以賽亞書 7章1節 到 7章25節   背景資料  上一筆  下一筆
第七章kah第八章lóng提起上帝beh懲罰in ê預言。先知以賽亞kah其他ê先知lóng仝款,一再提醒上帝ê子民,性命ê óa靠只有上帝,m̄是軍事武器,mā m̄是政治勢力,上帝chiah是人性命真正重要ê基石。Bē記得上帝,chhōe自認有力量ê對象來協助,有可能暫時thang得tio̍h幫助,m̄-koh結局會失去所有。除非幫助者mā是出tī上帝ê旨意,若無,想beh óa靠人ê氣力得tio̍h拯救,he是非常愚戇ê想法。

Tī chit章經文提起一個重要ê名詞,就是「以馬內利」。這Tī聖經中有三pái提起,除了tī第14節提起,mā tī第八章8節提起,了後tī馬太福音第一章22到23節引用先知以賽亞chit段話koh提起。Chit位詞真清楚teh說明:上帝kah你同在。用chit位詞teh表明上帝就是幫助者,因為有上帝kah咱同在,就m̄免擔心大風湧ê吹襲kah搖動。Chit種信息,對當時原本「非常驚惶」ê南國猶大人民來講,應該是真大ê鼓舞,可惜ê是國王聽bē落去chit種信息。

第1節,「亞哈斯作猶大王」,伊大概是tī主前735年左右執政,當時年約20歲,總共執政有16年ê時間,直到主前719年左右。Tī伊任內發生北國以色列聯合鄰國敘利亞ê軍隊,共同攻打耶路撒冷,這大概是tī亞哈斯執政ê兩年後,就是tī主前733年。Chit pái進攻,雖然無攻落耶路撒冷,m̄-koh卻hō͘猶大失去大約十二萬精兵,而且大約有二十萬人民(包括婦女而同在內)hông掠去撒馬利亞,連同真chē財物mā被劫行(參考歷代志下廿八:5—8)。後來因為有一位先知俄德出來譴責北國以色列軍隊chit種行為,北國以色列chiah kā chiah-ê被俘虜ê猶大人民釋放tńg去(參考歷代志下廿八:9—15)。

第2節,「敘利亞軍隊開進以色列境內」,這表示兩國同盟,以色列hō͘敘利亞軍隊進入,主要就是beh kah in組成聯軍進攻猶大。因為án-ne,當chit-ê消息傳到耶路撒冷ê時,猶大ê亞哈斯kah人民lóng非常驚恐不安。作者用「樹枝tī狂風中搖擺」,表示社會非常動盪不安。

第3到6節,這是上帝ài先知以賽亞去傳達信息hō͘驚惶中ê亞哈斯王。上帝ài先知以賽亞帶伊kiáⁿ「施亞雅述」同齊去見亞哈斯王。Chit-ê名ê意思是「少數人teh-beh 回鄉」(參考十:20—22)。Tio̍h注意chia ê「少數」,表示真chē人kā因為án-ne喪失性命,因為只有少數人ē-tàng保存性命。先知以賽亞用伊ê kiáⁿ「施亞雅述」Chit-ê名ê意義,是beh警告亞哈斯王,若是去走chhōe亞述帝國軍援,到最後會ná親像「施亞雅述」Chit-ê名仝款,只有少數人ē-tàng保存性命。因為án-ne,ài先知以賽亞去kā亞哈斯王講,m̄-thang驚惶敘利亞kah北國以色列ê聯軍。Beh hō͘亞哈斯知影,真正ē-tàng幫助伊ê,就是全能ê上帝,並m̄免驚他國ê強兵武力,ài伊改變態度,對上帝有信心。同時mā hō͘亞哈斯王知影,雖然以色列kah敘利亞聯盟,m̄-koh「的確另外有陰謀」,目的是逼猶大加入in,合力抵抗亞述帝國ê興起。Koh講,chia mā特別提起另外一則比較khah恐怖ê事,就是牽亂講到竄奪王位ê事,就是in想kā亞哈斯廢掉,然後擁戴敘利亞人「伊比勒ê kiáⁿ做王」。

第7到9節,上帝繼續透過先知以賽亞傳達信息hō͘亞哈斯王。Beh hō͘亞哈斯清楚知影,以色列kah敘利亞ê聯盟計畫一定bē成功,m̄-koh khah重要ê是特別提起北國以色列teh beh tī 65年內亡國,這是非常hō͘人大tio̍h驚ê信息。其實,北國以色列是tī主前721年被亞述帝國hō͘消滅(有關北國以色列滅亡ê情況,在列王紀下第十七章有真詳細ê記載),比起先知tī chia所講ê時間提早koh khah chē。先知以賽亞提醒猶大王亞哈斯一定會信靠上帝,m̄-thang kah北國以色列、敘利亞等同盟,ná親像第7節所提起,chit項結盟是bē成功ê。

