以賽亞書 55章1節 到 55章13節   背景資料  上一筆  下一筆
Ná親像前一章已經提起過ê,第五十四到五十五章,就是第二ê時期以賽亞書ê總結,講述上帝beh重新復興,並且重建耶路撒冷kah以色列人民。Chit章ê主題就是teh強調,一定會「聽上帝ê話」,這mā是聖經一再強調ê中心思想:性命ē-tàng存活是因為順服上帝ê話。

Tùi chit章ê詩歌中mā thang看出人性ê軟弱;當以色列人民tùi巴比倫被波斯帝國釋放回鄉、重建家園了後,無jōa久受tio̍h過去tī巴比倫生活近半世紀ê物慾化生活所影響,以色列人koh一pái bē記得上帝ê話。因為án-ne,先知以賽亞koh一pái提出呼籲,tio̍h以色列人民記tiâu上帝ê話,chiah是性命真正重要ê生存要件。

第1到2節,詩人先知以賽亞一開始就講「嘴乾ê人,來pah」,呼籲所有上帝ê子民tio̍h注意聽上帝ê信息,就kah-ná對「嘴乾」ê人講「chia有水lim」,mā親像上帝帶領以色列人民出埃及進入曠野ê時,hō͘石磐湧出泉水kā in賜福,mā ná親像tùi天頂降落嗎哪養飼in,chiah-ê水kah糧食lóng「m̄免開錢,不付代價」,而且賞賜kā in賜福khiā起ê迦南地乃是流奶kah蜜之地。既然án-ne,為甚麼上帝ê子民iáu koh khah「開錢去買ná食bē飽ê物件」?「為甚麼浪費工錢」去買chit種食bē飽,á是講食了,結果iáu是「iáu-koh iau餓」ê物件?先知ê信息真清楚,ài in注意聽上帝ê話語,照上帝ê吩咐去做,就會「享受siōng好ê食物」,mā才能hō͘ in ê「心靈得tio̍h飽足」,因為上帝ê話語是心靈ê食物。

第3節,chia真清楚講出「注意聽」上帝ê話,就ē-tàng得tio̍h「性命」,因為上帝就是用祂ê話創造宇宙萬物ê性命。M̄-nā án-ne,只有聽從上帝ê話ê子民,上帝就會kah chit種子民「立永遠ê約」,而且chit-ê約是kah大衛有關,表示上帝bat應允大衛,beh hō͘伊ê kiáⁿ孫永遠掌理猶大王國,先知以賽亞用chit種方式講出上帝極大ê慈愛(參考以賽亞書五十四:10)。
第4到5節,thang參考創世記第十二章3節。

先知以賽亞tī chia koh一pái重申上帝對大衛ê疼,上帝beh hō͘ kah祂立落來性命之約ê子民「作萬國ê領袖kah元首」,並且beh「藉tio̍h」Chit位被揀選ê領袖,彰顯出上帝ê能力,hō͘「列國」lóng來歸順「投靠」,成做極大ê「榮譽」。

第6到7節,先知提出誠懇ê呼籲,ài大家「趁上帝teh chhōe」、「thang靠近」ê時chūn,趕緊「chhōe」、「求告」上帝。Chhōe、求告上帝ê人必定會「棄sak邪惡ê道路」,並且「回心轉意」,chit種人一定會得tio̍h上帝ê「憐憫」、「闊赦」。

第8到9節,chit兩節講出上帝kah人之間ê cheng差;上帝是永恆ê,而人ê性命卻是目nih-á ê;上帝是看人心內ê「意念」,而人卻只有ē-tàng看tio̍h人ê外表。Chia所講ê「道路」,是teh指性命ê方向、目標。

    第10到11節,chit兩節強調只要上帝ê話一出口,必定照祂家己ê旨意完成。上帝ê話,包括祂對人ê應允。所謂上帝ê話「像雪kah雨tùi天而降」,意思指上帝ê話是滋潤大地ê細雨、甘霖,ē-sái大地充滿蓬勃ê性命力(參考詩篇六十五:9—13)。如果人聽從上帝ê話語,就會親像án-ne充滿活力,bē lian去。因為上帝ê話永bē改變(參考以賽亞書四十:8),而且一定會照所講ê實現,「從來m̄-bat落空」。

第12到13節,chit兩節koh一pái指出上帝beh帶領祂ê子民「歡歡喜喜」kah「平平安安」地tńg去故鄉。因為是上帝親自帶領in離開巴比倫(參考五十二:12),就ná親像早年上帝帶領以色列人民ê祖先離開埃及仝款,in經過ê路徑連樹木mā會拍手叫好。Chia用「松柏」kah「番石榴」來做上帝應允ê記號,chit兩種樹木kah果子是上帝應允ê記號。

重新查詢 專卷研經 以賽亞書系列
錯誤回報,請聯繫comm[@]fhl.net