雅各書 2章1節 到 2章13節   背景資料  上一筆  下一筆
Tī chit章經文中一再強調一個重要ê觀念:如果一個人有信,卻無落實在實際ê生活,hit種並m̄是正確ê信。作者並無用真艱澀ê語言á是真oh bat ê神學論述信kah行動之間ê關係。伊用現實社會ê各種生活看會tio̍h ê事做例討論,chit點是非常珍貴ê。Tùi chia mā thang明白,雅各書ê作者其實就是beh kā所有ê信徒講,信仰並m̄是停留tī語言á是文字ê遊戲,卻是真實ê生活境遇。作者強調:生活,就是teh見證所信ê上帝。因為宗教信仰siōng忌諱ê一件事,就是談論多,實踐少。真實ê宗教信仰並m̄是停留tī思想ê層面,而是beh確實付諸行動。

	因為有真chē基督徒是用實際ê行動kā實踐上帝tī耶穌基督內面ê疼,chiah因為án-ne kā福音帶到世界各地去。Thang án-ne講,雅各書對真chē基督徒確實有真大ê鼓舞作用,因為tùichit-ê書信hō͘真chē有理想ê信徒,願意遵行聖經ê教示,以實際行動tī生活中表達對上帝ê信。

    M̄-koh因為chit章ê觀點,引起一kóa討論,認為雅各書作者是teh反對使徒保羅ê「獨獨信」chit種觀點。其實並無然,卻是雅各書寫作ê時代已經是主後六○年代,當時已經有第二代信徒,而且面臨迫害來到,in中間開始有人m̄敢暴露出信徒ê身分等,chiah-ê lóng是作者想beh提出來表白ê理念:如成(chiâⁿ)實信耶穌基督,就beh用行動見證。

    Chit段經文是雅各書中第一pái真具體提起信仰siōng重要ê中心,就是用實際行動來說明。作者用真務實ê行動,清楚ê言語來說明信仰ê準則,包括bē-tàng對富人kah對sàn-chhiah者有接待ê差別,mā提醒信徒tio̍h完全遵守誡命。
    第1節,開始就講基督徒「bē-tàng憑人ê外表,用無仝ê態度對待人」。Chit種信仰準則m̄-nā是用tī教會團契生活中,mā應該是用tī社會生活中。為甚麼雅各書作者會án-ne寫?因為早期教會中發生猶太基督徒kah外邦基督徒之間ê隔閡,m̄-nā無法度同齊食飯(參考加拉太書二:12—13),koh khah免講彼此互相關心ê實際行動出現。雅各書ê作者是一個猶太人,tī「大家lóng是一家人」chit-ê基礎上,伊提倡chit-ê觀念「bē-tàng憑人ê外表,用無仝ê態度對待人」,意思mā是teh ǹg「所有ê人tī上帝面前lóng仝款ê」之信仰基礎論述。

第2到4節,作者tī chia以一個貧富強烈ê對比來說明基督徒如何在生活中實際見證信仰。注意chia特別提起「來到lín聚會ê所在」,表示到教會。Chit時,有錢人是「手戴金手指、身穿華麗衫褲」。Chia會特別強調是「戴金手指」,表示伊ê財富真chē。因為tī第一世紀,黃金是非常稀有ê金屬,只有富貴家族chiah有能力戴「金手指」。Á「華麗ê衫褲」,意思是teh指真耀眼、閃亮、光彩ê衫褲,容易引起人注目、讚歎ê衣飾。相對ê是「sàn-chhiah人」,in是「穿插破爛」。作者所beh表達ê是基督徒對這無仝ê人lóng tio̍h一視同仁。Bē-tàng對有錢人特別細jī,á是藐視、隨意對待hit-ê sàn-chhiah ná流浪漢ê人,又koh是bē-tàng「偏心」,「惡意歧視人」。

第5節,作者講「上帝揀選世間ê sàn-chhiah人,hō͘ in tī信心上富足」,其實mā thang tùi chit節經文來理解,tī早期教會中,富有ê信徒並無chē,大部分lóng是sàn-chhiah而被社會所藐視ê人,m̄-koh in來到教會得tio̍h真大ê鼓勵,因為教會願意接納in,hō͘ in tī性命中得tio̍h極大ê鼓勵。以西結書第十六章3到14節記載,先知提起當年上帝會揀選以色列民族,並m̄是因為in富有、壯大,卻是因為in ná親像棄嬰,一無所有。In chit-má所有ê一切,lóng是上帝hō͘ in ê(另thang參考申命記七:7—8)。雅各書ê作者主要提供一個明確觀念:m̄是因為咱有甚麼好ê條件chiah引起上帝關注、揀選,卻是因為上帝ê疼,揀選咱chiah-ê一無所有、卑微ê人。

第6到7節,tú好kah第5節相對;Tī chit兩節經文中,作者提醒chiah-ê因hō͘ 上帝揀選而得tio̍h富足ê人,卻bē記得家己過去原本就是sàn-chhiah,taⁿ反tńg來欺負sàn-chhiah人。Tùi chit兩節經文thang看tio̍h早期教會已經出現ê問題,就是有kóa信徒tī家己富有後,tńg來過頭來看bē起hiah-ê sàn-chhiah ê兄弟姊妹,chit點是作者無法度容忍ê。

第8節,「愛人如己」,這是摩西律法上非常重要ê規定(參考利未記十九:18),雅各書作者講這是「新國度ê法則」。Tī耶穌基督ê教示中,kā它列為kah「疼上帝」同等重要(參考路加福音十:27—28)。伊講這是hō͘門徒ê新命令(參考約翰福音十三:34),而使徒保羅mā講:「因為全部律法lóng包含tī「疼厝邊親像家己」chit 條誡命內面。(全民版)」(加拉太書五:14)

第9到10節,這是teh回應第1節所提起ê,有人以外表對待人,特別是對hiah-ê有錢人ê態度真溫柔,卻用鄙視(siùⁿ)ê態度對待sàn-chhiah ê人,作者認為chit種態度是違背聖經ê教示,ná親像犯罪仝款嚴重,逃離不了上帝ê審判。第10節mā thang參考馬太福音第五章19節,耶穌基督ê教導。
第11節,作者強調所有誡命ê整體性,是bē-tàng分割ê。作者會án-ne強調律法ê整體性觀念,犯任何律法上ê罪過,lóng是等於傷害了別人,就是無遵行律法、誡命仝款,lóng是對上帝ê一種侮辱。

第12到13節,作者表明一個重要ê信仰觀念:愛是一切律法ê根基。因為án-ne,無論是講話,á是做tāi-chì,lóng一定tio̍h用疼做出發點開始。作者提醒所有ê信徒一定tio̍h明白:若對別人無憐憫ê心,就不beh期待得tio̍h上帝ê憐憫(參考馬太福音六:14—15)。第13節ê「仁慈是贏過審判ê」chit句話,指ê是:若是無上帝ê慈愛,人tī審判中就被定罪à。因為有上帝ê疼,人即使犯罪,上帝iáu是會赦免、憐憫。Koh講,chit句話mā thang當做:會憐憫人ê人,chiah會得tio̍h上帝ê憐憫。

重新查詢 專卷研經 雅各書系列
錯誤回報,請聯繫comm[@]fhl.net