約伯記 26章1節 到 26章14節   背景資料  上一筆  下一筆
Ná親像頭前已經有敘述過ê,tī第三輪ê辯論中,約伯講話iáu無完,chiah-ê朋友就會搶回答。Chit章mā是án-ne,第到4節是約伯回應比勒達,比勒達聽一下就隨時辯駁。M̄-koh mā有人認為kā第廿六章5到14節編輯tī第廿五章了後,會比較通順。

第1到4節,chit段經文明顯ē-tàng看出,約伯當時ê情緒真受氣,雖kan-taⁿ有短短四節,語氣kah頭前ê長篇大論真無仝款。約伯認為chiah-ê朋友m̄-nā對伊tú-tio̍h ê災難無幫助,只有加添伊ê痛苦而已。Tī這短短四節中,伊lóng是用真諷刺ê話回應比勒達kah其它兩位朋友。伊講家己是一個「bē-tàng ê人」,mā是一個「無力ê人」,m̄-koh相對ê,chiah-ê朋友卻hō͘伊大大超過伊所ē-tàng承受ê「幫助」、「救援」、「指教」,意思是結果只有反效果而已。因為伊並無任何「感動」。

第5節開始到第14節ê chit段經文,lóng是比勒達ê回答,則伊必定是聽約伯頂面所講ê回答了後,感覺非常受氣而搶回應約伯ê話。Chit段經文kah創世記第一章記載有關創造ê故事真類似,提起「陰間」、「冥府」等,chiah-ê lóng是表達「深淵」ê意思。Tī chit段經文中mā出現「天空」、「太空」、「水」、水中ê「生物」、「雲彩」、「光」、「pûn氣」等詞,chiah-ê lóng是創世記第一章所使用ê詞彙。

第5到6節,比勒達講只要看見上帝出來,就算是「地下腳ê水kah其中ê生物」mā lóng會露出「驚恐」,甚至連「陰間」裡ê一切lóng仝款,會感受tio̍h震撼。這teh表示:kui個宇宙萬物lóng是tī上帝掌管之下,無任何一項事物ē-tàng逃離上帝ê掌管kah命令,就算tī陰間mā是仝款(參考詩篇一三九:8,箴言十五:11)。

第7節,chia提起「天空」、「太空」,這就是創世記第一章2節所講ê「混沌」ê意思。古早時ê以色列人民有一個觀念,認為天頂是上帝khiā起ê所在,而所有ê諸神則聚集tī北極山頂(參考以賽亞書十四:13)。這「太空」,就是teh指tio̍h「混沌」、「空虛」,表示無任何支撐ê柱子,上帝卻ē-tàng輕易ê kā地球懸掛tī chit種狀態中而bē墜落來,這顯示了上帝ê能力無限,遠大大超過人ê想像。

第8到10節,比勒達講上帝是用「密雲」包糊tī「水」,mā用「雲彩」包tòa「月」。「雲」thang kā「水」包tī內面,hō͘人無法度看會tio̍h,soah koh無需要任何支撐ê物件,這表示上帝有非常高ê智慧kah能力,chiah ē-tàngán-ne。Mā因為有「雲」kā「水」包tòa,就ē-tàng降落雨水tī土腳(參考約伯記三十七:13)。上帝mā kā「雲彩」鋪tī「滿月」ê頂面,然後hō͘真chē民族看做是神明ê月娘,像驚見笑ê姑娘被遮蓋起來。然後koh tī「海面上劃了地平線,hō͘光kah暗隔開」,án-ne人類就ē-tàng分出工作kah歇睏ê界限。M̄-koh對上帝來講,卻無必要。

第11到12節,古代以色列人ê宇宙觀,是認為天kah地之間有柱子支撐tio̍h,維持天地間ê平衡,天才bē塌落。M̄-koh即使是án-ne,只要上帝「責備」ê聲音出來,天地lóng會「戰慄」搖動。因為kui個宇宙lóng是tī祂ê掌管之下。仝款ê,tī以色列文化中,認為siōng危險ê「大海」,mā會乖乖á聽從上帝ê命令連「海怪拉哈伯」,mā會hō͘「擊倒」消失。
第13到14節,上帝「pûn氣」,就是teh指上帝ê靈。Chia ê「海怪」,指ê是違背上帝旨意ê人,ná親像海怪仝款,雖想beh逃避上帝ê懲罰,卻無法度脫逃。以上所敘述ê,tī人看起來lóng是非常偉大ê作為,m̄-koh對上帝來講卻只是微小ê動作罷à。

比勒達講chiah-ê話,已經m̄是針對約伯ê發言內容,顯然是各講各話。


重新查詢 專卷研經 約伯記系列
錯誤回報,請聯繫comm[@]fhl.net