以賽亞書 27章1節 到 27章13節   背景資料  上一筆  下一筆
Chit章kah第十九章、第廿三章ê經文內容真接近。Chit章mā是tùi第廿四到廿七章chit段所謂「以賽亞式ê啟示」之最後一章。Kui章koh重新tńg來到一個重要主題:以色列民族就是上帝所揀選ê族類,上帝beh透過chit-ê民族成做萬國萬民賜福ê媒介。M̄-koh tī chit chìn前,chit-ê民族一定tio̍h先潔淨,成做真實ê聖潔民族。Koh講,chia講出這葡萄園有上帝看守,結果就是結出真chē果子。

第1節,chit節用「戾龍」、「古蛇」、「海怪」等動物,teh象徵欺壓上帝子民ê國家、族群。Chia講上帝beh用「剛硬銳利ê劍」,消滅chiah-ê專門teh欺壓上帝子民邪惡怪誕ê氣力。

第2節,chia提起上帝「所歡喜ê葡萄園」,原本葡萄園是teh代表以色列國,á是以色列民族。Á「歡喜」一詞teh代表確實有結出果子。

第3到5節,chit節講出有上帝保守看顧,必定會有美好ê成果出現。因為有上帝日瞑看守、保護tio̍h,而且「不斷來灌ak」,koh kā園中ê「刺phè kah蒺藜」、「燒光」,án-ne,kui個葡萄園kah葡萄就會成長kah非常美好,果子纍纍。Bē hō͘「敵人」隨便得tio̍h利益。

第6節,chit節回應了第3到4節所講ê,有上帝親自看守、保護kah灌ak ê葡萄園,必定會有真好ê結果出來。

第7節,上帝iáu-koh對以色列人民充滿tio̍h愛憐,表面上看起來對以色列人民出手懲罰真重,其實,比起上帝懲罰其他民族是輕了真chē。Tī先知以賽亞ê觀點中,這是kah「劫後餘生」(參考以賽亞書十:20、廿四:14、廿八:5、三十七:31、32),á是「殘存ê人民」(參考以賽亞書四:2、十:22、十一:16)有密切關係。因為上帝m̄是完全殲滅以色列,卻是留落來忠實tī祂ê子民。

第8節,chit節講上帝用吹東風ê方式,kā以色列人民吹散伊去。Chit種描述ná親像列王記下第十七章5到6節所記載ê,亞述帝國攻落撒馬利亞城,俘虜了北國以色列人民。先知耶利米mā bat用類似ê語句teh形容巴比倫帝國ná親像siōng強烈ê東風吹襲猶大,這是上帝對祂子民懲罰ê方式。

第9節,chit節回應了第8節所提起ê,上帝會án-ne懲罰以色列民族,是因為in棄sak上帝,去拜偶像,chit點一直是上帝所無法度容忍ê事,若是koh koh再發生chit種事,上帝是絕對bē「赦免」in。

第10到11節,chia「設防ê城」可能是teh代表猶大境內真chē城市,chiah-ê城市荒廢了,原因是淪陷tī敵人手中。無人khiā起ê所在,就會成做動物聚集之地。Chia用「牛tī hia倒食草」,「樹枝枯乾at斷,眾婦女去拾來當柴燒」等句話來形容城池已經陷落,koh khah án怎都無人khiā起,因為人民受掠伊去。chit-má只chhun牛羊等動物來chia倒、歇睏。原本有上帝灌ak ê樹,lóng會長大茂盛。Taⁿ因為會失去上帝ê灌ak、看守、整理修剪,結果ná親像枯焦死ê樹仝款,只有ē-tàng hông棄sak tī荒廢ê所在,任人拾tńg去當柴燒。

第12節,當上帝拯救ê日子來臨ê時,祂會kā所有被東風吹散ê子民,tùi世界各地lóng召tńg來。Chia用「麥á kah糠秕分開」,這「分開」就是teh指上帝ê審判。

第13節,chit節koh一pái強調上帝beh召tńg來所有被東風吹散,流亡在世界各地ê子民tńg來。大家lóng聚集做伙tī耶路撒冷,同齊敬拜上帝。

重新查詢 專卷研經 以賽亞書系列
錯誤回報,請聯繫comm[@]fhl.net