雅各書 2章14節 到 2章26節   背景資料  上一筆  下一筆
雅各書作者寫chit本書信ê時代,大約是tī主後六十年代寫做ê,in中間有bē少人lóng是來自猶太教傳承ê第一代信徒,因為過去tī猶太教ê信仰中已經養成了hit種隨便ê信仰態度,即使轉換做耶穌ê信徒,mā是仝款,並無tùi根本上改造做起,因為án-ne,chiah會teh實踐信仰ê行動上缺乏力量。這mā是行洗禮約翰出來傳信息ê時警告hiah-ê前來受洗ê猶太人講ê,tio̍h用實際行為來證明in確實有悔改,m̄-thang認為有祖宗亞伯拉罕作in ê保證人,he是無用ê(參考馬太福音三:7—9)。

雅各書作者Tī chit段經文中一再強調,信心若是無搭配實際ê行動,就無見證thang講。無見證ê信仰,等於無信仰仝款。因為án-ne,做一個信徒beh kah上帝建構合宜ê關係,就是beh用實際行動表現出來,若無,就是無信心。

第14節,所講ê「如果有人講伊有信心」chit句話,表示家己講ê並無算數,因為信心m̄是家己講ê,而是beh用實際行動表現出來chiah算數。

第15到16節,作者引用一個生活中siōng簡單容易bat ê例,來說明伊ê觀點。伊講如果有人「無得穿,無得食」,一個有疼心ê人會馬上就有所反應,而bē講beh用祈禱幫助伊,á是用祝福ê方式回應chit-ê sàn-chhiah者ê苦難。Chit對無得穿,無得食ê人來講,是不切實際ê。

第17節,「信心無行為就是死ê」,chit句話ē-sái講是雅各書作者想beh表白ê思想中心,tī第26節koh一pái提起。Chit節所用ê「死」chit-ê字,tī希臘文是「nekros」,意思是teh指無性命ê活力,bē彈動、反應ê現象。

第18節,chit節反應了早期教會有人為tio̍h信心kah行為之間孰重、孰輕有紛爭,作者認為he是錯誤ê信仰認知,因為伊認為信心kah行為是一體ê兩面,兩個無法度分割。

第19節,作者講「邪靈」mā相信只有一位上帝。換句話講,基督徒相信只有一位上帝是無夠ê。因為án-ne,基督徒若是m̄免實際行動來證明伊心中真正相信上帝,án-ne就無甚麼意義thang講,因為邪靈mā án-ne相信,而且iáu「非常驚上帝」。

第20節,chit節做一個簡單ê結語:無行為ê信心是無用ê。因為無法度產生信心ê效果出來。

第21到24節,作者採用創世記第十五章6節,講亞伯拉罕是hông稱做義人在先,而後chiah有創世記第廿二章1到19節記載有關亞伯拉罕獻以撒ê故事為例,說明信心kah實際行動搭配ê重要性。作者ê意思是teh指亞伯拉罕就是因為先對上帝有絕對ê信心,所以當上帝beh伊kā獨生kiáⁿ以撒做獻祭品ê時chūn,伊一屑á 都無憢疑地就遵照上帝ê旨意去行。伊無停留tī「思考」ê層面phah轉,一再詢問上帝為甚麼beh án-ne?伊遵照對上帝ê信心去行。作者強調只有tī實際行動之下顯示出來ê信心,chiah是真實ê。

第25節,作者koh舉了另外一個例,就是約書亞記第二章所記載ê一則有關妓女喇合ê故事。作者講喇合就是因為排除困難,幫助約書亞ê密探逃離受掠ê危險,因而成做上帝ê子民。因為伊深信帶領以色列人民行出埃及ê上帝chiah是真神。

第26節,chit節就是所讀chit段經文ê總結,作者koh一pái重複強調:信心kah行為是一體ê兩面,無法度分開單獨闡述。Chit-ê「氣息」一字,tī希臘文是用「pneuma」chit-ê字,它ê意思是teh指「空氣」,mā thang做「風」、「呼吸」解釋。換句話講,「pneuma」是teh指活動ê「氣流」,m̄是停止ê狀態。因為身軀若是無流動ê「氣息」,就表示chit-ê人已經死去。

重新查詢 專卷研經 雅各書系列
錯誤回報,請聯繫comm[@]fhl.net