士師記 1章1節 到 1章10節   背景資料  下一筆
Tùi第一章到第二章5節,ē-sái講是後來聖經作者記錄以色列人民teh進入迦南地了後,攻城掠地ê概況。資料並無完全,m̄-koh,卻是早期ê史料,對認bat以色列人民進攻迦南地經過ê認bat有幫助。因為chit段經文thang補足約書亞記tī記載上ê欠缺。Thang án-ne講,約書亞記kā重點khǹg-tī北方ê戰事記錄,而士師記chit段則偏重tī南方ê記事。

Ná親像約書亞記一起頭就寫ê「上主ê奴僕摩西死後」,chit本士師記一起頭mā是寫tio̍h「約書亞死後」,然後開始敘述有關以色列人民活動ê情形。Tī無領袖ê帶領下,出埃及後ê以色列人民,第一pái經驗到無如摩西、約書亞chit種領導者幫in請示上帝ê旨意,mā無人來帶領in行正確ê道路。

第1到2節,tùi第1節就真清楚看出,以色列人民進入迦南地後,並無趕走迦南人,並無親像約書亞記hit種,講lóng kā迦南地所有土地kah民族lóng攻取並統治à。Chia講直到約書亞往生ê時,迦南人iáu是無被降服。因為án-ne,in繼續beh征服kui片迦南地,chit-má iáu有迦南人khiā起ê所在iáu未攻取落來。In問上帝ê旨意,上帝beh猶大支族tāi先去攻打,上帝會幫助in。

第3到7節,猶大kah西緬是仝款是雅各kah利亞生ê gín-á,西緬是雅各ê第二kiáⁿ,猶大是第四個kiáⁿ。M̄-koh後來ê發展是猶大興旺,西緬衰微到落尾併入了猶大支派。猶大支族邀請西緬支族加入in ê行伍,準備去進攻迦南人ê區域。In攻取迦南kah比利洗人ê區域。Chit位比色城ê王「亞多尼‧比色」,家己承認上帝用chit種報應ê方式來懲罰伊,因為伊過去bat砍過「七十個王」腳手ê大頭拇,chit-má伊因為戰敗而被俘虜,受tio̍h ê待遇mā是仝款,被猶大kah西緬兩支族ê聯軍kā伊腳手ê拇指砍掉。古代中東地區會用chit種方式來懲罰對敵ê軍事領袖,hō͘ in無法度koh再繼續領軍作戰。Chit位亞多尼‧比色王後來就死tī耶路撒冷。

Chit段經文是關係猶大征服耶路撒冷ê記事。

第8節,chia講猶大攻打耶路撒冷,並且佔領了hit-ê城。雖然是phah贏了,m̄-koh實際上當時hit-ê城iáu未被以色列人佔領,chit點tùi第一章21節就ē-tàng看出來。後來是到à大衛時代chiah攻落hit-ê城(參考撒母耳記下五:6—10),並且建造hit-ê城成做以色列帝國ê首府。

第9到10節,chia講tio̍h猶大繼續去攻打附近ê部落,包括有:希伯崙(大衛bat tī chia繼位為以色列ê王長到七年,參考撒母耳記下五:5)、示篩、亞希幔,kah撻買族ê人等。

重新查詢 專卷研經 士師記系列
錯誤回報,請聯繫comm[@]fhl.net