第10到11節,先知以賽亞向亞哈斯王提出建議講,若是m̄相信先知ê信息,伊thang向上帝祈求一個明確ê記號,好加添伊對上帝ê信心。這有可能是因為先知以賽亞ài伊m̄-thang走chhōe外國軍援,tio̍h專心óa靠上帝ê帶領ê時,亞哈斯王認為這並bē-tàng行。因為án-ne,先知以賽亞做出chit種建議,beh幫助伊確信這是上帝ê信息。Á chit句「記號可能來自陰間,mā可能來自天頂」,意思是teh指上帝掌管ê宇宙間,lóng可能出現記號,因為上帝並m̄是只掌管天頂,mā掌管tio̍h陰間。

第12節,亞哈斯王回答先知以賽亞,認為向上帝祈求記號,是對上帝有所懷疑(試探),伊m̄敢án-ne祈求。表面上看起來伊kah-ná真有信心ê款,其實不然。因為伊原本就懷疑上帝,上帝疼惜伊,願意顯現一個記號作為確實ê保證,好堅定伊ê信心。M̄-koh伊拒絕,tú好講出伊ê懷疑kah m̄信,mā顯示了伊ê愚戇。

第13到16節,先知以賽亞當然清楚亞哈斯王ê心態,因為án-ne,用真嚴苛ê話回應了伊,講伊「iáu koh khah hō͘上帝厭煩mah」Chit句譴責ê話語,意思是teh指怎樣ē-tàng對上帝hiah-ni̍h無信心。先知直接講出上帝beh親自hō͘伊一個記號,就是:「有閨女會有娠生kiáⁿ,並要求hō͘伊號名『以馬內利』。」這意思是「上帝kah咱同在」。Tī耶穌出世ê時,馬太福音作者mā引用chit節經文(參考馬太福音一:23),來表示耶穌ê降生,就是teh代表上帝kā進行祂奇妙ê拯救。先知以賽亞講chit句話,是teh kā亞哈斯王講,上帝kā永遠kah祂ê子民同在。先知同時表示:當chit-ê預言beh出世ê嬰á iáu未長大chìn前,「兩個暴君ê國土lóng tio̍h荒廢」;而chit兩個暴君,就是teh指敘利亞王利汛kah以色列王比加。Chit句話mā說明敘利亞kah以色列lóng會hō͘滅亡。Á這預言果然分別tī主前732年kah主前721年應驗ā。

第17節,先知直接kā亞哈斯王講,因為伊m̄信上帝,對上帝用藐視ê態度,因為án-ne,上帝beh降災禍tī伊kah伊ê人民身上。Chit種災禍是「自以色列tùi猶大分裂出來了後,無發生過」,就是teh指滅亡。後來chit件事tī亞哈斯ê kiáⁿ瑪拿西執政ê時,koh khah敗壞。Chia講會滅亡tī亞述,m̄-koh亞述後來被巴比倫帝國所滅,然後就是tī主前586年,巴比倫帝國消滅了猶大。

第18到19節,chia特別提起兩個強大國家,一是埃及,另外一是亞述。先知以賽亞tī chia用兩種昆蟲來表示chit兩個強猛國家ê氣力,伊用「胡蠅」來表示埃及,「黃蜂」表示亞述。Koh講,用「胡蠅」kah「黃蜂」,mā teh表示in ê數量極chē,除非有上帝ê幫助,若無,人ê氣力根本無法度抵擋。

第20節,kā亞述帝國ê皇帝用「理髮匠」來形容。「刮掉鬍鬚」,以及剃光「頭毛」,kah拔除身上所有「汗毛」等,chiah-ê動作lóng teh表示極大ê侮辱(參考撒母耳記下十:3—5)。另外一方面mā teh表示土地頂面ê花草樹木ê意思。因為án-ne,剃光、拔除chiah-ê花草樹木,等於是hō͘土地遇tio̍h極大ê摧殘,無koh有任何植物生長出來,包括所有ê果園等lóng kā徹底被蹂躪殆盡,ná親像廢墟仝款,而這是用火燒,chiah會有ê慘重災情。

第21到22節,因為有第20節拔光、燒光一切植物ê災情,結果hiah-ê人只有ē-tàng tńg來復到siōng早ê放牧生活,因為田地已經無法度復耕,果園lóng遭到à摧殘,而無法度種植任何果子樹。因為án-ne只有chhun落來幾隻小牛kah山羊,而人tio̍h óa靠chiah-ê牛羊微薄ê乳汁生活,á是採集野蜜果腹充飢。這表示hiah-ê人ê生活非常困苦。

第23到25節,mā是延續第21節ê災情了後,所帶來ê就是sàn-chhiah現象。Chia用「刺phè」來形容生活ê痛苦,如同在刺phè中chhōe thang食用ê果子仝款困難。即使是想beh chhōe任何thang食ê食物,tī「遍地刺phè」ê環境中,mā是真oh,這表示災情確實真嚴重。

重新查詢 專卷研經 以賽亞書系列
錯誤回報,請聯繫comm[@]fhl.net