以賽亞書 58章1節 到 58章14節   背景資料  上一筆  下一筆
Chit章koh一pái指出以色列人民之所以恨淪落為巴比倫ê奴隸,是因為in真正棄sak了上帝,無kā上帝khǹg tī in眼內,甚至用虛假ê態度敬拜上帝。Chit種虛假ê敬拜,等於是teh褻瀆上帝ê神聖仝款嚴重。Koh講,tī chit章中,mā koh一pái提起kui個先知運動中共同ê信息,就是一個會真實遵行上帝旨意ê人,必定會知影用仝款真實ê心建立kah別人之間ê關係。換句話講,真實ê宗教信仰,應該kah社會生活連成一體,卻m̄是分開ê。

第1節,「你tio̍h大聲叫,像號角hit種響亮」,chit句話已經清楚表示,上帝ài先知以賽亞公開而且嚴厲責備以色列人民,beh嚴厲指出in ê「罪狀」,就是背叛上帝ê教示、旨意。

第2節,chit節指出以色列人民並m̄是真正認bat上帝。Koh khah嚴重ê是,in表面上看起來是「ta̍k工敬拜」上帝,看起來kah-ná「歡喜知影」上帝ê「道路」(話語),m̄-koh事實上並m̄是án-ne,表現出來ê只不過是虛假面貌而已。

第3節,chit節thang參考瑪拉基書第三章14到15節。先知以賽亞清楚指出以色列人民真正ê問題所在,就是只做到表面功夫。包括in禁食ê用意mā是仝款,lóng是有目的ê,beh hō͘人看見,á是想beh kah上帝討價ê。因為án-ne,上帝指出in「一邊禁食,一邊做家己想beh做ê事」,iáu會「欺壓工人」,chit種態度mā是teh藐視上帝ê神聖。注意chia ê「工人」,是teh指Tī痛苦中勞苦工作,m̄-nā酬勞真低,工作ê時間koh真長,真親像奴工仝款。

因為「禁食」原本是一種自卑ê表示,to̍h是tī上帝面前àⁿ頭ê意思。因為án-ne,禁食ê基本態度應該是tùi真實謙卑、認罪ê心開始。若是無懺悔、謙卑ê心,即使禁食真久,mā是枉然。Á是想用禁食hō͘上帝歡喜,ná koh khah是錯誤ê思想,kah無正確ê信仰認知(參考以賽亞書五十八:3—9)。

第4到5節講tio̍h以色列人民jú「禁食」,心性卻是「koh khah凶暴」,甚至出現「吵鬧、phah架」等行為,這表示in完全聽bē落去上帝ê話。原本禁食應該是hō͘人koh khah謙卑、認罪,表示就án-ne願意遵行上帝ê旨意chiah-tio̍h,m̄-koh chit-má表現出來ê tú好顛倒。有ê人是禁食是為tio̍h beh hō͘別人看見。就án-ne用「虐待家己,垂頭喪氣」,看起來kah-ná是禁食真久,無食飯,致使全身lóng無元氣ê樣式,ná親像teh要「凋謝ê花朵」。甚至是「tī土腳鋪麻布,掖灰」,hō͘人看起來kah-ná真正是teh懺悔、認罪,其實,心內並m̄是án-ne。上帝真清楚人ê心思意念。因為án-ne,chit種虛有ê外表,只有ē-tàng欺騙人ê眼目而已,m̄-koh無法度瞞過上帝,因為祂會鑒察人ê心內意念。

第6到7節,chit兩節講出kah頭前第3到5節顛倒ê態度。Chit兩節講tio̍h上帝beh ê禁食,是「解除欺壓ê鎖鍊」,這是teh指不ài tī欺壓工人、箝制工人。然後ài kā「食物分hō͘ iau餓ê人」,hō͘「無家可歸ê sàn-chhiah人」thang有厝thang過瞑,hō͘ hiah-ê「赤身露體ê人」有「衫褲」穿,並且「m̄-thang拒絕求助無門ê人」,chiah-ê lóng明確指出對貧困者ê憐憫tio̍h用實際行動來表達。

