士師記 2章1節 到 2章5節   背景資料  上一筆  下一筆
Chit章tùi第11節開始,說明以色列人民tī約書亞kah伊hit-ê時代ê領袖lóng往生後,in ê後代竟然bē記得上帝tī in中間,án怎帶領in ê祖先án怎離開埃及奴隸之地,以及tī曠野漂流期間帶領in,到落尾koh帶領in進入迦南地ê經過。因為án-ne,in離開上帝,隨從迦南地ê人去拜偶像神明,因為án-ne,惹起上帝極大ê憤怒,hō͘外族人來侵犯in,in chiah知影tio̍h悔改歸親向上帝。

Chit段經文ē-sái講是解釋了頭前所有軍事行動ê背後訊息──以色列人民已經bē記得in kah上帝之間「約」ê關係。

第1到2節,chit節講「上主ê天使tùi吉甲到波金」,表示以色列人已經kā宗教中心tùi吉甲轉移到波金à。Chia上帝ê天使對以色列人民提出警告,講in已經bē記得上帝,無遵照kah上帝之間所立ê約做tāi-chì。以色列人民反tńg是去kah當地ê人民立約,而且無拆毀in ê偶像神明之祭壇,án-ne chiah是嚴重違背上帝ê旨意,因為chiah-ê祭壇致使後來in kah當地人ê宗教信仰混合à。這就是頭前各支族軍事行動中,作者常常加註ê一句話:「in kah當地ê迦南人tòa做伙。」(一:29、30、32、33)這暗示了in以後信仰上墮落ê主要因素。

第3節,chit節已經清楚預言以色列人民會棄sak上帝,而且墮落到非常嚴重。

第4到5節,以色列人民聽完天使ê警語了後,大聲痛哭,因為án-ne chit-ê所在就叫做「波金」。In mā用獻祭來對上帝表明順服ê意思。

重新查詢 專卷研經 士師記系列
錯誤回報,請聯繫comm[@]fhl.net