以賽亞書 43章14節 到 43章28節   背景資料  上一筆  下一筆
Chit段詩歌所描述ê是一個新ê紀元開始,ná親像早期上帝帶領以色列人民出埃及,chit-má上帝beh tùi巴比倫帝國ê手,帶領祂ê子民以色列民族行出巴比倫,tńg去到故鄉巴勒斯坦。因為án-ne,chia講上帝beh啟開新ê作為,除了是beh懲罰巴比倫帝國外,mā強調祂kā開始一個新ê紀元,祂chit種決定,等於teh表示祂kā創造一個全新ê世界秩序。

第14節,先知以賽亞一再提起上帝是「神聖」ê神,祂拯救ê方式,就是「差遣軍隊攻打巴比倫」。Tùi先知耶利米ê信息看見上帝mā bat差遣巴比倫皇帝去懲罰祂ê子民以色列(參考耶利米書廿五:9)。chit-má,上帝beh反tńg來懲罰巴比倫帝國,主要原因是它犯siōng大ê錯誤,是想beh kah上帝比高低,甚至想取代上帝。因為án-ne,上帝決定beh消滅chit種君王kah國家(參考以賽亞書十四:12—15)。

第15節,這是上帝宣告祂ê本性。一祂是神聖ê上帝;二是創造者;三祂是君王,是統治者(參考申命記三十三:5)。

第16到17節,chit兩節講出上帝帶領以色列人民行過紅海ê神跡奇事。上帝先tī紅海ê「水湧中」,「開闢一條通路」,hō͘以色列人民ē-tàng平安通過(參考出埃及記十四:21—22)。然後hō͘埃及ê精銳部隊,全數淹滅tī紅海中(參考出埃及記十四:28)。

第18節,這是過往ê歷史事件,上帝beh以色列人民看頭前teh beh出現ê大事。這是in thang親身體驗到ê,而m̄-thang「老記tio̍h往事」,mā「m̄-thang沉湎tī回憶中」,因為án-ne會hō͘人認為上帝只有為in做過chit件事。上帝ài in看tio̍h「新ê作為」,這是新ê神跡奇事,就是上帝beh伸手救in脫離巴比倫帝國ê手。

第19到21節,「新ê作為」,這是teh指ná親像過去in ê祖先出埃及仝款。M̄-koh上帝ài in親身體驗到上帝奇妙ê作為,無koh只是聽祖先流傳落來ê故事。卻是tī in這代子民ê身上,會親目看見上帝「tī荒野中開闢通路」,「tī沙漠裡挖掘河流」,m̄-nā án-ne,連「野獸」、「野狗kah鴕鳥」等等chiah-ê動物,lóng會尊敬上帝,因為當耶路撒冷tī上帝懲罰了後,lóng變成廢墟,這過去bat享受輝煌時代ê繁榮之城,隨時就成了chiah-ê動物盤踞ê所在。當時chiah-ê野獸mā lóng會知影發出敬畏kah歌頌上帝ê聲音,何況自命比chiah-ê動物iáu koh khah koân等ê人,koh khah應該歌頌上帝、敬畏上帝。因為上帝beh伸手帶領受掠ê以色列人民重回家園。chit-má上帝帶領祂ê子民tńg去故鄉ê路途中,雖然會經過沙漠、荒野,m̄-koh上帝會tī chit種曠野ê沙漠地帶出泉水,hō͘ in bē致使乾渴(參考三十五:6b、四十一:17—18)。因為in是上帝「家己造ê子民」,是上帝所親自揀選ê子民。 

第22到24節,ná親像頭前已經敘述過ê,以色列民族一進入迦南地,就「厭棄」了上帝,走去崇拜巴力神明。Án-ne chiah是hō͘上帝感覺痛心ê所在。上帝並無要求祂ê子民做任何獻祭,卻是只要in用謙卑ê心,行公義、好憐憫,kah上帝同行(參考彌迦書六:6—8)。

第25節,參考以賽亞書第一章18節、第四十四章22節。Chit節講出上帝奇異ê恩典,祂並無因為chiah-ê被揀選ê以色列人民背叛祂,就放棄救in脫離苦難,顛倒ê,祂最終iáu是「赦免」以色列人民一切ê「罪過」,無向in「報復」。	

    第26到28節,參考第四十一章21節。上帝是會允准祂ê子民向祂提出辯論。上帝明確指出以色列人民ê「祖宗犯罪」,而且是tùi「領袖」開始,chiah-ê人包括國王、社會ê領導者,以及先知、祭司等,in m̄-nā對上帝不忠,連帶ê mā陷上帝ê子民棄sak、背叛了上帝。因為án-ne,上帝決定beh嚴厲懲罰in。
 

重新查詢 專卷研經 以賽亞書系列
錯誤回報,請聯繫comm[@]fhl.net