耶利米書 9章1節 到 9章24節   背景資料  上一筆  下一筆
第九章是繼續先知耶利米tī第八章對猶大人民ê譴責,chit章所用ê句話lóng真嚴厲,ē-tàng看出猶大人民已經完全聽不入去先知ê呼聲,而且根本不kā上帝khǹg tī眼中。因為án-ne,先知耶利米tī預言耶路撒冷城ê景況ê時,真清楚講tio̍h伊會變成一堆廢墟,無koh有人khiā起,kan-taⁿ會「成做野狗ê窩」。

Koh講,chit章mā有一個特色,就是用「問」kah「答」方式寫做ê詩歌,這「問」kah「答」m̄-nā用tī上帝kah猶大人民,mā用tī上帝kah先知耶利米之間。

第1節,tī希伯來文聖經,chit節是編輯tī第八章最後一節,說明先知耶利米希望用伊ê目屎代替基列ê膏藥,來醫伊ná受難ê同胞。Chit節mā說明為甚麼有人稱呼先知耶利米是一個「啼哭ê先知」。因為伊「日瞑為被刣ê同胞啼哭」,chit節thang看出巴比倫軍隊對耶路撒冷城內ê以色列人民之殘酷,遠遠超過所ē-tàng想像ê嚴重。

第2到3節,chit節ê前半句thang看出先知耶利米真無奈ê心聲,因為伊ê同胞m̄-chhap伊,m̄聽伊ê勸導,甚至有人想beh殺害伊(參考耶利米書二十:10)。M̄-koh伊mā無客氣地指出家己ê同胞是「一陣叛徒」,in並m̄是用真實ê心teh敬拜上帝,只不過是用宗教禮儀來掩蓋(khàm)in犯罪ê行為(參考以賽亞書一:13—14,阿摩司書五:21—23)。In「隨時隨地講白賊,虛假取代了真理」,in「m̄承認」上帝,「藐視」上帝ê人。

第4到6節,chit三節經文一再強調猶大人民已經是欺騙成性,「人人欺騙朋友」,而且是「隨時隨地講白賊」又koh是「接二連三地強暴欺詐」,上帝講猶大人民就是án-ne「棄sak」祂。

第7到9節,為tio̍h chit-ê緣故,上帝認為一定tio̍h好好á「鍛鍊」、「考驗」猶大人民而且是beh用嚴格ê方式來「懲罰」,因為in講話ê「嘴舌像銳利ê箭」,mā一再「挖陷阱」陷害別人,因為án-ne,上帝會對chit種人民kah國家ê領袖採取嚴厲懲罰、報復,thang hō͘ in知影上帝ê忿怒。

第10到11節,chit兩節講出上帝懲罰ê動作,mā thang看出上帝嚴厲懲罰了後所呈現ê慘狀。Chia ê「為山岡悲鳴哀號」、「為草原唱一首輓歌」等,lóng teh表示原本是kui片大草原thang放牧牛羊ê所在,chit-má是連「飛鳥行獸lóng絕跡」,原因是kui片草原lóng已經「被燒成焦土」了。而且上帝mā tio̍h「hō͘耶路撒冷荒廢」,成做「野狗ê窩」,koh khah án怎都無人khiā起其中。

第12節,先知耶利米問上帝ê問題。伊問上帝為甚麼「土地荒廢,像沙漠乾旱」,kah原本上帝賞賜hō͘ in ê「流奶kah蜜之地」(參考耶利米書十一:5,出埃及記三:8)出現完全無仝ê景象。伊問上帝「甚麼人夠聰明,ē-tàng明白這道理」,希望明白上帝旨意ê人ē-tàng去向別人「解釋」?

第13到16節,chit段是上帝回答先知耶利米ê詢問。上帝真清楚hō͘先知耶利米知影,會有chit種結果是因為猶大人民(上帝ê子民)「棄sak」、「m̄聽從」、「不實行」上帝ê旨意kah教導。In一再地「一意孤行」去拜「巴力」神明,而且是tùi in ê「祖先」開始就án-ne做,這mā說明上帝確實是容忍真長ê時間。chit-má上帝決定beh採取懲罰,beh hō͘猶大人民「食苦果,lim毒水」,這lóng teh表示性命ê苦難會tī每工ê生活出現。因為「果」kah「水」表示每日生活ê必需品。甚至mā tio̍h hō͘ in被敵人俘虜,然後kā in販賣「流放到各國」,是「到in祖先kah家己lóng無聽過ê所在去」,這是非常悲慘ê結果。

