Chit章thang分做兩個段落，其一是tùi第1到6節，這是約伯第二pái回應上帝ê話，mā是上帝kah約伯之間對話ê結束。其二是tùi第7到17節，這部分屬tī結尾，mā是約伯記ê總結。

Chit段是約伯第二pái回答上帝所講ê話。Chit pái ê回答kah第一pái回答有仝款ê所在（參考四十：3—5）。

第1到2節，約伯開始就講「我知影」，相對tī上帝開始講伊是「竟講無知ê話」（參考三十八：2），tú好呈現完全相對ê狀態。伊承認上帝是「事事lóng ē-tàng」，只要是上帝「計劃」ê事，lóng必定會「實現」。這mā是teh表示：chit-má約伯已經明白並且相信，家己受苦是有上帝ê計劃tī其中。伊知影「你ē-tàng實現一切計劃」，bē因為有人chē言chē語而改變本來ê計劃，mā bē hō͘人ê意見所左右。

第3到4節，約伯koh一pái承認家己ê「無知」，mā承認家己過去所講ê話，其實連家己mā m̄-bat。chit-má伊知影上帝做事、計劃「奇妙異常，無法度領悟」。伊講上帝beh伊「注意聽」，m̄-koh伊過去卻kan-taⁿ想beh講hō͘上帝聽，這是錯誤ê。「注意聽」，這mā是kui本聖經ê教示。

第5節，chit節ē-sái講是kui本約伯siōng重要ê經文之一，說明人對上帝創造「奇妙異常」ê認bat真少。過去所認bat ê，lóng是「聽別人談論」上帝ê事，chit-má聽上帝ê話了後，chiah發見家己過去ê認bat非常有限。chit-má「親目看見」上帝，表示明白、曉悟ê意思，這是直接、親身ê體驗，而無koh是透過別人紹介、間接性ê認bat。

第6節，chit節thang對照第九章21節。約伯對家己以前「講過ê話感覺見笑」。Chia所講ê「見笑」，有含驚惶ê意思，因為知影錯誤，驚惶上帝無歡喜、受氣（參考創世記三：10）。約伯用真嚴肅ê方式來表示家己誠心實意ê懺悔態度；伊以「坐tī土粉kah爐灰中懺悔」來表示siōng真誠ê悔意。「土粉kah爐灰」，chiah-ê lóng是無用ê物件，只有ē-tàng任人踐踏、棄sak。