以賽亞書 15章1節 到 15章9節   背景資料  上一筆  下一筆
第十五到十六章,chit兩章lóng是提起有關「摩押」Chit族群teh beh面臨ê懲罰。Mā ē-sái講是一篇有關「摩押」ê哀歌。「摩押」人khiā起tī死海ê東邊,祖先羅得是亞伯拉罕ê姪á,因為án-ne kah以色列民族有遠親ê關係。M̄-koh號名「摩押」是有含「淫亂」、「亂倫」ê意思(參考創世記十九:36—37)。

Chit章是有關摩押兩個重要城市—亞珥城kah基珥城—ê災難。

第1節,「亞珥城」,正確ê地點已經無法度thang考,摩西bat借用「亞珥城穿過摩押ê地區」(參考申命記二:18)。「基珥城」真可能就是第十六章7節所講ê「吉珥‧哈列設」ê另外一個名稱。大概是設tī亞嫩河以南二十四公里遠ê城市,有可能指ê就是摩押ê首府。

Chit兩個大城lóng tī「一瞑之間毀滅了」。這真親像所多瑪kah蛾摩拉兩座城市,上帝一伸手懲罰,就lóng完全毀滅,而且是tī瞬間毀滅消失,就算人想beh逃走mā措手不及,因為án-ne chiah會講「死寂罩tiâu了」kui個國家。

第2到3節,「底本」,這是設tī亞嫩河以北約六公里ê所在。Tī約書亞時代,是分配給迦得支派管理(參考民數記三十二:34),屬tī約旦河東岸ê地區。In tī山頂建造廟宇,m̄-koh tī災難來臨ê時,in tī「神廟裡哀哭」,懇求in所敬奉ê神為in出力、救助。M̄-koh都無作用。Hō͘ in只有哀傷ê份。

「尼波」,這是亞嫩河以北,靠近尼波山ê所在。摩西就是tī這尼波山頂遠眺迦南全地(參考申命記三十四:1)。

「米底巴」,這是設tī希實本以南大約十公里ê所在。

摩押人為tio̍h chiah-ê城市ê毀滅,m̄-nā「傷心啼哭」,而且iáu「剃光了頭毛,刮掉了鬍鬚」,而且「市民lóng穿麻衣」來表示悲傷、見笑至極。

第4節,chit節tī耶利米書第四十八章34節mā有仝款ê描述。

「希實本」,這是設tī死海北pêng約三十公里ê所在。Tī大衛王朝chìn前,chit-ê城是西宏王ê首都(參考民數記廿一:26)。

「以利亞利」,chit-ê城距離希實本真近,大約是tī北pêng約兩公里ê所在。

Chit兩個城市tī約書亞時代,lóng是分配給呂便支派ê城市(參考民數記三十二:37)。

「雅雜」,這是tī亞嫩河北pêng大約三十二公里ê所在,ē-sái講是摩押siōng北pêng ê城市。

Chit節講摩押人民ê哭聲m̄-nā悲慘,而且嚎啕痛哭ê聲音極大,傳到極遠ê北pêng城市「雅雜」。Mā可能是因為哭聲siuⁿ過悲慘,因為án-ne,hō͘聽tio̍h ê摩押士兵「lóng驚惶」,連軍人應該有ê「勇氣」mā lóng「喪失」了。

第5節,m̄-nā摩押士兵聽tio̍h hiah-ê悲慘痛哭ê聲音心生驚惶、不安,就連先知以賽亞mā生出憐憫ê心,為「摩押」ê毀滅而「悲痛」。

「瑣珥」,這是靠近死海ê南端,亞伯拉罕ê姪á羅得teh逃離所多瑪城ê時,就是請求上帝hō͘伊tī chia停留(參考創世記十九:21—23)。

「伊基拉‧施利施亞」,地點已經不詳。

「魯希坡」kah「何羅念」,chit兩個城市mā仝款地點不詳。

第6節,「寧林」,這可能就是tī死海南端十六公里ê所在ê「南美拉溪谷」。Chia ê「小溪裡無水」,teh逃亡ê時chūn tú-tio̍h chit種境遇,koh khah悲慘,hiah-ê人真緊to̍h會因嘴乾來死去。因為連「溪邊ê草」mā「枯乾去」。

第7節,「柳溪谷」,大概設tī摩押kah以東ê邊界。Chit節講摩押人為tio̍h beh逃難,帶厝裡貴重ê細軟財物逃離家園。 

第8節,就Tī頂面所講ê邊界ê所在,聽tio̍h ê lóng是啼哭ê聲音,連tòa tī「以基蓮kah比珥‧以琳」ê人mā聽得tio̍h。Chit兩個地方前者tī摩押北pêng,後者tī南邊。Chit-ê意思就是kui個摩押全境lóng聽tio̍h痛哭哀嚎ê聲音。

第9節,「底們城」,chit-ê城真可能就是第2節所講ê「底本」。Chia講此城ê「河水lóng是血」,意思就是死亡ê情形慘重,因為「tùi摩押逃出來ê難民ta̍k個lóng會hō͘刣滅」仝款,無人ē-tàng存活落來。

重新查詢 專卷研經 以賽亞書系列
錯誤回報,請聯繫comm[@]fhl.net