士師記 11章29節 到 11章40節   背景資料  上一筆  下一筆
Chit段經文講述耶弗伊chiâⁿ實是上帝所揀選ê士師,á耶弗伊mā表示伊真正beh帶領以色列人民全力對抗亞捫人入侵,因為án-ne,伊用下願ê方式來回應上帝ê揀選。Á這下願就是用伊ê cha-bó͘-kiáⁿ獻祭。Mā thang án-ne講,chit段經文就是為tio̍h解釋第40節以色列ê婦女每年有一個固定活動,就是離家四工,去追悼耶弗伊ê cha-bó͘-kiáⁿ。

第29到31節,chit段經文mā說明早期社會有用人當做獻祭ê祭品行為,這mā說明以色列人民進入迦南地了後,深受當地宗教行為ê影響。親像列王記下第三章記載以色列kah猶大、以東等三國聯盟去攻打摩押,結果摩押tī最後「大勢已去」ê關頭,摩押王刣死beh繼承王位ê大kiáⁿ當做「牲祭,tī城牆頂獻hō͘摩押ê神明」(參考列王記下三:26—27),另外在列王紀下第十七章17節mā記載以色列ê人民仿效迦南人,kā家己ê子女燒獻hō͘異教神明kah其他宗教信仰ê禮儀;在列王紀下第廿一章6節,講猶大王瑪拿西mā是kā家己ê kiáⁿ燒獻hō͘巴力神明。其實,創世記第廿一章記載亞伯拉罕獻祭以撒ê事件,就是teh說明以色列人民一定tio̍h kah迦南人tī宗教行為上有所差別;迦南人有kā人當做獻祭品,以色列人民bē-tàng,只有ē-tàng用cheng-seⁿ如羊á是牛當做牲祭品。

Tī chit段經文中,耶弗伊是祈求上帝幫助伊帶領以色列軍隊phah贏亞捫人。伊下願講,如果上帝幫助伊贏了,伊就beh獻第一個出門來迎接伊ê全家hō͘上帝。伊beh獻ê祭是「燒化祭」,chit種燒化祭ê方式,是teh-beh獻ê牲禮刣死,然後khǹg tī祭壇上用火燒掉。

第32到33節,chit兩節講耶弗伊帶領以色列軍隊kah亞捫人作戰,tī上帝幫助下果然phah了勝仗,並且攻落了亞捫人二十座城,而且用「大肆屠殺」ê方式,制伏了亞捫人。

第34到35節,當耶弗伊phah贏凱旋tńg去ê時chūn,伊萬萬無想tio̍h第一個出來迎接伊ê人,竟是伊惟一ê cha-bó͘-kiáⁿ the̍h-tio̍h鈴鼓跳tio̍h舞出來迎接伊。這mā是古早時戰爭結束,凱旋tńg來ê時ê一種風俗,通常lóng會有cha-bó͘-gín-á先tī城門口唱歌跳舞歡迎凱旋歸來ê軍隊(參考出埃及記十五:19—21,撒母耳記上十八:6)。耶弗伊看見伊ê cha-bó͘-kiáⁿ出來ê時,伊差不多心lóng碎à。M̄-koh因為是向上帝下願,絕對無法度更改。第35節經文thang參考申命記第廿三章21到23 節:「你對上主— 你ê 上帝下願,m̄ -thang 延chhiân 你ê 謝願,因為上主—你ê 上帝一定會對你討,你若無謝就有罪。你若無下願,就無罪。見若tùi 你ê 嘴所出ê,照你已經下願tī 上主— 你ê 上帝來甘心獻ê,就是你ê 嘴所答應,你tio̍h 執守來照án-ne 行。(全民版)」箴言第二十章25節:「下願了後chiah 查問,這soah 成做伊家己ê 羅網。
(全民版)」

第36到37節,chit兩節是耶弗伊惟一cha-bó͘-kiáⁿ回應傷心至極ê老父所講ê話,表示她一定會照老父所下ê願。M̄-koh,她希望hō͘她兩個月時間,kah朋友上山去。因為她iáu未出嫁,就一定tio̍h被當做祭品,beh為tio̍h án-ne來哀傷。

第38到40節,耶弗伊只好允准,而伊ê cha-bó͘-kiáⁿ確實是實踐了老父所下ê願。Chit段經文mā解釋了以色列婦女每年有一個風俗,就是為耶弗伊cha-bó͘-kiáⁿ ê事哀傷四工。

重新查詢 專卷研經 士師記系列
錯誤回報,請聯繫comm[@]fhl.net