約書亞記 1章1節 到 1章9節   背景資料  下一筆
Ná親像teh紹介chit本經冊ê時提起過ê,有人將約書亞記kah頭前五本經冊合併稱做「六經」,意思是teh指約書亞記無法度tùi摩西五經中分離出來,一定tio̍h連成一個單元主體同齊看,因為約書亞是hō͘上帝揀選ê奴僕,上帝beh伊續接摩西帶領以色列人民入迦南地。Chit種講法真有意思,確實,約書亞記就是繼續描述tī摩西死後,約書亞án怎帶領以色列人民pôaⁿ過約旦河進入迦南地,並tī伊ê帶領下,以色列人民完成攻佔迦南地,而且完成分配各支派ê土地範圍。

Chit章講tio̍h上帝透過對約書亞講話來表示是祂親自揀選約書亞,賦予伊能力來帶領以色列人民,並且beh kā伊講怎樣帶領以色列人民,準備pôaⁿ過約旦河進入迦南應允之地。

Chit段經文ē-sái講是上帝揀選約書亞,並向伊保證,一定會kah伊同在,無人ē-tàng有力量phah敗伊。M̄-koh約書亞一定會遵行上帝頒佈hō͘摩西koh再轉hō͘以色列人民ê全部律法,而且tio̍h常常誦念,bē-tàng bē記得。Án-ne,伊就會得tio̍h上帝ê賜福。

第1到4節,一開始就寫「上主ê奴僕摩西」,chit句話mā teh表示摩西確實是上帝忠實ê奴僕。Tī chia真清楚說明約書亞就是繼承摩西ê領導權,tio̍h帶領以色列人民pôaⁿ過約旦河。第4節說明kui個迦南地ê範圍。

第5到9節,chit段經文是上帝對揀選約書亞ê應允。包括上帝會kah約書亞同在,ná親像過去kah摩西同在仝款;hō͘伊有夠額ê氣力,thang抵擋任何來侵犯ê氣力。

「tio̍h堅強、tio̍h勇敢」chit句話一pái koh一pái重複,表示約書亞tio̍h帶領一支人數超過百萬人ê隊伍,而且ài面對已經有非常進步ê文化區域,以及有真好ê社會組織之迦南地原住民,卻m̄是一件真容易ê事,因為án-ne,thang理解beh進入迦南地並m̄是親像想像中ê hit種容易,一定會tú-tio̍h真chē困境,m̄-koh beh成功ê siōng基本要件,就是一定tio̍h「切實遵行」上帝所頒佈ê命令、誡命。換句話講,確實遵行ê旨意,就會得tio̍h「成功,事事順利」。

值得注意ê,是tī第8節上帝kā約書亞講,ài伊「日夜研讀chit-ê律法冊」,因為he是上帝頒佈hō͘摩西轉達hō͘以色列人民ê。約書亞taⁿ繼承摩西ê領導權,第一件tio̍h注意ê事,m̄是研究軍事指導手冊,mā m̄是管理要領,koh khah m̄是政治大全等類ê冊,卻是beh kā上帝ê律法誡命日夜研讀清楚,án-ne,就ē-tàng用上帝ê話來帶領以色列人民,chiah bē有所偏差。

重新查詢 專卷研經 約書亞記系列
錯誤回報,請聯繫comm[@]fhl.net