耶利米書 33章14節 到 33章26節   背景資料  上一筆  下一筆
Chit段信息充分表明上帝是信實ê,祂所應允ê事,一定會成就。Tī chit段經文中,koh一pái強調了tùi大衛kiáⁿ孫中出現新ê君王,而利未支族ê人會永遠擔任祭司。這lóng teh表明是回鄉了後ê新局面已經出現。

第14到16節,thang對照第廿三章5到6節ê經文來看,會發見chit兩段經文ê內容真類似。

Chia講上帝beh實現祂ê「諾言」,「為大衛興起正義ê『枝子』」,chia ê「枝子」表示新ê統治者kā出現(參考以賽亞書四:2,耶利米書廿三:5)。Chit位新ê統治者會是一個「正義」者,伊會用正義治理國家,hō͘人民ē-tàng「安居樂業」,並且「享受太平」。

第17到18節,「大衛ê後代kā永遠統治以色列」,chit句話thang參考撒母耳記下第七章12到16,列王記上第二章4節、第八章25節、第九章5節,歷代志上第六章16節、第七章16節。

「利未支族kā永久作祭司」,chit句話thang參考民數記第廿五章13節所提供ê歷史背景,就thang知影亞倫ê孫á,mā就是以利亞撒ê kiáⁿ非尼哈,因為出來阻止以色列人民kah摩押cha-bó͘-gín-á行淫,chiah消除了上帝ê忿怒。因為án-ne,上帝表示beh kah非尼哈立約,hō͘伊ê kiáⁿ孫永遠作祭司。就親像上帝應允beh hō͘大衛ê後代永遠統治以色列仝款。

第19到22節,chit段經文koh一pái重申上帝beh實踐祂tī第17到18節所提起ê應允。Chia用「日時暗夜」來表示只要天地存在,上帝ê應允就會永遠存留,「無法度廢棄」。上帝對大衛kah利未家族ê應允,mā會親像án-ne永遠保存落去,「無法度廢棄」。M̄-nā án-ne,這兩家族ê「人數增chē」,而且是chē到ná親像「天頂ê星,海灘ê沙粒,無法度數算」,chit種應允,表示上帝對in極大ê賜福,ná親像上帝對亞伯拉罕ê賜福仝款。

第23到26節,chit段經文koh一pái重申第20節所講ê,上帝既然kah祂所創造ê宇宙「天地」立約,而且chit-ê約是「無法度廢棄」ê,仝款ê,上帝對「kah雅各ê後代kah我ê奴僕大衛所立ê約」mā仝款bē廢棄。因為án-ne,上帝beh展開祂大能ê手,而且用「仁慈」來對待過去bat被祂嚴厲懲罰過ê以色列子民,並且beh帶領「in tńg來故土,重整家園」。

重新查詢 專卷研經 耶利米書系列
錯誤回報,請聯繫comm[@]fhl.net