第五十四到五十五chit兩章是第二ê時期以賽亞書（mā就是tùi第四十到五十五章）ê結尾。有kóa學者認為chit兩章是chit段經文ê「附錄」，主要teh說明一個新時代teh beh來臨。因為án-ne，Tī chit段經文中充滿tio̍h喜樂、ǹg望，kah前段受難奴僕ê詩歌真無仝款。Koh講，chit兩章經文mā說明一個重要認bat：雖然波斯帝國hō͘上帝揀選做奴僕，beh執行ê任務是釋放以色列人民tńg去故鄉，並且協助in重建家園。M̄-koh真正ē-tàng hō͘以色列人民復興起來，而且恢復過去榮耀ê是上帝。

Tùi chit章thang看tio̍h一個重要主題：平安。Chit-ê主題mā是每一個時代ê人民所燒熱切期待得tio̍h ê福氣。真正平安是tùi上帝來，m̄是用人靠家己ê氣力ē-tàng得tio̍h。

Chit段經文用夫妻ê關係做譬喻，說明上帝kah以色列民族之間ê關係。詩人特別強調上帝並無永遠遺棄以色列人民，卻是「暫時」ê。因為以色列人民bat背叛上帝，上帝用chit種方式懲罰in，m̄-koh上帝永遠深teh疼以色列人民。

第1節，使徒保羅tī加拉太書第四章26到27節引用chit節經文。

Chia講以色列人民就「ná準無法度生育ê cha-bó͘-gín-á」，表示是一件極大ê見笑。「m̄-koh chit-má」已經完全無仝，原本離開ê丈夫tńg來到伊ê身邊，因為án-ne伊發出「歌唱」、「歡呼」ê聲音。

第2到3節，thang參考第四十九章19節。

Chit句「擴張你khiā起ê帳棚」，是teh形容以色列人民tńg去故鄉了後，khiā起kah活動領域會擴大（參考四十九：20）。Koh講mā表示人口會增加，kah第1節所講ê「生養koh khah chē」仝款ê意思。因為人口chē，所以一定tio̍h「giú長帳棚ê索á」，表示帳棚jú來jú大，mā說明上帝賞賜hō͘回鄉了後ê以色列人民，koh khah有性命力kah活動力，生活ê環境khah美好。雖然chit-má是hō͘波斯帝國塞魯士統治，以色列人民卻「tio̍h回歸故土」，而且重新繁榮起來，hō͘過去長到五十年之久，早已經「荒蕪ê城鎮」，koh一pái「人煙稠密」。
 
第4到5節，參考第四十四章2節a句、第四十六章4節、第廿六章20節。

過去因為被俘虜到異國去做奴隸是件見笑ê事。M̄-koh chit-má上帝已經赦免in，beh重新kah in同在。上帝kah以色列人民重新恢復夫妻ê關係。

第6到8節，chia koh一pái用夫妻關係來比並，說明上帝beh「娶」以色列人民tńg來，並且重新立約。過去上帝會「暫時離開」in，是因為in家己棄sak上帝，並m̄是上帝棄sak in。Koh講，這「暫時」是teh表示目nih-á ê懲罰。M̄-koh上帝對以色列民族ê疼「卻是永久」ê，chit點mā是聖經ê主軸信息。

第9到10節，thang參考創世記第八章21節。Chia引用上帝對挪亞ê應允，祂beh koh一pái hō͘以色列人民一個重大應允—無koh向以色列人民「受氣」，這是極大ê恩典，mā表示上帝對以色列人民有極大ê赦免、憐憫，無koh計較in所犯ê罪（參考十二：1、四十：2）。上帝beh重新kah以色列人民立「平安ê約」，chit-ê約表明出來ê疼「永遠bē搖動」。