利未記 19章11節 到 19章22節   背景資料  上一筆  下一筆
Chit段經文iáu-koh以十誡為主軸,ài以色列人民嚴格遵守chiah bē致使侮辱上帝ê聖名。

第11到12節,這是十誡ê第三誡、第八誡,kah第九誡。「講白賊」、「發假誓」等,lóng牽涉tio̍h亂使用上帝ê名,以及做假見證等違背誡命ê行為(參考出埃及記二十:7、15、16)。

第13到14節,這是對同胞基本ê疼,á工人每工ê工資是伊全家生活ê需要。延遲發放,等於是陷該家庭tī困境。Mā tùi chit兩節看tio̍h非常進步ê(現代化)思想,包括對工人ê照顧,in微薄ê收入一定tio̍h應付每工生活ê需要,因為án-ne,延遲付工資乃是不道德ê事。馬太福音第二十章1到15節記載耶穌ê譬喻,講日頭一落山,葡萄園主人馬上就發工資hō͘工人。

第15到16節,施行公義,hō͘ in公道ê審判,這是維繫kui個社會安寧ê基礎,mā teh表示人ê心中有上帝。因為上帝是公義ê,祂一心ài伸張正義(參考以賽亞書四十二:21、四十五:19),mā要求所揀選ê子民beh維護公道、伸張正義(參考創世記十八:19,以賽亞書四十二:1、6)。

第17到18節,對親人kah鄰舍ê疼,就是坦白、誠實以對。隱瞞事實真相,kan-taⁿ會帶來koh khah pháiⁿ ê結果。Tī社區生活中,律法ê基礎就是用第18節作結構,bē-tàng有報復ê心,只有ē-tàng「疼家己ê厝邊,親像疼家己仝款」,這是siōng基本ê態度。Chia講tio̍h「tio̍h疼家己ê厝邊,親像疼家己仝款」,chit句話koh khah貼切ê譬喻出現tī路加福音第十章30到37節,耶穌回應來詢問得tio̍h永恆性命之途徑ê律法教師所講ê譬喻。

第19節,chit節thang參考創世記第一章所提起ê,上帝創造萬物lóng各有其類,分門別類非常清楚。混亂了chiah-ê類別,kan-taⁿ會帶來koh khah chē ê混亂而已。

第20到22節,保持對奴僕ê基本尊敬,這是非常重要ê態度,bē-tàng因為對方是奴僕,就ē-tàng隨便性侵。

重新查詢 專卷研經 利未記系列
錯誤回報,請聯繫comm[@]fhl.net