Chit章ē-sái講是為第六章以色列人民進攻耶利哥城預留伏筆，講起有關妓女喇合協助約書亞所差派ê探á ê故事。後來喇合kah伊ê全家，包括伊ê父母、兄弟，以及其餘ê人lóng tī以色列軍隊攻入耶利哥城後被搶救出來，並且kā in安置tī以色列營外安全ê地區（參考六：22—25）。Tī耶穌ê族譜裡，記載喇合kah撒門結婚生波阿斯，而波阿斯kah路得結婚，大衛王就是in ê後代（參考馬太福音一：5—6）。

Chit段經文記載約書亞第一pái派兩個探á進入耶利哥城去進行秘密偵探。探á tīhit-ê城內以妓女喇合ê厝作基地，後來得tio̍h喇合ê幫助，chiah會得thang逃脫緝捕。

第1到3節，約書亞特別交帶chit兩個探á pôaⁿ過約旦河到耶利哥城去探虛實，hit-ê城距離約旦河約有十一公里之遠，mā是以色列攻入迦南地ê第一個城市（參考約書亞記第六章）。它tī約旦河西岸，後來分配給便雅憫支派khiā起（參考約書亞記十八：12）。原本hit-ê城ê水質真差，土地貧瘠，後來因為先知來便利沙行神跡，chiah hō͘ hit-ê城ê水質「變成純淨，無koh造成死亡」（參考列王記下二：19—22）。Hit-ê城ê農作物chiah開始有好ê收成。福音書中記載耶穌有kúi-nā pái ê故事是kah hit-ê城有關係（馬太福音二十：29—34，路加福音十：30—35；十九：1—10）。M̄-koh in進入了後，消息就被傳出來，hit-ê城ê王一聽tio̍h就下令去搜查喇合ê厝，準備掠chit兩個探á。

第4到7節，故事ê癥結有可能是tī chit兩位探á為甚麼會進入妓女喇合ê厝？合理ê解釋是：生份人bih起來，tī一般小鎮，真容易被發見，m̄-koh，妓女營生ê場合則公共場所，比較容易混入，閒雜ê人khah-chē，無容易被發見。M̄-koh並無清楚喇合為甚麼beh保護chit兩位探á？可能是她驚受連累，á是希望chit兩個探á趕緊離開她ê厝，免得加添麻煩。M̄-koh khah可能kah當時中東地帶ê風俗，只要接納出外人，就有庇護人客安全ê責任kah義務。因為án-ne，伊對來查訪ê安全人員回應講出保護chit兩個探á ê話，誤導緝the̍h探á ê安全人員ê方向，終其尾會保全chit兩個探á。