耶利米書 19章1節 到 19章15節   背景資料  上一筆  下一筆
眾先知不時會用象徵性ê動作,作為傳達上帝信息ê方式,親像先知以西結就bat食下一卷冊卷,冊卷就是代表上帝ê話語(參考以西結書三:1—3)。chit-má上帝ài先知耶利米去買一個陶器瓶子,然後kā這瓶子phah碎(參考耶利米書十九:1—10),用此來象徵猶大kah耶路撒冷會親像這破碎ê瓶子仝款,遇tio̍h毀滅ê結果(參考耶利米書十九:11—15)。瓶子,這表示已經捏好成形,並經過土窯燒製定型ê器具,摔破成碎片,就無法度重新koh再製,只有ē-tàng當做廢物棄sak,hō͘人踐踏而已。

第1到2節,chia提起「民間ê長老kah年長ê祭司」,前者是主管民間事務,後者是管理宗教事務。Tī猶大人民社會中,chit兩種人lóng有非常ê社群決策之力。上帝ài先知耶利米去買「一個陶器瓶子」帶chit兩種社會代表到耶路撒冷城外ê「欣嫩子谷」,然後上帝beh藉tio̍h先知耶利米手上ê瓶子宣告信息。

Chia ê「碎陶門」,是teh指破碎ê瓦片聚集ê所在。意思是teh指陶匠做得不滿意ê陶器,á是民眾厝裡破碎ê陶器物件,lóng會被the̍h-tio̍h chit-ê所在來棄sak。

第3節,chit節thang參考列王記下第廿一章12節,內容仝款。先知耶利米呼籲chiah-ê「猶大ê君王kah耶路撒冷人」,lóng tio̍h「注意聽」上帝ê話。因為上帝講「beh降大災難tī chit所在」,chit種消息必定會hō͘聽tio̍h ê人非常震撼,非常艱苦心、痛苦。

第4到9節,chit段經文是teh指出上帝會降落大災禍,是因為猶大人民「棄sak」上帝,去「向別ê神明獻祭,污染了這土地」。因為ná土地是上帝賞賜ê,因為án-ne,tī上帝賜福ê土地頂面拜偶像神明,就等於是teh侮辱上帝仝款。Mā因為chiah-ê眾領袖棄sak上帝ê教導,結果就做出嚴重錯誤ê行為,就是「Kā無辜者ê血灑遍chit-ê所在」,而chit種譴責kah警語一再出現tī先知耶利米ê信息中(參考二:34、七:6、廿二:3、17、廿六:15)。chit-má上帝beh「挫敗」「猶大kah耶路撒冷人民」,就kah-ná kā陶器ê瓶子phah倒、傾斜,hō͘內面裝ê物件lóng漏光仝款,hō͘ in tùi殺害無辜者所掠奪來ê,全部流失伊去,hō͘ in過去所有ê一切lóng消失殆盡,敵人beh來刣了了in,連in ê身軀mā保不住,因為有「飛鳥行獸」會來吞食in ê「屍體」,甚至出現一定tio̍h「食厝邊ê肉」來充飢ê悲慘景象。其實,早tī北國以色列時代就發生過類似ê慘劇(參考列王記下六:24—29)。

第10節,chit節回應了第1節,先知耶利米買了陶器瓶子,行到垃圾場mā是墳場ê欣嫩子谷,然後tī眾人面前kā ná瓶子phah破,表示猶大kah耶路撒冷kā像ná陶器瓶子仝款,被摔pháiⁿ成碎片,無法度koh再修復、使用。真有可能,伊是一面講,一面the̍h瓶子敲打擊破。

第11到13節,chit段經文是上帝ài先知耶利米kā祂ê信息傳hō͘以色列人民,hō͘ in知影上帝beh消滅in,耶路撒冷城ê「粉碎」,ná親像先知耶利米手上the̍h ê瓶子被敲碎,「無法度修補」仝款ê嚴重。上帝會徹底毀滅chit-ê城kah人民,因為in ê國家四界lóng充滿tio̍h拜偶像ê記號。

第14到15節,chit兩節等等於koh一pái確認頭前所講過,上帝beh用siōng嚴厲ê方式懲罰,叫醒以色列人民。這mā teh表示一個重要ê信息:上帝所講ê話,一定會應驗。上帝決定án-ne嚴厲懲罰in,是因為in「固執m̄聽從」,即使面臨被滅亡ê危險關頭,猶原一絲á 都無願意悔改、認罪,歸向上帝ê跡象。

重新查詢 專卷研經 耶利米書系列
錯誤回報,請聯繫comm[@]fhl.net