耶利米書 32章36節 到 32章44節   背景資料  上一筆  下一筆
Chit段經文thang講是先知文獻中「希望信息」典型ê句話。Chit種「希望信息」充分表明幾點特色:

   一、失散ê人民kā koh再聚集起來,過安居樂業ê生活(第37節b句)。

   二、上帝beh koh一pái作in ê上帝(第38節)。

   三、重新立約,無koh改變(第40節)。

M̄-koh chiah-ê lóng有一個非常重要ê基本前提,就是以色列人民一定tio̍h悔改、回轉歸向上帝,否則無法度看tio̍h「希望信息」ê機會來臨。因為慈悲ê上帝siōng重視ê就是聽tio̍h以色列人民懺悔ê聲音,並看見in真實悔改ê態度。因為án-ne,先知耶利米傳出這「希望信息」ê時chūn,已經說明一點:猶大國人民因為受掠為奴tī亡國ê奴隸生活中,in非常艱苦心,而且做深切ê反省,chiah tùi先知耶利米得tio̍h這可貴ê信息。

第36節,chit節已經看見耶路撒冷城內,以及tī猶大國境內有「戰爭、饑荒,kah瘟疫」肆虐,chiah hō͘巴比倫帝國輕易ê掌握、控制猶大國人民。

第37到38節,chit節thang看tio̍h「希望信息」,因為上帝beh kā祂「放ta̍k到各國」ê以色列人民,重新帶領tńg來。領in tńg來到故鄉重建家園了後,thang「安居樂業」。並且真清楚講出上帝beh kah祂子民立約(參考三十一:31、33)。

第39到41節,thang參考第廿四章7節,以西結書第十一章19節、第三十六章26節等等。

Chit段經文講出上帝賜hō͘以色列人民有「專一」ê心thang終生敬畏上帝,遵守所立ê約。Á上帝mā會用對等而且koh khah豐富ê疼,回應以色列人民。

第42節,過去因為悖逆上帝而遭遇極大ê「災難」,chit-má則悔改歸向上帝,而要領受上帝賞賜hō͘ in ê「一切幸福」。

第43到44節,chit兩節是對應句。說明上帝ài先知耶利米kā伊親戚哈拿默ê土地買落來ê原因,就是用來譬喻過去荒廢ê田園,kā重新看見生機。用這表示上帝已經赦免以色列人民,beh重新建造in。過去大災難來臨ê時,大家過逃走,甚至受掠、喪失一切ê苦難生活,chit-má是呈現出一片繁榮而且有充沛活力ê景象,大家ài tī「耶路撒冷」等各地「買賣田地」,為tio̍h是beh「重整家園」。

重新查詢 專卷研經 耶利米書系列
錯誤回報,請聯繫comm[@]fhl.net