利未記 26章14節 到 26章39節   背景資料  上一筆  下一筆
Chit段經文kah前段tú好呈現顛倒ê結果,原因就是毀壞kah上帝ê約之關係者,會受tio̍h詛咒;原本kah上帝之間bē-tàng分開ê關係,mā變成「對敵」ê狀態。Chit段經文有一個特點,就是漸進式地講tio̍h上帝ê懲罰。Thang看出上帝m̄是一出手懲罰人就真重,卻是因為人不悔改á漸漸地加重,以「罪加七倍懲罰」方式(參考第18、21、24、28節),一一加添。Tī chit段經文中,mā看tio̍h聖經說明上帝懲罰人ê時,siōng典型ê方式是用「戰爭、饑荒、瘟疫」(參考19到20節、第25到26節)等三種方式進行。

第14到17節,chia講tio̍h背棄kah上帝之間所立ê約,必定會帶來災禍,這m̄-nā是身軀ê問題,mā包括了土地ê生產會有不足ê現象出現。而且,無法度保護家己ê同胞、部落,甚至民族、國家,會受tio̍h外族ê侵犯。

第18到20節,「若是lín經歷了chiah-ê災難iáu不聽從我」,chit句話真清楚表明頭前一段ê懲罰並m̄是siōng嚴重ê,卻是m̄知悔改ê時,上帝會出手koh khah嚴重。Chia講上帝ài kā chit種罪加重七倍算。懲罰就是加重七倍重。Tī chia,土地就完全無生產,án-ne,隨時就會發生饑荒ê事,會威脅性命ê安全。

第21到22節,「若是lín繼續固執,不聽從我」,這比前一段所描述ê koh khah嚴重,饑荒koh khah嚴重,iáu會食家己ê kiáⁿ、牲畜,過去所累積ê財富lóng會化做烏有。

第23到26節,前段講tio̍h上帝加重七倍ê懲罰,lóng是tī土地無出產、出現饑荒,chit-má則出現敵人來攻打,有戰爭ê事連續發生。只要發生戰爭,就會出現糧食短缺。

第27到35節,chit段koh khah嚴重,若是繼續違背上帝ê命令,以色列人民會tú-tio̍h無法度承受ê苦難,除了食家己ê kiáⁿ充飢外,mā會因為戰爭,hō͘所有城市lóng變成廢墟,甚至被外國人俘虜去做奴隸。重演過去tī埃及做奴隸ê痛苦生活。Chit時chūn,經文ê記載非常諷刺,它講因為只有án-ne,chiah ē-tàng hō͘土地真正休耕。這講出一個真重要ê事實,to̍h是:人若平時不守安息日,á利用安息日去工作,並無會因為án-ne得tio̍h koh khah chē,因為tī上帝懲罰ê日子,chiah-ê lóng會收取tńg來,而且是加倍ê收tńg來。

請注意第29節,chia提起上帝tī大受氣之下ê懲罰,是嚴重到「會餓kah得食家己kiáⁿ ê肉」,這表示饑荒á是因為戰爭缺糧ê情況,已經到à bē-tàng挽回ê地步,thang參考列王記下第六章29節、耶利米書第十九章9節、耶利米哀歌第四章10節、以西結書第五章10節等等經文lóng有提起chit種災難ê情況,後來確實發生tī以色列人民中。

第36到39節,chit段經文講出違背上帝命令ê子民,會被掠到國外去做奴隸,而且並無因為tī國外做奴隸,就ē-tàng安心,iáu是仝款,不時生活tī驚惶kah不安中。

重新查詢 專卷研經 利未記系列
錯誤回報,請聯繫comm[@]fhl.net