耶利米書 11章1節 到 11章17節   背景資料  上一筆  下一筆
Tùi chit章開始直到十二章6節,chit段經文ê背景是kah猶大ê約西亞王推動之宗教改革運動有關;然後第十二章7到17節是一首哀歌,是一首有關猶大被巴比倫帝國蹂躪以色列人民ê哀歌。

Chit段詩歌koh一pái提起上帝ài先知耶利米去猶大各城鎮宣告kah上帝所立ê約,並且警告in若是棄sak kah上帝所立ê約,kan-taⁿ會為in帶來上帝ê詛咒kah懲罰。Tī chit段經文中一再重複「chit-ê約」一詞,這「約」是teh指約西亞王潔淨耶路撒冷聖殿ê時,tī聖殿中所發見ê約冊。約西亞王bat努力進行宗教改革ê工作,kā全國各地所有ê偶像神明,以及異教ê祭壇lóng摧毀殆盡,伊chit種嚴厲進行ê掃蕩,有淡薄á獲先知耶利米ê讚賞,並且hō͘ in極高ê評價(參考耶利米書廿二:15—16)。M̄-koh約西亞王往生後,伊ê kiáⁿ約雅敬繼位執政ê時,馬上就kā in父親約西亞王所做ê改革全部廢棄,甚至iáu koh一pái重建原本已經被摧毀ê偶像祭壇,並且帶領人民去敬拜hiah-ê偶像神明,原本反對宗教改革ê氣力koh一pái興起,m̄-nā kā in本來kah約西亞王tī耶路撒冷聖殿所做ê誓言lóng bē記得kah chheng-khì-liu-liu,iáu快速地tńg去敬拜偶像神明。這可能kah in tú-tio̍h實際生活ê困境有關(參考四十四:15—19)。

第1到3節,chia講上帝ài先知耶利米向猶大人民講話,真清楚表示「甚麼人不遵行chit-ê約,甚麼人就受咒詛」,chit-ê約是teh指in kah上帝之間所立ê性命之約。

第4到5節,「tùi埃及,tùi hit-ê火燒tio̍h火爐中」,chit句話thang參考申命記第四章20節,是teh形容以色列人民tī埃及生活ê景況,確實是非常艱困,甚至已經進入到死亡ê邊緣,chiah會用「火燒tio̍h ê火爐」chit-ê詞來形容。上帝是伸手tùi這「火燒tio̍h ê火爐中」kā以色列人民ê「祖先帶出來」,並且iáu kah in立約。Chit-ê約真清楚表示:只要in遵守上帝ê命令,就是上帝ê子民,上帝一定會實現對in祖先所發過ê誓,賜hō͘ in一塊流奶kah蜜ê地thang khiā起。

第6到8節,chit段經文講上帝ài先知耶利米到猶大全國各地去,甚至到每一個城鎮ê大街小巷裡傳達上帝ê信息,就是ài in服從上帝ê命令。M̄-koh tùi in祖先開始,就一再拒絕聽從上帝ê話,mā拒絕遵守上帝ê旨意。因為án-ne,上帝beh照所立之約來懲罰in。

第9到10節,上帝透過先知耶利米指控「猶大kah耶路撒冷人陰謀背叛」,chia所講ê「陰謀背叛」,意思是teh指有計畫ê拜偶像行動,包括建造祭壇,kah舉行獻祭禮儀等等。講猶大人民「koh犯祖先所犯ê罪」,就是棄sak上帝去拜偶像神明。Chit種行為清楚表明in「破壞了」上帝kah以色列人民祖先之間所「立ê約」。

第11節,chit節tī第14節koh一pái敘述一pái,mā thang參考耶利米書第七章16節、第十四章12節。當審判臨到in身上,陷入性命困境ê時,就算in發出哀求ê聲音,上帝mā bē垂聽。因為in所tú-tio̍h ê性命苦難,是kah上帝ê懲罰有密切關係。

第12到13節,猶大人民因為上帝不回應in ê哀求,就án-ne轉向hiah-ê偶像神明祈求,m̄-koh偶像神明是假ê,無論in怎樣哀求,都無用,因為hiah-ê假ê神明bē講話,mā bē行路,koh khah bē動,根本是lóng無價值thang講ê人造神明(參考耶利米書十:3—5、14—15)。Koh khah害ê是偶像神明竟然充滿tī各地鄉鎮ê大街小巷中。

第14節,chit節thang參考第七章16節、第十四章12節等等。這lóng是teh說明上帝ê憤怒已經達tio̍h siōng koân點,chiah會拒絕聽人tī苦難中發出ê哀求拯救之聲。上帝koh一pái kā先知耶利米講,不ài伊koh再為猶大人民祈求,因為上帝無想beh聽。

第15到17節,chit兩節講出以色列人民tī信仰上已經墮落到分bē清楚到底in所信ê神是甚麼人了。In除了敬拜偶像神明外,mā繼續tī耶路撒冷聖殿中獻祭,koh khah嚴重ê是,in iáu認為用「獻牲祭就ē-tàng消災」,這是非常荒謬ê信仰認知kah態度。先知文獻中一再提起上帝所kah意ê,並m̄是獻祭hō͘祂,卻是用謙卑ê態度遵照祂ê話語去行(參考彌迦書六:6—8,何西阿書六:6,阿摩司書五:21—24)。

過去上帝栽種以色列民族ná親像栽種特選ê果子樹,「用ê是siōng好ê葡萄種」,m̄-koh chit-má上帝beh用「sìh-nà」來「燒光」、「折斷」它。理由是以色列民族「作惡,家己招惹了chit pái ê災禍」,而chit種災禍是kah in「向巴力獻牲祭」ê惡質行為有密切關係。

重新查詢 專卷研經 耶利米書系列
錯誤回報,請聯繫comm[@]fhl.net