第14節，chit節thang參考第十九章2節。

第15節thang清楚看出當時tī聖殿握有權柄ê「祭司長kah經學教師」心中ê「惱怒」，其實就是嫉妒，因為民眾對耶穌ê喜愛大大超過對in ê肯定。Mā因為án-ne，in m̄敢公然掠耶穌，深驚激起群眾受氣（參考馬太福音廿一：46）。

Chiah-ê宗教領袖問耶穌是m̄是有聽見兒童kah民眾呼喊ê聲音？耶穌用詩篇第八篇2節詩人描述連嬰á lóng會歌頌上帝ê偉大。其實，耶穌已經teh隱喻一個重要信息：連tī聖殿裡ê細漢gín-á看見耶穌所行ê神跡奇事，lóng會認出祂就是tùi上帝來，卻只有chiah-ê宗教領袖硬是m̄信。