以賽亞書 36章1節 到 36章12節   背景資料  上一筆  下一筆
以賽亞書tùi chit章開始,一直到第三十九章止ê經文,lóng是teh描述主前705年到701年chit段時間,亞述帝國皇帝西拿基立率領軍隊攻打耶路撒冷ê經過。

Chit段經文kah列王記下第十八章13節到第二十章19節ê記載內容,thang講仝款,而且仝款ê歷史資料mā記載tī歷代志下第三十二章,chit三所在經文lóng是記載亞述帝國準備攻打耶路撒冷,以及希西家王時代ê結束。其中以歷代志下ê資料差異siōng大,該書記載有關希西家王ê記事,是tùi第廿九章記載到第三十二章,tī chit四章ê篇幅中,歷代志作者對希西家王ê改革宗教信仰有真koân ê評價。

Chit段經文描述ê時間背景是tī希西家王執政ê第十四年,亞述帝國軍隊漸漸逼近南國猶大首都耶路撒冷。這mā講出第廿九到三十章ê經文背景,先知以賽亞一再警告南國猶大ê領導者,m̄-thang去kah埃及聯盟,tio̍h相信上帝、óa靠上帝,chiah是正途。Chit段經文記載亞述ê軍隊已經兵臨城下,對耶路撒冷造成極大ê威脅。

第1到2節,「希西家王在位ê第十四年」,希西家王在位期間是tùi主前715到686年。因為án-ne,「在位ê第十四年」,就是主前701年。Chit位「亞述皇帝西拿基立」是tī主前705到681年執政。伊率兵「攻打猶大ê設防城鎮,kā它佔領」了後,就企圖佔領耶路撒冷。Chia所講ê「設防城鎮」,意思是teh指衛星城鎮。其實,tī伊ê部隊尚且iáu teh「拉吉」ê時chūn,希西家王就差派特使去求kah,答應hō͘ in「一萬公斤ê銀á kah一千公斤ê金子」。為tio̍h beh籌募這筆龐(pâng)大ê戰爭賠償費,希西家甚至kā聖殿中,鑲tī牆壁kah柱á頂ê黃金lóng刮了落來送去。M̄-koh真顯然ê,亞述皇帝西拿基立並無因為án-ne而滿足。伊下令大將率領tī「拉吉」ê部隊去進攻「耶路撒冷」要脅「希西家投降」。

第3到6節,為tio̍h beh解決耶路撒冷被圍困ê危機,希西家王派出三位親信大臣去kah西拿基立談判。M̄-koh亞述大將質問猶大希西家王派出來ê三位代表講:希西家王為甚麼iáu不投降?伊用輕視而且無客氣ê語氣,指出猶大ê「軍備kah實力」lóng無夠額來阻擋亞述大軍。伊甚至語帶威脅地講:猶大iáu不投降,等於是想beh「反叛」亞述。伊mā清楚指出,去向埃及求助而不走chhōe上帝ê庇護,chit種念頭kah舉動,lóng是非常愚戇ê政策。chit-má亞述兵臨城下,埃及無可能來救助teh beh被攻破ê耶路撒冷。就算埃及想beh來救助,mā像用「一條破裂ê蘆葦當拐杖」,一點幫助mā無,因為自身難保ê埃及,ná親像已經有破損受傷ê蘆葦仝款ê脆弱,卻想beh用來當扶持用ê拐杖,ná明明是ná親像痴人講夢話仝款。

第7到10節,chit段經文是亞述大將繼續對猶大ê三位官方代表講話。亞述大將講出嚴重藐視全能上帝ê話,而這mā是亞述帝國就án-ne跋一下peh bē起來ê主因。Chit段經文中,提起幾點:一是希西家王進行ê宗教信仰改革是無用ê。二是伊以非常輕視ê態度看待希西家王,講伊治理之下ê猶大,根本就無任何軍事力量。三是猶大siōng大ê軍官lóng khah輸亞述小兵ê能力。四是自認有上帝親自呼召來攻打猶大,beh毀滅猶大chit-ê國家。

第11節,chit節kah列王記下第十八章26節仝款。Chia提起「亞蘭語」,這是當時通用ê外交kah商業ê國際語言,就ná親像今á日ê英語仝款。Á chit節ē-tàng看出當時亞述大將ē-tàng使用「希伯來語」,這thang看出當時亞述帝國的確是有實力ê大國。亞述大將故意用「希伯來語」對chiah-ê代表講話,主要ê目的就是beh hō͘耶路撒冷城內kah看守城牆ê軍兵聽tio̍h,hō͘ in心生驚惶,tī正式開戰前,就先hō͘敵人ê軍心潰散,mā是一種心理戰術。

第12節,chit節清楚講出chit位亞述大將ê用意,就是beh hō͘猶大人民心生驚惶,而chit種方式mā是hō͘猶大ê外交代表無法度隱瞞任何談判內容。伊講beh hō͘耶路撒冷城內所有ê人lóng「食家己ê糞,lim家己ê尿」,chit句話已經teh暗示:若無趕緊投降,繼續án-ne落去ê結果,就是會發生糧荒,致使人民iau餓難耐,大家只好用家己ê「糞」kah「尿」來充飢解渴。伊án-ne講,主要原因是伊知影希西家王kā耶路撒冷城內ê猶大人民講,上帝會救in脫離亞述帝國ê侵犯。因為án-ne,chit位大將án-ne講就是beh hō͘ in m̄信任希西家王,認為希西家王kan-taⁿ會害死in,hō͘ in餓死、渴死(參考歷代志下三十二:11)。

重新查詢 專卷研經 以賽亞書系列
錯誤回報,請聯繫comm[@]fhl.net