耶利米書 8章1節 到 8章22節   背景資料  上一筆  下一筆
Chit章tùi第4節開始,直到第十章止,chit段經文中間,除了第九章11節、第12到15節、第24到25節等等為散文外,其餘經文差不多全部lóng是用詩體寫出來,可惜,《現代中文譯本》tī編輯上並無親像中文《和合本》仝款,用詩體ê方式編輯出來。Tī chit段經文中,siōng主要講述兩個主題:一是猶大人民心硬、固執,聽bē落去上帝透過奴僕先知ê話。二是tī國難當頭ê時,猶大人民iáu是m̄知悔改認罪,繼續沉淪tī罪惡中,tùi án-ne帶來koh khah悲慘ê結局。換句話講,Tī chit段詩體ê經文中,先知耶利米傳出上帝ê信息表示:上帝已經對猶大人民失望至極,無koh對in存有任何期待,理由只有一個:猶大人民拒絕認罪、悔改。

最後第18到22節是一段是先知耶利米為耶路撒冷悲傷所唱ê詩歌,主要原因是伊ê猶大同胞已經被掠到巴比倫做奴隸,過苦難ê日子發出哀嚎ê聲音。先知耶利米聽tio̍h伊同胞tī受掠之地受到à極大ê侮辱,並且經歷慘痛ê生活境遇而發出哀嚎ê聲音。伊kā這哀嚎ê聲音kā上帝講。

第1到3節,chia提起「猶大諸王、官長、祭司、先知」等,chiah-ê猶大國ê領導階層,就算in往生安葬了,mā bē得tio̍h安寧,因為敵人會kā in ê「骨骸lóng tùi墳墓內挖出來」。這有兩種可能原因,一是chiah-ê人死去ê時,lóng有豐厚、貴重ê陪葬品,因為án-ne,挖墳,mā就等於是teh挖寶仝款。二是chit種行為mā是古代社會一種侮辱敵人ê方式(參考列王記下廿三:16—18,阿摩司書二:1)。當in ê屍體被挖出來了後,會被「暴露tī日頭、月娘,kah星下腳」,被隨意棄sak tī荒郊野外,無人chhap,「無koh被收斂埋葬」。Á「日頭、月娘、星」chiah-ê星辰lóng是in過去當做神明teh崇拜ê對象,是in「所愛慕、服事、占卜、崇拜ê」,如果chiah-ê星辰真正是神明,看見此情應該會伸手救助in ê子民。M̄-koh真清楚,chiah-ê星辰lóng是虛假ê神明,對in死後ê境遇根本就lóng無反應。In kā「會變成地面上ê肥料」,lóng無性命尊嚴ê意義thang講。

第4到6節,chit段經文講出上帝ài先知耶利米去傳達信息,hō͘猶大人民知影in真正是固執到「一意孤行」,而且是lóng無悔意,已經面臨滅國ê大災難來臨,卻iáu ân-ân地「掠tiâu偶像」m̄放,拒絕悔改tńg來到上帝chia來。上帝原本會注意聽人出tī心內真誠ê祈禱聲音,m̄-koh猶大人民就是「不講出心底話」,無人「為家己ê惡行懺悔」。這是hō͘上帝感覺艱苦心ê事。
第7節,chit節thang參考以賽亞書第一章3節。

Chit節表示上帝對猶大人民ê評價,是比飛禽行獸iáu不如。因為連「鸛鳥」、「斑鳩、燕子、白鶴」thèng候鳥,lóng知影tio̍h跟tòe「季節遷徙」才能保存性命,飛向該去ê棲息地,m̄-koh猶大人民卻m̄知為保存性命去走chhōe上帝。

第8到9節,chit節thang看出當時猶大社會犯罪ê嚴重性,就是連宗教師lóng會做欺騙人ê事,甚至嚴重到連上帝ê「律法」mā被經學教師hō͘「修改」。Án-ne,聰明如經學教師ê,面臨國家災難來臨ê時mā是「驚惶失措」m̄知該怎樣辦?這只ē-sái自認聰明如經學教師ê人「蒙羞」。

