約伯記 42章7節 到 42章17節   背景資料  上一筆
Chit段經文說明上帝對約伯ê肯定,相對ê,上帝對以利法等三個約伯朋友ê論點並無滿意。M̄-koh欠缺上帝對以利戶ê裁判,這mā是有kóa聖經學者認為,第三十二到三十七章chit段以利戶ê言論是tī chit本經冊已經編輯完成了後,chiah加添上去ê結果。

Tùi第10節開始,有bē少聖經學者認為chit段經文hō͘約伯記chit本經冊ê美妙失味à。因為chit段經文tú好koh tńg來到「善有善報、惡有惡報」ê傳統觀念中,破壞了原本約伯記siōng精彩ê「善,無一定有善報;惡,mā無一定有惡報」ê觀點,hō͘本來整體結構ê基礎受tio̍h搖動。

M̄-koh,另外一種看法是:當人明白上帝ê旨意了後,就會明白上帝乃是個賞賜ê上帝,祂mā是豐富ê上帝。對tī信靠祂ê人,上帝絕對bē袖手旁觀。因為án-ne,當約伯明白上帝旨意了後,伊開始奮力khiā起來,koh努力工作,而得tio̍h好成果。

第7到9節,上帝進行審判,甚麼人對、甚麼人錯。人ê標準確實kah上帝ê看法差別真大;tī上帝ê看法裡,以利法、比勒達、瑣法三人對上帝ê認bat,遠不如約伯。雖然約伯一直用真嚴厲ê語句對上帝表示抗議,m̄-koh約伯ê話卻是誠實ê;相對ê,以利法等三位朋友所講ê,雖然聽起來kah-ná真正確,m̄-koh in卻m̄是真正明白上帝ê旨意。

Tī chia上帝稱呼約伯是「我ê奴僕」,tùi chit本經冊ê開始,上帝就是án-ne稱呼約伯(參考一:8),chit種稱呼lóng teh表示約伯是上帝特別揀選ê。作者有意在表明上帝呼召一個人來成做祂ê奴僕,就已經有意hō͘奴僕「受苦」,用以訓練奴僕忍受苦難ê耐力(參考以賽亞書第五十三章)。約伯siōng hō͘人動容ê所在,乃是伊講:「我chit-ê 皮敗壞了後,我會tī 肉體ê 外面ē-tàng 見上帝。我本身會看tio̍h 祂是為我ê,我親目看tio̍h 祂m̄ 是外人;我ê 心腸tī 我內面熱kah 強beh 熔去。(全民版)」(約伯記十九:26—27)顯示約伯對上帝有絕對ê信心,即使伊tú-tio̍h siōng大ê災難,mā無放棄見上帝ê面,雖然是殘破、潦倒ê狀況,伊iáu-koh深信上帝會接納伊、見伊。上帝beh以利法等等chiah-ê人用「七隻公牛,七隻公羊,到約伯hia去獻上燒化祭」,這是用來做「贖罪」ê禮儀一定tio̍h有ê方式(參考利未記一:1—13)。M̄-koh摩西律法並無規定tio̍h獻「七隻」,其實,只需獻一隻就有夠。獻上七隻,表示siōng完整、siōng完美ê意思。

然後上帝beh約伯為伊ê三個朋友代禱,上帝「會歡喜接納伊ê祈求」,因為伊確實是認bat上帝ê人。真正認bat上帝ê人,chiah會明白怎樣kah上帝對話。真重要ê是約伯ê chit三位朋友—以利法、比勒達、瑣法等三人,就聽從了上帝ê吩咐去做。Á「上帝歡喜接納約伯ê祈求」,表明上帝kah約伯ê關係,並無因為約伯苦難ê遭遇有所改變,因為tī上帝ê眼中,約伯乃是祂忠實ê奴僕。上帝並m̄是根據人ê標準看待人,因為上帝是鑒察人心內ê上帝,並無照外表來衡量人(參考撒母耳記上十六:7)。

第10到11節,約伯為以利法等三位朋友「祈禱」,這是teh指「祝福」ê意思。上帝「恢復了伊ê景況」,hō͘約伯「比以前加倍興盛」,因為án-ne,親朋好友lóng因為約伯恢復了昔日光彩而來探望。大家lóng紛紛送hō͘約伯「一kóa錢kah一個金環」,是teh代表敬意ê禮物。

第12到15節,chit節thang比較第10節ê「加倍興旺」,說明上帝賜福比以前koh-khah-chē。原本有七千隻羊(參考約伯記一:3),chit-má有「一萬四千隻」;過去有三千隻駱駝,chit-má有「六千頭」;以前一千頭牛,chit-má有「二千頭」;以前有五百匹驢á,chit-má是有「一千匹」等,chiah-ê lóng說明加倍ê意思。然後koh賞賜hō͘伊kah以往仝款有「七個kiáⁿ,三個cha-bó͘-kiáⁿ」,並且講chit三個cha-bó͘-kiáⁿ是比以前koh khah「súi」,而且是「世間」siōng súi ê。比較特別ê所在是chia特別記載約伯chit三個cha-bó͘-kiáⁿ ê名:「耶米瑪」,這是象徵粉鳥ê溫柔、可愛;「基洗亞」,是肉桂ê意思,這是一種製造高級香水ê材料;「基蓮‧哈樸」,意思是teh指畫眉ê小化妝盒,是súi ê裝飾品。

第16到17節,約伯koh「koh活了一百四十年」,chit句話表明約伯看tio̍h「四代kiáⁿ孫」。表示伊ê kiáⁿ lóng已經成家立業,而且是兒孫滿堂ê意思,是世間ê人看做siōng幸福ê標準。Koh講,這「一百四十」tú好是「七」ê倍數。Á「七」tī以色列文化中,表明ê是上帝賜福。因為án-ne,mā teh表示約伯後來活在世間ê這「一百四十」年歲月,確實是充滿tio̍h上帝ê賜福kah恩典,而這mā是teh回應第12節所提起ê「上主賜福hō͘伊,比伊早年所得ê koh-khah chē」chit句話。約伯最後是「長壽善終」,這mā是聖經作者形容一個人得tio̍h上帝祝福ê意思。

重新查詢 專卷研經 約伯記系列
錯誤回報,請聯繫comm[@]fhl.net