Chit段經文是約翰福音特有ê資料。Chit段經文提供一個真重要ê信息：耶穌ná親像獻祭tī十字架上ê「羊羔」仝款，是完整ê獻祭。根據摩西ê 律法規定，獻祭用ê羊羔一定tio̍h無殘缺ê chiah thang（請參考利未記三：6、四：3、23、28、32、五：15、六：6）。耶穌是連一條骨頭mā無phah斷，這所beh傳達ê信息是：祂是完整ê獻祭tī十字架上，為人類ê罪，成做獻祭ê羊羔。

A. koh講，第36節chit句「骨頭連一條mā bē-tàng phah斷」，是採用出埃及記第十二章46 節有關食Pôaⁿ過節暗頓，規定準備ê小羊一定tio̍h是整隻完整，連骨頭lóng是好ê、無折斷ê。Chit間表示ê是：出埃及乃是性命ê再生，是新性命ê開始。耶穌tī十字架上ê死，等於hō͘咱得tio̍h一個新ê性命。

B. 第37節是引用自撒迦利亞第十二章10節。Chit節經文是先知撒迦利亞teh預言有一工，大衛ê kiáⁿ孫kah耶路撒冷ê居民teh-beh重新建造，m̄-koh這一定tio̍h仰望hit位「被in刺死ê」。這已經teh說明耶穌就是án-ne應驗先知所講ê話，祂就是猶太人期待甚久ê彌賽亞。