第17節,chit節是上帝講ê話。祂hō͘猶大人民知影,siōng好是「雇用陪哭ê婦女來哀號」,去「雇專唱輓歌ê cha-bó͘-gín-á來哀悼」,這已經清楚表示猶大ê滅亡是確定了。

第18到19節,chit兩節是猶大人民ê回應,當in知影已經無挽tńg來ê機會ê時,mā表示án-ne就只有請人來「唱輓歌」,而且是唱到hō͘ in「痛哭流涕,目屎如雨下」,以抒解心中ê艱苦心。Chit時,in已經聽見「錫安城裡哀號ê聲音」,知影國家被敵人「摧毀了」,而猶大人民是「大大地受辱」,被敵人以殘酷ê手段對待,無所謂性命尊嚴thang講。因為正kah上帝所講ê仝款,in受掠「一定tio̍h離鄉背井」,家無了。

第20到22節,chit三節講出耶路撒冷嚴重傷亡ê景況,就是死亡人數級chē,連專唱輓歌ê職業婦女mā忙不過來。因為án-ne每戶tio̍h教家己ê cha-bó͘-kiáⁿ mā學習幫忙唱「哀歌」,á是「教朋友唱輓歌」,因為四界lóng有人喪亡。M̄-nā是人民受難,王室宮廷mā仝款受災,「街上ê孩童」橫屍遍地,「少年人」tī「廣場上」被刣死ê koh khah chē,chiah-ê屍體堆積chē到像「田野裡ê糞堆」仝款。

第23到24節,chit兩節是真重要ê經文。說明人tī上帝面前有甚麼thang the̍h來kah上帝比並ê?無,因為所有ê,lóng是tùi上帝來ê賞賜。除了感謝kah榮耀上帝以外,無任何thang誇口口ê所在。

「智者bē-tàng誇耀家己ê智慧」,聖經講「智慧」,是teh指認bat上帝(參考箴言一:7、九:10)。因為án-ne,當人beh誇耀家己有智慧ê時,就應該以「誇耀認bat」、「明白」上帝,而且是認bat上帝有「無變ê疼」,chit點chiah是重點,mā是上帝ê特性之一。

「勇士bē-tàng誇耀家己ê氣力」,chit句話thang tùi以色列人民出埃及過紅海ê事件看出來,就算埃及帝國是當時siōng強盛國家,派出tui-jiok以色列人民ê是該國siōng精銳部隊,結果mā lóng沉無tī紅海中,無一佳哉免得(參考出埃及記第十四章)。相對tī以色列人民是手無寸鐵ê難民,因為有上帝kah in同在,而ē-tàng安然無恙。

「富人bē-tàng誇耀家己ê財富」,ná親像約伯所講ê,賞賜lóng是tùi上帝來,人無法度永遠擁有,除非人ē-tàng尊主為大,若無,只要上帝伸手收tńg來,一切lóng kā失去(參考約伯記一:21),這mā是上帝賞賜hō͘以色列人民siōng肥ê土地khiā起,mā thang摧毀chit-ê流奶kah蜜之地仝款簡單。耶穌ê譬喻中提起財主bē記得上帝,上帝thang收tńg來伊賞賜ê財富轉賜hō͘別人(參考路加福音十二:20)。

而認bat上帝ê特性之二,是祂「執行公道,伸張正義」,chit句話說明上帝所揀選ê奴僕、子民、國家、民族,lóng一定tio̍h學習上帝chit-ê教導,去執行公道,伸張正義(參考創世記十八:19,以賽亞書十一:4—5、四十二:1、4、6,阿摩司書五:24,彌迦書六:8)。若是無án-ne,就無算是認bat上帝。
第25到26節,chit兩節說明kui個中東沙漠地帶ê民族,lóng有行割禮ê風俗,而chit種風俗是「成人禮」,tùi十三歲開始。M̄-koh以色列人民ê割禮,是tī出世後ê第八工舉行,表示以色列人民tùi出世後就開始kah上帝立落來bē-tàng分割ê「約」(參考創世記十七:9—14)。

「剪短了頭毛」,這是因為迦南地ê人民用剪短了頭毛來表示對神明ê尊敬。Á以色列人民是留長髮,以示kah in有所區別。M̄-koh siōng重要ê區別,m̄是外表ê記號,如:剪短了頭毛á是接受割禮。卻是一定tio̍h tī「心靈上」受割禮chiah重要,chit點先知耶利米chìn前已經有講過(參考耶利米書四:4)

重新查詢 專卷研經 耶利米書系列
錯誤回報,請聯繫comm[@]fhl.net