第8到9節a句,如果上帝ê子民chiâⁿ實照第6到7節所記載去做了後,上帝講一定會得tio̍h chit種結果:一是上帝會「歡喜」並歡喜接納in;二是會親像「晨曦hit種照耀」in,表示有性命ê ǹg望出現;三是in ê「創傷就ē-tàng馬上得tio̍h醫」;四是上帝會「隨時搭救」;五是只要in「祈禱」,上帝一定會「應允」,垂聽in ê「呼求」。

第9節b句到10節,chit段經文是繼續上帝對in實踐祂ê旨意之應允。包括有:一是「停止欺壓」、「指責人」,這是teh指當眾侮辱伊人ê意。Chit款tāi-chì情不時發生tī有權勢ê人身上,in時常會用自高á是藐視ê方式指責比伊勢力弱小者。不「毀謗人」是teh指做假見證陷害別人。二是in果然真正會「hō͘ iau餓ê人食」,hō͘「窮困ê人得滿足」,注意chia ê窮困,包括第7節ê「無家可歸ê sàn-chhiah人」,以及「the̍h衫褲hō͘赤身露體ê人」等,上帝kā會hō͘ in生活中所tú-tio̍h ê性命困境得tio̍h解除。

第11到12節,chit兩節是teh回應第9到10節所提起ê「假使」。若是以色列人民chiâⁿ實kā第9到10節所講ê惡質行為排除掉,就會得tio̍h上帝ê應允。上帝會「引chhōa」in。Án-ne,in就bē受tio̍h敵人ê侵犯。因為有上帝帶領,必定bē有缺乏,會有「美物滿足」in ê需要,即使「tī炕旱中」,也ē-tàng「得滋潤」、「水源充足」,會有「永遠bē乾涸ê泉水」tī in khiā起ê土地頂面,in m̄免擔心發生饑荒。因為án-ne,in ē-tàng「tī廢墟重新建造」,「tī本來ê根基上復興」,chit-ê意思是teh指過去遇tio̍h摧殘ê家園,會得tio̍h重建家園ê能力,hō͘ in脫離奴隸ê生活,重獲自由。

第13到14節,koh一pái重新強調遵守安息日ê重要性。因為安息日是上帝看做神聖ê日子,會遵守安息日ê人,mā表示kā家己分別出來,作神聖上帝ê子民。Chit種人必定會得tio̍h上帝賜福,上帝怎樣賜福tī以色列人民祖先,mā會仝款賜福tī in chit-ê代子民身上。Chia提起幾件事:包括不「做私事」,因為tī安息日做私事,tú好teh表示chit種人根本就無kā上帝看做重要,卻是kā家己看做性命ê中心。Koh講,這「做私事」mā有另外一個含意,是teh指放縱情慾。二是不tī安息日「旅行」,表示bē記得上帝,去遊sńg作樂。三是不「工作」,表示m̄做seng-lí、thàn錢。這mā是先知耶利米傳達上帝ê話ài in停止ê行踏(參考耶利米書十七:19—27)。四是不「講閒話」,thang參考申命記第十八章20節,意思指假借上帝ê名義發言,講不誠實ê話,chit種行為等於kā家己ê話當做是上帝ê話,chit種人ná親像假先知仝款。因為,tī安息日應該傳達ê是上帝ê信息,m̄是個人ê想法á是話語。

若是chiâⁿ實確實án-ne遵行安息日ê規定,上帝一定會有回應,包括賞賜「喜樂」,這表示有上帝ê賜福tī性命中,ná親像乾旱ê土地有甘霖滋潤(參考第11節)。Hō͘ in「在世間四界受尊重」,並無koh淪為亡國ê子民,受統治者ê輕視、唾棄。卻是thang tī世人面前昂首闊步,tī上帝所賞賜ê土地頂面「享安樂」,這是teh指bē有外族、列強來侵犯,thang tī家己ê土地頂面安居樂業。

重新查詢 專卷研經 以賽亞書系列
錯誤回報,請聯繫comm[@]fhl.net