第10到12節,chit三節是重複敘述第六章12到15節經文。

Chia清楚說明上帝beh用敵人來phah敗猶大人民當做懲罰ê方式,án-ne,in ê「bó͘ hō͘別人」,「田地mā交hō͘新主人」,in過去汲汲營鑽所得tio̍h siōng珍貴ê一切會喪失。因為in過去就是貪婪成性,「無論地位高低lóng貪圖不義之財」,「連先知kah祭司mā lóng欺詐人民」kui個猶大社會問題是án-ne嚴重,有權有勢ê人貪到「m̄知恥,不面紅」,是帶頭墮落ê領導者,因為án-ne,當上帝「懲罰」臨到ê時,in所受tio̍h ê懲罰會比一般民眾koh khah嚴厲,會「一蹶不振」,永遠爬bē起來。

第13節,chia用葡萄樹kah無花果樹做譬喻,chit句「像葡萄樹無結葡萄,像無花果樹無結果子」,chit句話真清楚teh表示以色列民族kā消失,á是講南國iáu大將因為án-ne被滅亡,因為上帝「容許外國人來佔領in ê土地」。「連葉álóng枯乾去」,chit句話表示無生機ê現象,已經死去à。換句話講,南國猶大生存ê機會已經非常渺茫,而且毀滅ê時間真緊來到。

第14到16節,chit三節是teh暗示巴比倫帝國軍隊來臨,而且攻入耶路撒冷城後會發生ê情景。雖然有人teh鼓勵耶路撒冷人民,tio̍h趕緊起來,m̄-thang「iáu坐teh無振動」,ài in趕緊「走到設防ê城」,就算beh死mā「就死tī hia」in已經清楚知影上帝bē koh再伸手救助in,mā知影這是上帝ê懲罰。因為敵人已經來到siōng北pêng ê城鎮「但」。M̄-nā án-ne,而且敵人ê陣勢龐(pâng)大,猶大人民已經聽見「戰馬teh噴氣」kah「戰馬嘶鳴」ê聲音。

第17節,chia用「毒蛇」teh代表巴比倫帝國ê氣力,是非常厲害,已經m̄是用任何力量thang阻擋落來。

第18節,「我悲傷無停;我心愁煩。」原本「悲傷無停」chit-ê詞ê意思是teh指「無法度痊癒」,指傷害真嚴重。

第19節,chit節是真典型ê「問kah答」ê句話;前半句是猶大人民teh問,後半句是上帝teh回答in ê問題。用chit種回答方式,thang幫助以色列人民明白in taⁿ ê苦難是為何原因。

「我四界聽見同胞哀鳴」,這是先知耶利米kā以色列同胞慘痛ê境遇轉hō͘上帝,有意祈求上帝ê垂憐。Tī苦難中ê猶大人民teh問:「上主不tī錫安了mah?錫安ê王不tī城內了mah?」上帝ê回答真清楚,反問in「為甚麼拜偶像?為甚麼拜虛無ê外國神明,激怒我」?

第20節,chit節thang看出in成做奴隸後tī苦難生活中ê期待原認為「夏季過去,收成結束loh」,in就ē-tàng得tio̍h拯救,m̄-koh結果「猶原無得救」。這說明猶大人民tī奴隸生活中,是一直teh等待得救ê信息傳出來,m̄-koh chit種期待一再落空,顯然地,上帝出手重罰了南國猶大ê人民。

第21到22節,chit兩節講出先知耶利米一再向上帝呼求,m̄-koh ná親像頭前已經提起過ê,上帝不ài伊替猶大人民祈禱。因為上帝無想beh koh聽祂ná m̄聽苦勸ê子民呼求ê聲音。Mā因為án-ne,先知耶利米感覺「悲痛萬分,驚憂無停」。就án-ne伊詢問上帝「kám講基列無藥膏mah?」這「基列」城是設tī約旦河東岸ê所在,mā是當時中東地區ê醫學中心,以出產醫病ê膏藥kah乳香出名tī當時ê中東世界(參考創世記三十七:25,耶利米書四十六:11、五十一:8)。「kám講hia無醫生mah?」基列既然以醫藥出名,必定mā有真好ê醫生。M̄-koh有真好ê醫生卻無一定ē-tàng「醫」猶大人民心靈ê創傷,因為chit種創傷是tùi上帝來嚴厲ê懲罰,除了悔改認罪之外,chhōe bē-tio̍h其他thang得tio̍h「醫」ê途徑(參考耶利米書七:7)。

重新查詢 專卷研經 耶利米書系列
錯誤回報,請聯繫comm[@]fhl.net