以賽亞書 52章1節 到 52章12節   背景資料  上一筆  下一筆
Chit段經文是繼續前段第五十一章17到23節有關耶路撒冷kā得tio̍h上帝拯救ê信息。先知以賽亞傳出ê信息非常清楚,伊講上帝已經施展祂大能ê手,beh拯救以色列人民脫離一切捆縛,beh hō͘ in平安而且不需付出任何代價,就ē-tàng順利tńg去故鄉耶路撒冷。

然後tī第7到12節是一首o-ló歌頌上帝ê詩歌,主要teh歌頌上帝來到聖城耶路撒冷掌權。後來,chit種詩歌變成國王登基ê時,聖殿詩班所頌讚ê詩歌。

第1到2節,chia一開始就講上帝ê子民teh-beh「moa榮美ê衫褲」,而且「異族ê人無koh任意」地進入in ê「城門」,這因為上帝伸手救助祂ê子民,beh hō͘祂ê子民tùi被踐踏ná親像「土粉」中koh一pái khiā起來,koh khah特別ê是hō͘ in登上上帝榮耀ê「寶座」,無人敢koh再輕視in。

第3節,這是一節相對句。In是hō͘俘擄而賤賣到外國去,所以無資格kah俘擄in ê人談任何籌碼。chit-má上帝拯救in,mā是特殊ê恩典,既然是恩典,就無法度用任何代價thang換來得tio̍h,因為這是白白ê恩典。

第4到5節,chit兩節真簡短ê敘述了以色列人ê歷史。Chia講以色列人民「到埃及去寄居是自願去」,chit句話thang參考創世記第四十六章1到27節。當年以色列人是為tio̍h避開迦南地嚴重饑荒,koh因約瑟tī埃及做宰相,thang庇護雅各家族bē因饑荒受tio̍h死亡ê威脅。因為án-ne,雅各舉家遷徙到埃及去。Á chit句「亞述人用武力kā lín掠去」,thang參考列王記下第十七章5到6節,是teh指主前721年,北國以色列被亞述帝國滅亡,人民受掠送到各地販賣為奴。chit-má是「巴比倫發生仝款ê事」,這是teh指主前586年,巴比倫帝國消滅了南國猶大,kā人民掠去巴比倫做奴隸。無論是亞述á是巴比倫,in lóng是因為戰敗hông掠去做奴隸,根本就無自主權。無論是亞述á是巴比倫lóng仝款,in lóng是「統治者」,in lóng「心高氣傲」,而且「不斷來蔑視」上帝,這mā是上帝beh出手懲罰in ê原因。

第6節,「有一工」,意思是teh指以色列人被巴比倫釋放ê hit一工。上帝beh koh一pái kah祂ê子民立約。

第7到8節,tùi chit節開始到第12節,是一首o-ló歌頌上帝ê詩歌。

Chia講有以前線走tńg來報信ê人,伊「爬山jú嶺而來」,主要目的是beh傳捷報,是「好消息」,thang hō͘後面ê人民ē-tàng安心,而且用歡喜ê心情慶賀。因為戰爭「得勝」了,上帝是得勝者,祂beh重新「掌權」。因為走來報這好消息ê人一傳開chit-ê消息,所有「城上ê守望者」,一聽tio̍h就「高聲」呼喊並「同齊歡呼」。

第9到10節,上帝既然出手救贖祂ê子民,chit種「神聖ê氣力」必定會震撼所有看見ê人,mā清楚知影無任何國家、軍隊、君王有力量ē-tàng阻擋上帝chit種決定。

第11節,因為波斯帝國ê塞魯士皇帝下令,beh kā巴比倫帝國kā一切in tùi耶路撒冷聖殿掠奪ê聖器,全部交iáu hō͘以色列人民,並且釋放以色列人民tńg來故鄉。此外,伊iáu一定tio̍h贈送大筆金錢hō͘以色列人民,作為in重建聖殿ê路用(參考以斯拉記第一章)。Á chiah-ê屬tī聖殿用ê器皿lóng是「聖物」,因為án-ne,就一定tio̍h tùi利未人小心地kā它「保持潔淨」,免得玷污了聖物ê聖潔。

第12節,chit節強調以色列人民回鄉,並m̄是親像奴隸逃脫仝款是「匆忙奔逃」,顛倒ê,in是非常有尊嚴ê離開巴比倫,因為有上帝親自在「頭前領導」in離開被奴役之地。M̄-nā án-ne,上帝mā tio̍h tùi「後面保護」in,hō͘ in前後lóng真安全,無人敢來攻擊、掠奪in。這就類似出埃及ê時ê景況(參考出埃及記十三:20—22、十四:19)。

重新查詢 專卷研經 以賽亞書系列
錯誤回報,請聯繫comm[@]fhl.net