以賽亞書 49章8節 到 49章26節   背景資料  上一筆  下一筆
Chit段首詩kah第四十章1到11節ê詩歌內容有真chē類似ê所在,是koh一pái確定上帝beh伸出救助ê手,帶領以色列人民重頭tńg來已經荒廢好許久ê家園,而這mā是hō͘掠到異鄉去過奴隸生活ê以色列人民日瞑所ǹg望ê大事。

Tùi chit章第14節開始直到第五十章,lóng是teh說明以色列人對上帝無koh心存ǹg望,m̄-koh,上帝卻一再表明無bē記得祂ê子民,一定會拯救in,chit兩種無仝ê反應交織做伙。Tī chia ê詩歌中,作者有三pái提出問題,就是第14節、第21節,kah第24節。然後第15到20節回答第一個問題;第22到23節回答第二個問題;第25到26節回答第三個問題。

第8節,chit節ê詩歌真清楚,表明上帝會重新kah伊ê子民和好,beh「垂聽」、「幫助」、「保護」in,並且beh重新帶領in tńg來到故鄉去「重建家園」。

第9到10節,chit兩節thang參考詩篇第廿三篇,以及以賽亞書第四十三章19到20節。

第9節,對hiah-ê「被俘ê講:lín自由了」chit句話是極大ê好消息,這kah「對烏暗中ê人講:lín重見光明pah!」仝款,有重要ê意義。Á這mā是上帝奴僕被派出去ê任務,以及tio̍h傳揚ê信息內容(參考四十二:7)。行洗禮約翰ê門徒被派去問耶穌ê身分ê時,耶穌mā是án-ne回答(參考路加福音七:21—22)。

第11到13節,chit三節真清楚講tio̍h上帝拯救祂ê子民,為tio̍h beh hō͘祂ê子民順利tńg去故鄉,上帝特別「tī高山頂開闢道路,造一條大道」hō͘祂ê子民行。因為án-ne,祂ê子民會tùi「tùi西,tùi北,koh tùi南方ê希尼來」,mā就是teh指來自世界各地。因為性命得tio̍h拯救,真自然tek就會唱出頌讚上帝ê詩歌,而且是會「大聲頌讚」,表示對上帝ê感恩。

第14節,mā是tùi chit節開始,直到第五十章是關係in對上帝有兩種矛盾ê心境不斷交織ê描述,to̍h是對上帝ê拯救失去信心,á是對上帝有絕對ê信心。

Chia詩人講「上主已經遺棄阮」,類似chit種失志ê話,tī第四十章27節,以及耶利米哀歌第五章20到22節mā出現過。以色列人民認為上帝已經無koh看顧、保守in。

第15到20節,chit段詩歌是teh回答第14節提出疑問,認為上帝「已經遺棄」祂ê子民。

Chia一開始就用「老母」kah「食奶」、「親生ê嬰á」來做譬喻,表明上帝kah祂ê子民之間,就ná親像母親和食奶ê新生嬰á仝款,是一種bē-tàng割捨ê性命關係。詩人用chit種方式teh對「耶路撒冷」ê子民,mā就是猶大國ê以色列人民講,上帝絕對無可能bē記得in,因為上帝lóng kā in ê「名刻tī手心上」,表示永遠bē bē記得,mā抹bē掉。上帝beh來重建in ê家園,而侵佔in ê人會真緊離開,上帝beh用祂ê「性命保證」,mā因為án-ne,tńg去故鄉ê人kan-taⁿ會jú來jú chē,chē到「需要koh khah大ê所在」Chiah容納得下。

第21節,chit節ē-sái講是對19到20節ê具體回應,mā是以色列人民發出ê疑問。會發生chit種疑問,是因為所看tio̍h ê遠大大超過in ē-tàng了解ê現象。因為án-ne,提出三個bē了解ê現象:

第一個現象是人口增加真chē。第二個現象是ná會有人扶養chiah-ê幼兒長大成做少年一代,而且是有非常活力ê一代。第三個現象是過去「孤苦伶仃」,chit-má則看tio̍h下一代出現,無koh是絕望,卻是性命出現新ê希望。

第22到23節,chit兩節是teh回應第21節ê疑問kah驚kah gāng去。

上帝「向列國示意」,意思是teh指上帝beh向hiah-ê bat買賣á是擄行以色列人民做奴隸ê國家、族群講話。上帝ài in kā以色列人民ê下一代送還hō͘以色列人民。Chiah-ê國家、族群ná親像以色列人民ê「養父」á是「奶媽」一般(第23節)。M̄-nā án-ne,因為in知影這是上帝ê命令,而且上帝會賞賜hō͘祂ê子民極大榮耀,因為án-ne,chiah-ê族群、國家ê代表lóng會來「跪拜」,iáu會用「舐(chīⁿ)你腳上ê飛塵」,表示回鄉後ê以色列人民,teh beh tī眾國家、族群chìn前擁有尊嚴,無koh hō͘人看做是卑賤ê奴隸,大家會尊敬in,這是上帝奇妙ê作為。因為án-ne,tio̍h對上帝有堅定ê信心。

第24節,這是第三個疑問句,m̄-koh卻是帶肯定ê句型。過去巴比倫帝國ná親像「勇士」、「征服者」,怎樣可能tùi它ê手中「奪行戰利品」、「搶救俘擄」?

第25到26節,chit兩節是teh回答第24節ê句話。

先知以賽亞講chit種事teh beh發生,而且是「快發生」,之所以ē-tàng tùi「勇士」á是「征服者」手中搶救俘擄、戰利品tńg來,是因為上帝beh kā in看做是「仇敵」,而上帝打擊ê方式就是hō͘ in彼此「互相殘殺」,án-ne,in就會tùi同齊「壓迫」別人,變成彼此傷害。以現代人ê用語來講,就是「內戰」。Chia用「lim家己ê血」來表示。Á這只有tī上帝ê「大能」之下才能成就ê大事。

重新查詢 專卷研經 以賽亞書系列
錯誤回報,請聯繫comm[@]fhl.net