耶利米書 49章7節 到 49章22節   背景資料  上一筆  下一筆
Chit段經文是對以東發出ê信息。

以東,這是以掃ê kiáⁿ孫,kah以色列人民ê關係來講,是「叔輩兄弟」,是非常親近ê血緣關係。M̄-koh tùi出世開始,chit兩個祖先是雙生á ê兄弟就一直冤家無停,in ê kiáⁿ孫mā是仝款,特別是tī摩西帶領以色列人民出埃及ê時chūn,以東人m̄-nā bat拒絕以色列人民借道經過,iáu派出精銳ê大軍攻打以色列人民(參考民數記二十:14—21);tī大衛王ê時代,以東人bat被大衛ê軍隊屠殺有一萬八千人,並且被以色列駐軍管轄(參考撒母耳記下八:13—14)。後來tī猶大王約蘭在位期間,以東人乘機獨立(參考列王記下八:20—22)。

仝款記載有關上帝beh懲罰以東ê經文,mā出現tī詩篇第一三七篇7節;以賽亞書第廿一章11到12節;耶利米哀歌第四章21節;以西結書第廿五章12到14節;阿摩司書第一章11到12節,以及俄巴底亞書等。Tùi先知俄巴底亞ê文獻來看,就會發見chit位主前第六世紀ê先知俄巴底亞ê信息差不多全部lóng是針對以東人所發出ê。伊指出以東人siōng大ê問題是:當外族人攻擊猶大ê時chūn,以東人m̄-nā袖手旁觀,甚至是趁火搶劫參與掠奪,明明是就是kah仇敵仝款對待猶大(參考俄巴底亞書11到13節)。

第7節,以東tī舊約聖經時代,hō͘人認為是當地siōng有智慧ê族群。In tī中東地帶ê商業活動非常活躍。M̄-koh聖經所講ê「智慧」、「賢達」lóng是teh指認bat上帝是性命主宰,並m̄是指tī商業上能力真強,á是tī應付世事ê事頂面有真靈巧ê技能。

Koh講,以東iáu有另外一個出名而hō͘人認為真聰明ê事,就是位居高聳ê峭壁,真好ê天然屏障,hō͘ in往往chhōe機會落來偷襲,卻無其他族群ē-tàng攀上高山去打擊in,而hō͘ in thang安居高枕無憂。

第8節,「底但人」,chit-ê族群mā是亞伯拉罕ê kiáⁿ孫(參考創世記廿五:2—3),阿拉伯人ê一個遊牧部落。Tī以西結第廿七章20節講,chit-ê部落ê人ài用馬鞍kah毯子kah別ê族交易,換來生活用品。In平時接觸ê對象是敘利亞、腓尼基kah巴勒斯坦人。

chit-má上帝beh「懲罰」、「消滅」以東人ê時刻到à,因為án-ne,ài「底但人」bih起來,m̄-thang koh再kah以東人有任何來往,免得受tio̍h連累。

第9到10節,chit兩節經文kah俄巴底亞書第5到6節仝款;tī俄巴底亞書提起賊á á是盜賊來,kan-taⁿ會the̍h走所需要ê物件,伊無可能全部lóng the̍h走。仝款ê,以色列人民照摩西律法規定,摘葡萄ê時chūn,bē-tàng全部摘完,一定tio̍h留落來一kóa hō͘ hiah-ê sàn-chhiah ê人,á是外出ê人thang得tio̍h果子來止飢(參考利未記十九:9—10、廿三:22,申命記廿四:20—21)。M̄-koh tī chia,用比較khah ê詞句說明上帝ê懲罰,是bē koh再存有憐憫ê恩典,會對以東人採取非常嚴厲ê態度,方式就是「Kā以掃ê後代剝得精光」,並且beh「揭露in隱藏ê所在」,hō͘ in無所遁形。Án-ne,即使是存活落來ê人,mā會sàn-chhiah到極點,因為in過去對猶大人民ê態度就是趁火搶劫。

第11節,上帝講beh照顧以東人ê「孤兒」kah「寡婦」,這說明以東ê cha-po͘人lóng kā tī chit pái ê災禍喪生戰場,無人存活落來。

第12到13節,chia特別指出若是上帝決定嚴厲懲罰以東,無論in怎樣bih起來mā無用。Tī chia mā提起以東ê首都「波斯拉」,會變成荒野,這mā teh表示以東kā無可能有繼續存在ê機會了。

第14到16節,chit三節經文kah俄巴底亞書第1到4節類似。

Chia採用ê是一種擬人化ê筆法,講上帝「差使者到列國,ài in召集軍隊」,這ná親像今á日所謂ê「外交大臣」準備結盟成聯軍出擊以東。其中方法之一,就是孤立以東,hō͘以東失去外援。上帝會懲罰伊ê原因,就是伊「傲慢欺騙」成性,即使伊ê地理位置是tī「山峰上ê峭壁」,ná親像「la̍h-hio̍h tī koân ê所在做巢」mā仝款,只要是上帝決定beh毀滅ê旨意,任何一個所在lóng仝款,無法度逃避上帝懲罰ê手(參考詩篇一三九:7—8)。

第17到18節,chia kah耶利米書第十九章8節所預言猶大ê結局仝款。Chia講「以東kā遭遇hō͘人恐怖ê毀滅」,ná親像「所多瑪、蛾摩拉」這兩城仝款,是徹底毀滅。而且是包括伊「周圍ê城鎮」mā是仝款ê遭遇。

第19節,tùi chit節到21節tī第五十章44到46節koh一pái出現仝款ê句話,只是以東換做巴比倫。

Chit節提起上帝「選立ê統治者kā統治chit-ê國家」,指ê是上帝選派來懲罰以東ê國家,並且用「獅」來代表攻擊以東者ê強猛。Mā tùi chit節mā看出以東chit-ê國家對上帝ê藐視,想beh kah上帝「比」、「挑戰」、「反抗」,chiah-ê lóng是驕傲chiah會出現ê態度。

第20到22節,包括以東ê大城「提幔城」,in ê孩童mā會「hō͘人拖行」,成做無父母thang照顧ê孤兒,kui個城內居民所發出ê哭聲連遠遠tī「紅海」地區ê人mā聽得見,這表示上帝懲罰以東情形ê嚴重,已經因為來攻擊in ê人ná親像凶猛ê「la̍h-hio̍h展開翼股,猝然衝落來攻擊」,hō͘ in無法度防備,只有感覺像teh beh臨盆ê產婦「陣痛」、「仝款恐慌」。

重新查詢 專卷研經 耶利米書系列
錯誤回報,請聯繫comm[@]fhl.net