然m̄免禁食。

「日子teh beh到」，這是teh指審判ê時刻to̍h是teh beh來臨，新郎會hō͘掠去，表示伊受難了後，會有大ê迫害出現，hit時chūn，哀傷ê時刻mā會來臨，hit時就一定tio̍h禁食。

第16到17節是猶太人流行ê諺語。古時chūn ê布因為需要先浸過水了後chiah ē-tàng做成衫褲。新布，是teh指iáu未浸過水ê，用新布來補舊衫褲，一定會ná補ná大孔。裝酒ê皮袋mā是án-ne。

「Ài kā新酒裝tī新皮袋裡；án-ne，兩項lóng會保全。」馬太福音記載耶穌chit句話，真清楚teh說明舊ê kah新ê tio̍h分明，án-ne兩種lóng會保存落來。