以賽亞書 66章12節 到 66章24節   背景資料  上一筆
Chit段經文是本章經文ê結尾,mā是第五十六到六十六章ê結束。Chit段經文有一個特色,就是用「火」開始(參考第17節),mā用「火」結束(參考第24節)。Á「火」Tī聖經中,表明上帝審判ê方式。Koh講,聖經每pái提起上帝ê審判,就是毀滅,m̄-koh另外一方面近óa跟tòe tī審判了後ê,就是上帝重新創造ê時帶來ê賜福,hō͘ hiah-ê忠於祂ê子民有一個新ê生活環境。Chit段經文談起上帝賜福祂ê子民tī耶路撒冷享受特別ê救恩,相對tī in受掠tī巴比倫ê生活,兩個之間有差大碼。

第12到13節,chia講上帝beh賞賜hō͘耶路撒冷「久長繁榮」,並且「萬國ê財富會親像川流不息ê溪水」。這是因為古代社會有一個觀點:財富是一個人榮耀ê記號,m̄-nā表示能力,mā表示上天ê賜福。Koh講,先知以賽亞mā用像「老母親自餵奶ê gín-á」來形容性命siōng大ê安全,就是án-ne。上帝beh「tī耶路撒冷安慰」以色列人民,「像老母安慰家己ê gín-á」,譬喻上帝對祂子民有極大ê疼kah關心保護,ná親像老母看tio̍h受傷ê gín-á teh啼哭,hō͘ in安慰kah鼓勵。

第14節,chit節是第12到13節ê結語,當大家看見chit種景況ê時,就會知影he是上帝伸手扶持祂ê子民,chit時,上帝ê子民必定會「歡欣快樂」、「健康興盛」等,同時,上帝mā會出手懲罰hiah-ê棄sak上帝、對敵上帝ê人。

第15到16節,「上主beh帶火來」,chia ê「火」代表上帝ê忿怒。上帝mā會用「火kah劍」,進行審判ê工作,懲罰hiah-ê惹祂忿怒ê人。Á祂ê審判速度極快ná親像「騎tī旋風ê翼股」,人絕對無法度逃離。

第17到18節,chit兩節是繼續第15到16節所提起ê關係上帝審判ê情景。所謂「行異教潔淨儀式ê人」,是teh指tī禮儀上並無忠實地謹守上帝規定ê人。上帝清楚「知影in ê心思kah行為」,因為án-ne,上帝會「召集萬國ê人民」,進行公開ê審判,hō͘所有ê人lóng清楚知影上帝ê忿怒(參考以賽亞書四十三:9、四十五:20)。

第19節,chia真清楚提起懲罰hiah-ê大國ê統治者kah人民ê,就是上帝。因為祂chiah是真正ê主宰。除了懲罰悖逆ê子民外,上帝mā會「留落來一kóa人」、「殘存ê人」,以及「劫後餘生」ê人等,上帝beh留落來chiah-ê人當做新ê子民(參考列王記上十九:18)。Chiah-ê留落來ê子民會成做上帝忠實ê奴僕,被差派到「各國kah遙遠ê所在去」見證上帝ê救恩。上帝beh差派chiah-ê人到「從來無人聽見過」上帝ê名ê所在,mā就是偶像神明崇拜非常興盛ê所在。Chiah-ê地方包括:

「伊施」,這是teh指chit-má ê西班牙。設tī地中海另外一端,是當時航行被看做siōng遙遠ê港口。

「利比亞」,tī希伯來文是用「普勒」Chit-ê名稱,設tī埃及ê西邊。

「以善射出名ê呂底亞」,chit所在設tī小亞細亞中西部。特別指出是「善射出名」,表示hia ê人真會使用武器,到hia去傳揚上帝ê榮耀ê時,若小khóa無注意,真可能tùi án-ne hō͘家己ê性命受tio̍h威脅。

「土巴」,雅弗後代ê kiáⁿ孫(參考創世記十:2),通常lóng會kah「米設」連做伙(參考以西結書三十九:1,chit節講in ê統治者是歌革,而這歌革是teh指邪惡ê勢力(參考啟示錄二十:8)。

第20到21節,chiah-ê hō͘上帝差派出去傳揚上帝ê權能kah奇妙作為ê人「tńg來」ê時,lóng會帶hiah-ê受掠賣到各地去做奴隸ê「同胞」tńg來。Chia mā講chiah-ê同胞tńg來ê時,並m̄是用奴隸之身,卻是帶榮耀、體面ê樣式。因為in lóng是「騎tio̍h馬、騾、駱駝,坐戰車kah貨車」到敬拜上帝ê「聖山」,chiah-ê交通工具lóng是當時ê人所使用ê交通工具,表示所有想beh到耶路撒冷錫安山頂獻上感謝祭ê人,是想beh盡了所有ê辦法,只要ē-tàng用ê交通工具lóng會採用。

另外一方面mā teh表示回歸故鄉ê人真chē,有來自各種無仝文化ê地區,甚至mā包括含了外族人在內(參考五十六:8)。因為chit-ê緣故,tī chiah-ê回鄉同胞中,mā有kóa是外族人,卻被按立為祭司,ná親像利未人仝款,thang參與獻祭ê工作。

第22到23節,chit-ê上帝所重新創造ê新世界來臨ê時,就是永恆ê臨到,所有尊崇上帝ê子民tī「每月ê初一kah安息日」lóng會聚集「到耶路撒冷來敬拜」上帝,包括「各國ê人民」,mā lóng會到耶路撒冷來敬拜上帝。換句話講,耶路撒冷就是一個新ê時代,kah過去完全無相仝。

第24節,chit節作為以賽亞書ê總結尾。Chit節講出背叛上帝者最後ê結果,kah hiah-ê堅守kah上帝ê約ê子民,完全顛倒。Chit句話表示hiah-ê因為背叛上帝而受tio̍h嚴厲懲罰ê人,連死後lóng無法度埋葬,而暴露tī外面hō͘人看見死狀。Tī chit種人雖死iáu-koh beh受苦,身上會有「蟲永遠bē死」以及「火永遠bē熄滅」。

重新查詢 專卷研經 以賽亞書系列
錯誤回報,請聯繫comm[@]fhl.net