以賽亞書 8章1節 到 8章22節   背景資料  上一筆  下一筆
Chit章繼續談及有關亞述帝國興起,北國以色列kah敘利亞想beh聯盟抵擋亞述帝國ê侵犯,m̄-koh並無想像中hit種如意,in反tńg為家己帶來koh khah大ê災難,而這災難是因為上帝決定無koh看顧in,chhut-chāi in離開,致使國家滅亡,人民hông掠去做奴隸。

第1節,chit種寫字tī「大板」上,而且一定tio̍h是用「正楷」來寫,為tio̍h是beh hō͘人人lóng看會bat chiah-ê公告ê意思。「快搶、速奪」,這是人ê名ê意思,原本名是「瑪烏珥沙拉勒哈施罷斯」。Chit-ê名已經teh暗示:敵人會真緊to̍h來到,而且敵軍力量甚強。

第2節,「chhōe兩個可靠ê人」,原因是ài in「做證人」,而這兩人中間有一位是祭司「烏利亞」,伊tī亞哈斯王執政期間負責tī聖殿事奉(參考列王記下十六:10—11)。另外一位「撒迦利亞」,真可能就是歷代志下第廿九章1節所提起希西家王ê外公「撒迦利雅」。

第3到4節,上帝ài先知以賽亞kā gín-á號名第2節所講ê「緊搶、速奪」。Tú好說明亞述帝國ê興起,其軍事力量崛起ê速度非常緊,就算敘利亞kah北國以色列真緊to̍h因應國際局勢發展而聯盟起來,m̄-koh iáu是無法度抗拒亞述帝國堅強武力ê侵犯。Chia提起「大馬士革所有ê財產」,chit句話ê另外一個意思,就是消滅ê意思。Á「撒馬利亞ê戰利品」,這是teh指亞述帝國已經侵犯tio̍h北國首都撒馬利亞。

第5到8節,chia講「西羅亞溪ê慢流」,chia用「慢流」是teh表示上帝ê照顧、扶持之力,á是上帝hō͘ in ê氣力。M̄-koh顯然地猶大王並無聽先知以賽亞傳出ê信息,上帝會允准亞述帝國會入侵猶大,為tio̍h是beh懲罰背逆上帝ê猶大人民。Chia用「大水,造成氾濫」、「山洪」等詞,lóng teh表示亞述帝國ê雄厚軍力,是無法度抵擋ê。

Chia koh一pái提起「以馬內利」Chit-ê名,表示上帝會kah屬tī祂ê子民同在。Tī第10節koh一pái提起一pái,說明óa靠上帝ê人,必定會得tio̍h上帝ê庇護。Tī chia講上帝ná親像鷹鳥「thí開翼股,保護」細隻鳥á般ê,譬喻上帝無微不至ê看顧猶大ê土地kah人民。

第9到10節,chia ê「列國」,是teh指敘利亞kah北國以色列。Á「遠方ê人」是teh指亞述帝國。無論是敘利亞á是北國以色列,甚至侵犯者亞述等,mā lóng會tī上帝ê手下崩潰。因為上帝一定會庇護祂ê子民。

第11到15節,chit段經文是上帝親自對先知以賽亞所講ê話,ài先知m̄-thang跟tòe民眾行,只要聽從上帝ê旨意就對了。拒絕聽從上帝ê旨意,結果會hō͘上帝ê羅網所絆tòa。

第16到17節,chia講「我ê眾學徒」,意思是teh指聽從上帝ê話ê子民(參考以賽亞書五十:4、五十四:13)。先知以賽亞teh kā所有聽從上帝旨意ê子民講,lóng一定tio̍h「遵守上帝ê教誨」,m̄-thang因為環境變遷,就想beh放棄á是改變對上帝本來ê忠誠。對上帝有絕對信心ê人,一定會堅忍到最後。雖然kui個大環境真無好,kah-ná看bē清楚上帝ê旨意,即使是tī chiah-ni̍h孤獨ê環境下,先知以賽亞真清楚表示,伊iáu-koh對上帝存堅定ê信心,永bē改變。

第18節,chit節真重要,先知以賽亞表示m̄-nā是伊家己對上帝有堅定ê信心,而且kā chit種信心傳承hō͘伊ê子女,hō͘ in繼續為上帝ê救恩做見證。Chia提起「上主所賜hō͘我ê kiáⁿ」,chit句話是teh指聽從上帝旨意ê子民。意思是上帝一直kah信靠祂ê子民同在。Á chiah-ê子民lóng kā繼續見證上帝ê慈愛kah救恩。

第19到20節,chit兩節是對應句。真清楚說明一件事:以色列人民(指南北兩國ê以色列人民)已經受tio̍h迦南民間宗教信仰真深ê影響。特別是當君王帶頭拜偶像ê時,hō͘民間宗教koh khah興盛。對tī上帝ê忠誠度就相對jú低,對上帝ê話語則jú生份。先知以賽亞ài in除去虛假ê宗教信仰,tńg來歸到上帝ê面前,聽從上帝ê教誨kah遵守祂ê律法。

第21到22節,chit兩節講tio̍h上帝ê子民拒絕上帝ê信息了後,必定會招致滅亡。Á當國家滅亡,人民必定會hō͘擄、被販賣去做奴隸。Tī奴隸生活中,過得非常艱辛,m̄-koh卻無法度脫離。因為án-ne,in會「受氣咒罵in ê國王kah上帝」,chia ê「上帝」指ê是in所拜ê偶像神明。M̄-koh chit時chūn無論án怎咒罵,mā無用,因為偶像神明是虛假ê神,任人án怎罵mā bē有任何回應。

重新查詢 專卷研經 以賽亞書系列
錯誤回報,請聯繫comm[@]fhl.net